Abrahaam Saamueel
Hagiirsiissanno qeelle, huluullisanno guminni hattono jifote giddoonni sa’’inoti Afiriku Atileetikisete Shaampiyoona bero gooffino. Zaambiyu Naadoolu Quchumi qixxeessonni 18nna 20- diri wori wedelli atileetikise beeqqitanno heewo ikkanna, mittimmatenni harisa hananfinkunni tayxe layinki dirooti.
Afiriku Atileetikse Konfedireshiine massagganno tenne heewora 50 gobbuwa atileetooti 18 diri worire, 40 gobbuwa hattono 18 dirironna 20 diri worire 44 heewonni beeqqaano ikkitanno gede assitino. Konni mereero mitte Itophiya ikkitanna, gobboomu gaamo maakisanyote geeshsha 6 culqa, shoole birrenna 3 camo xaphoomunni 13 meedaaliya borrreesiissino. Hagiirsiissannno qeellenna huluullsianno guma borreessiissinoti tini gaamo, haammata jifono xaaddeennansa saaysanni noori wedellu gaamo konne deerra iillansanni jawa gede galantannireeti.
Gobbansa riqibbe heewote aana beeqqaano ikkkitinori gaamote miilla, 30 ikkitanna, lamunku ko/teenninna diru deerrinsanni 8 xibbe meetirenni hanaffe 10 kumi meetire geeshsha noo xeertinyi heewonni beeqqaano ikkitino. Konninni, 18 diri woriri xaphoomunni 3 meedaaliya borreesiisse, 20 diri woriri 10 meedaaliya borreessiisino. Umi barra harinsoonni heewonni Itophiyu atileetooti beeqqitino gumulote heewo 20 diri wori 3 kumi meetirenni seennu culqunni kaayise camote geeshsha noo meedaaliya fiitte adhitino. Qeeltinori, Asimaarechi Annileyi, Yenewa Nibireitnna Aynadissi Mabraate yinannireeti.
Laayinki barra, 20- diri wori seenni 1 kuminna 5 xibbi meetirenni xaano Wubriste Asichaalehu, Samiraawiti Mulugeetanna Mixxini Iwunetu yinanniri hoodetenni eatenni mittunni kayise sasu geeshsha fulte qeelle borreessiissino. Labballu widoonni qole Ashennaafi Imaanihu layinkiha ikke fule, wolootu lame dipolooma afidhino. 18- diri woriri 3 kumi meetire xeertinyinni Maarta Alemaayyoti birrete meedaliya adhitino; Lamu kumi sarraaqonni labballu giddo Obisa Feyyisa Camote meedaaliya qeele baraarino.
Sayikki barra harinsoonni gumulote heewora 18 diri worihu 3 kumi sarraaqote dodanshora Sewumehon Anteneh Culqa adhino; 20 diri wori labballi 10 kumi qaafote heewora culqu meedaaliya Misgaanu Waaqumihu qeelino. 20- diri wori seennu heewonni 3 kumi sarraaqote xeertinyinni Aleminat Waalenna Firehywot Gesseseti hoode eatenni culqanna camote meedaaliya adhitino. Ikkollana, konni xeertinyinni afi`noonni meedaaliyi addi addi huluullo kalaqinota Itophiyu Atileetiksete Federeshiine xawissino.
Konni 20 diri wori 3 kumi seennu sarraaqote dodansho heewo Itophiyu wedelli culqanna birrete meedaaliya qeeltino atleetooti 18 diro woro ikkite heedhe heewisantinohu 20 diri wori heewo aana ikkinohura xa`mo kaino. Ka`ino xa`mo “dirinsara ale ikkitino heewora e`e heewisama didandiitanno” yaannoha ikkanna, Itophiyu gobboomu gaamo kayinni “Woriidi dirinsanni aliidi dirinsawa higge heewisama dandiitannota kalqete Atileetikise fajjitannohura dandiineemmo” yitino.
Konni korkaatinni, bero geeshsha meedaaliyu meedaaliyu shaete giddora einokkita buunxoonni. Soodo gaamo jawaantensa garunni leellishshe hashsha uullanna haqqu aana galte soodo qixxeessinoonni heewora hoodete 1-3 geeshsha fulatenni haammata daga xaggeeffattinonsa. Heewono bero barra jeefo afidhino.
Bakkalcho Dotteessa 26, 2015 M.D Hamuse
