Abrahaam Saamueel
Itophiyu Kalqoomu jajjabbu Labballi teensiete heewo qixxeessitannota Itophiyu Teenisete Federeeshiine xawissino. Tini heewo hanaffannohu Onkeleessa 6-20/2015M.D geeshsha Addis Ababaho Teenisete kilawera harinsannita xawinsi.
Saih Ammajje aganira Itophiyu dironsa 18 worire ikkitinori kalqennirii qacale wedelli shaampiyoona qixxeessite qinaawino garinni jeefissinoti qaangannite. Tenne Heewora 14 Itophiyu ispoortenyooti beeqqitinori mereerinni sasu kalqete deerra afidhino. Itophiyu tenne heewo aana leellishshino isilanchonna wosinaho dancha owaante uyno daafira; xa dironsa 18 ale ikkitanno jajjabbu teenisete ispoortenyooti beeqqaano ikkitanno heewo Itophiyu qixxeessate wirro doorantino.
Heewo Itophiyaho umi yannara qixxaabbannota ikkitanna, labballu callootu beeqqitannota ikkitanno. Federeeshiine albillicho seennu heewo qixxeessate loossannnota qumeessitino. Heewo albankeenni daanno Sambatu barra Addis Ababaho afamanno ontu teenisete xawira hananfanni.
Heewo beeqqitara qajeeltanni keeshshitino ispoortenyootira heewote kaayyo kalaqatenni sae kalqete noo ispoorte deerrase keenate illacha assine harinsanni. Heewo gobbankera qixxaawasi gobbate woxu soorro eessatenni sae, Itophiyu su`ma gotti assate horose jawate yinoonni. Xaa geeshsha 4 Itophiyu teenisete godo`laano borreessantinoha ikkanna, kiironsa kawiinni lexxitanno yine agarranni.
Heewote 27 gobbuwanni filloonniri 60 teenisete ispoorte godo’laano heewisantanno. Heewote qinaawara xaphooma heewote aana ispoortenyootanna wolootu xibbuu ali mannootu beeqqitanno. Kalqete deerrinni 300 na aliid guma abbitino ispoortenyooti beeqqitanno kalqoomu heewo ikkasenni jawa heewisama heedhanno. Qixxaawo biiffinota ikkitanno gede komite uurrinse millimmote widira e`noonnita anfoonni. Dagate xaadooshshinni, fayyimmatenni, ga`labbotenninna wolootta loossa qineessate tantannoonni komite loosonsa loossannota xawinsoonni.
Lame doychonni harinsanni heewo mitte mittente doychora 15 kume doolaare baraarshaho qixxeessinoonni. Lame doycho qeelihura Xaphoomunni 30 kumi doolaare qixxeessinoonnita qummeesinoonni. Kalqete deerra uynoonni heewo ikkitinohura, qeeltannori kalqoomu deerra afidhanno. Abdelli Nediivi yaamantanno uurrinsha widoonni qixxeesinoonni heewo, ispoortenyootu heewote kaayyo afidhano gedenna kalqoomu heewo gabbanke widira goshooshate hende harinsannitanna ikkado qixxaawono assinoonnita kulloonni.
Itophiyu Teenisete Federeshiine ledo halamatenni heewo qixxeessannohu Abdella Nediivi tekinikete hajo daafira xawishsha uyno. Kunino, saihu wedellu shaampiyoonunni dancha gade afi`noonniha ikkanna; xaano heewo woyyaawino garinni qixxeessate loossa loosantanni noota xawisino. Godo`linanni xawo, Hoteele, miidiyu ledo assinanni xaadooshshe, ispoonsere hasa, heewote hasiisanno uduunnenna xaphoomunni heewote hasiissannore afit`rate gade afi`ne woyyaabbino qixxaawo assinanni.
Itophiyu Teenisete federeeshine Pirezidaante Kalaa Taammiraati Baqqalihu, Itophiyu ispoortenyooti jawaatte loossuro baraarsha adha hoolannosari nookkita xawisino. Pirezidaantichu xawishshi garinni heewote illachi baraarsha calla ikkikkinni, Itophiyu teenisete ispoortenyooti kalqete heewo assite guma afidhanno gede assateeti. Miidiyu bissa, heewo daga illachishshanno gedenna qinaabbinota assate uminsa dilaala fulanno gede woshshatto assino.
Itophiyu albillicho Awuropu kiironni Ella 5/2023 seennunni Ruwaanda Kigaaliranna Ella 20/2023 labballunni Deeviisi Kaap Afirikunni beeqqaano ikkitanno. Seennu gaamo doorshi woy filo gooffinoha ikkanna; labballu filote godo’le assine doorsha harinsanni. Heewo qixxeessate mittu agani ale gatanno daafira, heewote barri shiqanno yannara kaampete gamba assine qajeelshannoha gaammeenna millimmo assitannota Federeeshine qummeessitino. Konni kaiminni, xaa heewo gobbankera qixxaawa Gobboomu Gaamo kalqete deerrinni gade afidhanno gede kaa`lannonsata agarranni.
Bakkalcho Onkoleessa 3, 2015 M.D
