Mitte gobba sufino keere afidhanno gede kaajjado gargarooshshunna ga’labbote uurrinshuwa addaxxinanni deerrira iillituro callaati. Mitte gobba utuwimmase buuxisate duuchurinni balaxxe ga’labbote bissa kaajjishidhanno.
Ga’labbotenna gargarooshshu uurrinshuwa duuchurinni roore balaxo uyinanni hajooti. Sufino keeri latishshahono ikko lophote doorshu nookki hajooti. Keere fulle keere eate,loosi’ne miinji’rate,miinji’ne cibbi’rate,ilate,ille sunqi’rate keeru geeshshi elto dino. Baalunkuri keerunniiti. Konniraati kaajjado ga’labbote bissanna gargarooshshu olanto mitte gobbara hasiissannohu.
Gobbankera seeda dirrara gongo’manni dayinohua daganketa latate hasatto adda assate,soorrote gashshooti kawa gobboomu Polotiku balchoomi soorramanni, soorro keeraancho ikkitino doogonni hadhanno gede Mootimmate widoonni baca sharro assinoonni.
Keere qara polotiku hornyi gede assine rosiisatenni hanafe keeru daafira waaga baantoonni. Konnira qote qoteho Mootimma soorrote hedo loosunni leellishate dandiissanno babbaxxitino soorrote loossa hala’ladunni baatto dirrisate ragaanni borreessantanni noo seyoo albisa ikkite leeltannote.
Mitte gobba buxima dhagge assate hananfoonni sharro dhuka ikkitannota ammannanni gargarooshshu olanto uurrinshanna ga’labbote uurrinshuwa aana hananfoonni soorrotenna kaajjishate loossa yanna yannatenni dhuka luphi assitanni gobba hiittenne bidhattonnino gatisate dandiissanno kaajjado uurrinsha aana afantannota uurrinshuwate massagaano naaxxillunni naqqassanno.
Xa gobbate hasiissannoti kaajjado ga’labbotenna gargarooshshu uurrinshuwaati. Konne assate gumulli yannara gurcho hedo kalaqqannori addi wolqa diigama dihasiissanno yite wirro gaance kayisate wo’naaltino ikkitono mishiishshannote. Addi wolqa wirro tantana yaa diiga dikkitino.
Sidaamu qoqqowinni afi’noommo mashalaqqe garinni, horonke gattannonke yitino mite mite addi wolqa massagaano tantanate hedo buukkeessate hasidhinonkanni. Ikkollana, Biiro adhitino qaafonni techo addi wolqa hasidhanno tantanora karsantinoti naandannite. Xa hasiisannori qoqqowohono ikko gobbate kaajjado ga’labbote uurrinsha kalaqate. Addi Wolqa Wirro Tantana Gobboomu Ga’labbote Dhuka Kaajjishate ikkinotano buunxannihu konninniiti.
Ga’labbotenna gargarooshshu uurrinshuwa sokko haaruu garinni leenjishatenni dagate widoogge wowe ikkitannorenna kaajjado safo noonsare assine quxate mannu wolqanna qodhotenni, qodhote dhukansa woyyeessa kaima assitino soorrote hedo uurrinshuwa addankanni bero noo gobbate su’ma kolishshiishshanno uurrinshanni fulte gobbate gede jawa bayiriidi seeri qeecha fulate dandiisanno dhuka dhaabbachishate dandiisinoho.
Qoqqowubbannita addi wolqa haaruu garinni tantanate sayinsoonni gumulonna gumulsinoonni gari tenne soorrote biso ikkasinna addi addi korkaatinni gede’ne keeshshinoha ikkinota huwantanni. Qara mixo addi wolqa wirro tantana ga’labbotenna Gargarooshshu olanto uurrinshuwa woyyaabbino hirbanna xircho uddisiisatenni gobboomu dhuka ikkite fultanno gede assate.
Xaa yannara Sidaamu qoqqowi giddo addi wolqa tantano dino; Mootimma wortino faasho garinni gumulloonni. Tini hedo gumulantanno gede dagatewiinni xa’mo ka’inohu lamu diri albaanniiti. Qoqqowubbate kalaqamino akata koffeenyu gede kayisatenni addi wolqa suwashsho tantano dikkitino yitanno xa’mo dagatewiinni ka’uta mootimma tenne hajora illacha tugge buuxatenna la’’ate wo’naaltanni keeshshitino. Tenne lamalara ledonke keeshshinohu Sidaamu qoqqowu keerunna ga’labbote Biiro sooreessi kalaa Alamaayyo Ximootiwoosihuno tenne kaajjishe coyi’rino.
Bakkalcho Onkoleessa 24, 2015 M.D
