Abrahaam Saamueel
Addisi Ababa: – “Jifamino Kaajjille” yaanno uminni Xibbuu Roorrichi Atileeti Belaayneh Diinsamohu borreessinoha saaysino doogo, jifonna kaajjille xaphi asse amadino maxaafa Maakisanyote barra Hayile Graande Hoteelera iibbino amuraatinni maassiinsoonni. Maassote amuraati pirograamera haammata Federaaaletenna Sidaamu Dagoomu Qoqqowi mootimma aliidi massagaano afantino.
Battalate Sidaamu Dagoomi Qoqqowi Mootimma Pirezidaantichi Kalaa Desta Ledamo coy`ranni, haammata daga dhaggenna loosonsa duucha yannara hasaanboonni, macciishinoommo; macca atileetichinke Xibbuu roorrichi Belaayneh Diinsamohu dhagge kayinni baxxitinota assannohu, loosino dhagge, saayisno doogo togoo garinni lubbote hee`reenna borreessineenna daa”ata maalale ikkitinno yiino.
Pirezidaantichu ledote, “Atileetichu Belaayneh Diinsamohu Sidaamu daga giddonni mu’rino bareeddaati. Kuni macca atileetichi Sidaamu daganna Itophiyu buudi gotti yaanno gede kalqete aana jawa looso loosino daafira, assino loosi ledo taashsha nafa hoongiro gobbasira daye investe assanno gede 1000 heektaare baattono uynannisi” yaatenni ayirrinyesi buuxisino.
Pirezidaantichu Kalaa Destai, Atileetichinke Belaayneh Diinsamohu kalqete riikeerde hiiqqasi calla ikkikkinni 10 dirira tenne riikeerde hiiqqantukkinni keeshshiishino bareedda ikkasi dhaggesi baxxitiota assannota qaagiisse, konni bareedu atileetichira ikkanno ayirrinye Sidaamu Qoqqowi mootmmanna daga uytara hasi`neemmo yiino.
Atileetichu Belayneh Diinsamohu giddo gurre gundannikki egennonna rosichi noo daafira konne rosichosi ninke qoqqowira dayee atileetikisete handaara qajeelshenna rosiise irkisankera hasi`neemmo daafira gobbasiranna qoqqowisira afame techonni hanafe kuusantinota egennosinna gadesi beehara qoqqwu mootimma fajjitinota buuxisino.
IFDR Budunna Ispoortete Ministeere Ministerchi Deetichi Ambaassadere Mesfiini Cherinnetihu isi widoonni, Atileetichu Belaayneh Diinsamohu gobbasiha Itophiyu baandeera kalqete aana leellanno gede assino bareeda ikkinota xawise, Konni atileetichira hasiisanno ayirrinye aa hasiissannota buuxisino.
Atileeti Belaayneh Diinsammohu Itophiyu giddono ikko kalqete no yinoonni macca atileetichanke ikkino daafira, IFDR Budunna Ispoortete Ministeere isira hasiisanno coyi baalunni qoxeho uurritanno yiinohu Ambaasaadder Mesfini; ministeere tenne pirogiraame qixessatenni hanaffe haammata looso qineessitanni noota xawise, atileetichahu loosino loosinni bikkiniro ajinoha ikkirono 200 kume kaa`lo assitinota Ambassaadder Mesfiini kulino.
Dr Shaaleqa Atileeti Haile Gebresilaasehuno, , Atileetichu Belaayneh Diinsamohu “ayi woyteno Itophiya” yaanno daafira bomba tunge shaate wo`naallirono, Itophiyu Magani bombu shaannosikki gede asse gatisinnosi” yaanni saayisino jifonna kaajjile xawisino.
Shaalaqu Atileetichi Hayile Geberesillaasehu, Atileetichu Belaayine Diinsamohu maxaafa maassinsanniha jawa hara fajjatenni kaayise duuchurinni irkisinosiha ikkanna, Xibbuu kuminnino maxaafasi hidhe kaa`lo assinosi. Atileetichu Belaayneh Diinsamohu shooshaqa, shaqqado, wodaninni gatona yaannoha ikkinota xawisinohu muli jaalisi Atileeti Shaaleqi Hayile, albi atileetootirano ikko, konni ka`a dagganno wedelli ispoortenyaho isi jawa jawaanteeti yiino.
IFDR Poolisete Komishiine Laayinki Komishiinerichi Kalaa Nebiyu Isaayaasihu isi widoonni, Atileetichu Belaayneh Diinsamohu Poolisete Komishiine giddo loosi yannara haammata woleho lawishsha ikkanno looso loosino. Danchu akati nooho, manna ayirrisannoho; konne bayicho techo ani leella`yara addintanni kaayyaataamoho yiino.
Layinki Komishiinerichi lede, Xibbuu Roorrichi Atileeti Belaayneh Diinsamohu gobbasi baxannoha ikkasinni sae kalqete Itophiyu su`ma gotti assino bareedaati yiino. Konnira IFDR Poolisete Komishiine muli yanna giddo loosino looso xawissannota togoota afamishshu pirograame qixxeessinannita egensiisino.
Xibbuu Roorrichi Atileeti Belaayneh Diinsamohu battalate dayee pirograame beeqqino mannira galata shiqishe Meqedooniyu uurrinsharano woxu irko assino. Maxaafa hirre gamba assinanni womaashshi giddo 20% anga Meqedooniyaho kaa`lo assinannita xawisinohu Atileetichu Belaayneh, baalunku hidhanno gede woshshatto assino.
Maxaafu maassora battalate Atieelti Haile G/Silaassehu, atileticho Geexe Waamiti, Atileeti Gezahanyi Aberrihu, Meqedooniyu uurrinsha xintinohu Biiniyami, hattono Sidaamu Qoqqowi Budunna Ispoortete Biiro Sooreessi Jaggo Agenyehu, Firewu Areerihunna wolootta woshshatto assinoonni bissa battalate leeltino.
Atileetichu Belaayneh Diinsamohu Borreessinoha “የተፈተነ ጽናት’ woy Jifamino Kaajjille” yaanno maxaafa sunfe Federaaletenna Sidaamu Dagoomi Qoqqowira Hawaasa maasiinsannita buunxoonni.
Bakkalcho Dotteessa 19, 2015 M.D Hamuse
