Abrahaam Saamueel
Itophiyu Atileetiksete Federeeshiine 10 kumi meetire saate wonshate (minimu) heewo umi yannara gobbate giddo harinsannita egensiisino. Filote heewo mittu agani gedensoonni Hawaasi Istaadiyeemera harinsanni.19ki kalqoomu Atileetiksete shaampiyooni Hangaari Budapestira harisate sasu agani yanna calla gattinose.
Konni shaampiyooni aana beeqqaancho ikkitinoti Itophiyuno seeda dirrara qeeltanni afantino 10 kumi meetire xeertinyira riqibbanno Atileetoota umi yannara gobbate giddo filonni bada dandiitanno. Kalqete deerrinni tenne heewonni hallanyunni assinanni heewo ajjanni dagginoti qaangannite.
Konne harunse Itophiyu Atileetiksete Federeeshiine xeertinyeho yanna wonshitanno atileetoota doorate heewo Hoolaandete Hengilooni harissanni sa’inoti qaangannite. Itophiyu, konni dirinni kayisse umise dhukinni gobbate giddo filote heewo harissannotanna konnirano ikkitanno qixxaawo assinanni hee`noonnita egensiissino.
Federeeshiine Gobboomu gaamo yanna woy saate wonshate heewo daanno Ellu aganira 11/2015M.D Sidaamu Qoqqowi Hawaasi Istaadiyeemera assate mixidhinota egensiissino. Saate woy yanna wonshate heewo Hawaasa harisate korkaati Addis Ababu gottiimu baychira (high altitude) afantanohura, atileetootu hasiissanno yanna woy saate borreessiisate ayirrannonsa daafiraati.
Yanna wonshate heewo aana beeqqaano ikkitanno atileetooti federeeshiinete safaraanchi garinni doorranniha ikkanna; lamunku ko/teenni xaphoomunni 32 atileetoota keennannita anfoonni. 16 labballu, 16 seennu beeqqitanno heewote filora lamunku ko/teennii 16 atileetooti kalqetenni doorantino saate garinni doorrannire ikkitinota federeeshiine kultino.
Gattino atileetooti kayinni hananfinkunni shoole barra ikkinosi 52ki Itophiyu Atileetiksete Shaampiyooni heewora xeertinyeho 1-8 geeshsha noo deerra amadde jeefissannoreeti. Tenne shaampiyoone aana haaruuddunna gade afidhino atileetooti taalo beeqqaano ikkitannohura heewo sa’’ateno taalo kaayyo heedhannosi. Konni kaiminni, shaampiyoone fannanni yannara harinsoonni seenu 10 kumi meetire heewora filote sa`ino atileetoota bandoonni.
Insano, Lemlem Hailu, Zeyneba Yimerinna Mastawoti Fiqiru Addis Ababu Quchumi gashshootinni, Bosona Mulaate Amaaru Seeru Seejjonni, Wudde Keffaale Itophiyu Daddalu Baankenni, Tigist Ketema Oromiyi Qoqqowinni, Ayinaddisi Teshoome Itophiyu Elektiriikenni hattonni Gebeyanesh Ayyele Mechaalinniiti.
Laynki barra shaampiyoonete heewora, labballu filote sa`inori 8 atileetoota bandoonni. Tenne filora Booki Dirriiba Oromiyu Qoqqowinni, Yismawu Dilu Amaaru Qoqqowinni, Haylemaaryam Amaare Federaalete Seeru Seejjonni, Worqineh Taaddese Oromiyu Qoqqowinni, Leta Abbebe Oromiyu konstirakishinete Injineeringenni, Zenebbe Ayyele Federaalete Seeru Seejjonni, Abeeli Beqqele Amaaru Qoqqowinni hattonni Dinqialem Ayyele Amaaru Poolisenni gobbansa riqibbe heewisamate dandiisiisannoha filote heewo aana beeqqaano ikkitanno.
Shaampiyoonu sai Sanbatu barra Onkoleessa 13/2015M.D goofino. Yanna wonshate heewo assinannihu Ellu agani geeshsha atileetootu ikkado qixxaawo assate yanna noonsa. Itophiyu Atileetiksete Federeeshiine Heewotenna Beeqqote Loosu Harinsho Massaagaanchi Kalaa Asfawu Daanye, alba Hengilote harinsanniti filote heewo babbaxxitino bissa irkonni hattono Federeshiinete woxi fulonni ikkirono; xa kayinni qarrubba xaaddinosita kulanno. Keeniyu gedee olluu gobbuwa togoo heewo gobbansara harissannohura, Itophiyuno gobbasera tenne heewo harisa dandiitannota gumulote iillinoonni.
Deerrasi agadhinohanna kalqete borreessinoonni yanna (meme) hattono injiitino diilallote gadi heeriro, Itophiyu filote heewo gobbasera harisa dandiitanno; Federeeshiineno qixxaawo assitino. Albillichono, gobbate deerrasi agadhitino yanna woy meme heedhuro wolootu qoqqowirano heewo harinsanniha ikkanno. Kuni dancha rosicho ikkinohura jawaachisha hasiissannota Kalaa Asfaw huwachishino.
Shaampiyoonete ikkitannota balaxote heewote looso harinsanni hee`noonnita qumeessinohu Massagaanchu, xeertinyinsa garinni saayinse wortanno safaraanchi yanna kaima assine qixxaawo assate loonsanni hee`noonni. Konni kaiminni, Maraatoonete atileetooti heewo qixxaabbanni nooha ikkanna, wole albillicho harinsanniti Afirikunna Kalqete heewo minima woy saate wonshitanno atileetoota doorranni.
800na 1500 meetire gedee xeertinyi shaampiyoone mittu agani gata geeshsha Atileetootu doorshi agarranniho. Albillichote, 46-60 barri geeshsha gobboomu gaamo doorshi goofeenna atileetootu shaampiyoonaho ikkitanno qixxaawo hanaffannoha ikkannota Kalaa Asfaw huwachishino.
Bakkalcho Onkoleessa 17, 2015 M.D
