Qiddist Gezaheny
Wocawaaro 2013 M.Dnni hanafe Itophiyu Biheraawe gaamo qaru qajeelshaanchimmanni massaginohu Wubetu Abaatehu yawosinni ho’late Itophiyu lekkate kuwaase federeeshiinera xa’mo shiqishinoha ikkanna loosu gumulsiisaano komite hajote aana hasaabbe qajeelshaanchunnita loosunni ho’late xa’mo haadhe gutu sumimmenni baxxitunkunnu taxxi yitinno.
Qajeelshaanchu Wubetu waaliyoota massagino lame dirra ale ikkitanno yanna giddo xaphoomunni 35 godo’le harisinoha ikkanna 10 godo’le uurrinshu bikkaanchooti. Kunninnino 25 heewote mixo godo’le ikkitanna waaliyootu qeela dandiitinohu 6 godo’le callate. 2023 Afriku boowera beehache Shoolunni Gibtsete, Giininna Maalaawi ledo gaamantinori waaliyootu, sase bixxillenninna e’’otenni roorante shoolki deerrira ofoltino.
Kuni Afriku boowera sa’’ate kaayyonsa ruukkisinoha ikkanna qajeelshaanchu Wubetu geegorano qara korkaata ikkino. Ikkeennano biheraawe gaamo Gibtsetenna Maalaawi ledo gattinoti beehachu godo’le gattannonsaha ikkanna aanteteno Waaliyoota adhara dandaanno qajeelshaanchi hajo agarantannota ikkite keeshshitino.
Itophiyu lekkate kuwaase federeeshiine tenne lamala giddo tenne xa’mora dawaro uyitino muro sayissinota xawo assitino. Biheraawe gaamo sa’u lame dirrara massaganni keeshshinohu qajeelshaanchu Wubetu Abaatehu ledo sumimmetenni babbaxxituhu gedensaanni aanino qajeelshaancho doorate loosu komite assitino hasaawinni Teknikete Dayirekterimmanni loosanni keeshshinohu Instiraakter Daanieel Gebremaariyaamihu yannate geeshshi qara qajeelshaanchimmanni aantino godo’le massaganno gede murote aana iillinoonni.
Inistiraakter Daanieeli kaa’lanno gede Pirimiyerliigete loosanni afamannohunna yannate guminni woyyaawinoha ikke afaminhu Bahirdaarete quchumi qajeelshaanchi Degarege Yigzawuhu layinki qajeelshaancho ikkite loossanno gede murote aana iillinoonniha ikkanna federeeshiine qajeelshaanchohonna kilawesira Bahirdaarete quchumira xa’mo shiqisheenna fajjansanni layinki qajeelshaancho ikke dooramino. E’’ote agaraanchi qajeelshaanchi mootoo’ma kayinni muli yannanni xawo assinanniha ikkanno. instiraakter Daanieeli waaliyootu yawo adhihu gedensaanni ‘’Gibtsete ledo rosichu nooe; hiittoo waajjillino dinoe; Kayiro 117 diri woriidi Biheraawe gaamo 3nna 1tete qeelloommo gumi dihambanniho” yaanni aantino heewo daafira Hatriki Ispoortera hedosi uyino.
‘lowo geeshsha hagiidhoommo; hiikkunni godo’laanchirano ikko qajeelshaanchoho jawiidi e’’osi gobbasi baandeera riqiwe godo’late, ani umi’yanni xawo e’e heewisantanno gaamo massaga agurreenna gaamo massagaanchimmatenni haa’re massaga kalaqqanno naaxxilli baxxannota huwateemmo, ammanne yawo uyineennae doorama’yanni federeeshiine galaxxeemmo” yaatenni Inistiraakter Daanieeli coyi’rino.
Itophiyu lekkate kuwaase federeeshiine qajeelshaanchi Wubetu Abaatehu geegiissamihu gedensaanni taxxi yee keeshshino federeeshiinete Teknikete dayirekterimma fonqolo bikkaancho wonshitino yinoonnire onte heewisamaano loosu rosicho, noonsata qajeelshaanchimmate taje, rosu deerransa mixonna xa’mo laihu gedensaanni Instiraakter Daanieel Gebremaariyaamiha 81 bixxillenni federeeshiinete Teknikete dayirektere assite mootoonsitinnoti qaangannite.
Insitiraakter Daanieeli federeeshiinete Teknikete dayirekterimmanni ledote waaliyoota yannate geeshsha massaganno yanna giddo umi loosisi Itophiyu Biheraawe gaamo afriku boowe filora Maalaawi ledo assitanno godo’le massagate. Tini godo’le Waaliyootu xawu sharro ikkiturono Itophiyu kalqoomu godo’le qixxeessitannohu KAF i fajjonni noo xawi noosekkihura haaru yannate geeshshi qajeelshaanchi umi godo’lesi baxxino xawira assate gadachamanno. Maalaawi ledo assinanniti Ontikki beehachu filote godo’le faranjootu Ella 14 nni harinsannita ikkitanna Itophiyu lekkate kuwaase federeeshiine godo’le harisate Moozaambiki doorshansa assidhinota lamalate albaanni egensiissinoti qaangannite.
Federeeshiine tenne godo’le Soojjaati Afriki gobbuwara afantanno xawubbara harisate wo’naalturono Ruwaandaho konni alba yannate geeshsha uyinoonniti yannate geeshshi xawu fajjo ka’’asenni, Tanzaaniyaho uyinoonni fajjo kayinni biheraawe gaamo godo’le calla harissanno gede ikkasinni, Sudaane yannate noo ga’labbote qarri korkaatinni hattono Yugaandahonna Keeniyaho fajjinoonni xawi hoogasinni Soojjaati Afriki gobbuwara harisa dandiinannikkihura Itophiyu Maalaawi ledo harisanno godo’le gumulsate Moozaambiki doorshase assidhinota xawissino.
Bakkalcho Onkoleessa 10, 2015 M.D
