Abbebech Maatewoos
Sidaamu daga diru soorro ayyaani Fichee cambalaalla mittimmatenni ayirrinsannite. Tenne mittimma kayinni babbaxxino amanyootinni xawinsanni. Cambalaallate barra sooreessu gudumaalira babbaxxino amanyootinni ayirrinsanni ayyaani noo gedeenni hee’reenna;balaxote feeffatora assinanni qolchansho,lekkate kuwaase heewonna lekkate hodhishshi mittimmanna hanqafaanchimma xawinsanni hornyi mereero kullannireeti.
Konni garinni feeffatote Qoqqowu Massagaanonna Hawaasi Quchumi Massagaano Mereero Lekkate Kuwaase Heewo Harinsoonni Sidaamu daga ha’nura bude ikkinohunna ayirrisamannohu Fichee Cambalaallate ayyaani roowenna hamusete barra ayirrisamanno.
Ayyaana lainohunni “Fichee Cambalaallate dodeemmo kilawe’ya irkiseemmo” yaanno uminni doogote aani qolchanshonna hattono qoqqowu massagaanonna Hawaasi quchumi massagaano mereero lekkate kuwaase harinsoonni.
“Fichee Cambalaallate Dodeemmo kilawe’ya irkiseemmo” yaanno uminni 5 kiilo meetire qolchansho assinoonniha ikkanna labballunni Taammiraati Duugehu meentunni Almaaz Yohaannisiti umire ikkite qeeltino. Amuraatu aana leelle sokkasi saysinohu Sidaamu qoqqowi layinki pirezidaantichinna Rosu biiro sooreessi kalaa Beyyene Baraasihu
“Sidaamunni sa”eno kalqete deerrinni quqquxxotenni agarranni Fichee Cambalaallate ayyaanira hawalle iillishinke” yaatenni “annuwinke awurranke konne ayyaana agarte abbite ninkera iillishshino; gobbatennino ikko kalqete deerrinni ayirrinsanniha jawa ayyaana assitino” yaanni qaagiissino.
Ikkinohurano techo noo ilama ha’nurimmasi agarte ayirrino garinni hee’ranno gede jawa looso loosa hasiissannono yino. Fichee Cambalaalla baca balchooma, dhaggenna woga amaddinota ikkasenni kalqete dona ikka dandiitino yiino. Duuchu dagoomi xawishshimmanna kalqete dagara leellinshanni bude ikkinoha Fichee Cambalaallate ayyaana ayirrinseemmo woyte budesi, wogasi hattono balchoomasi agarino garinni ikka noositano hattonni.
Sidaamu qoqqowi woga, turizimenna ispoortete biiro sooreessi Kalaa Jago Agenyehu isi widoonni xawisino garinni ayyaanu jawimma huwatatenni Ficheete lamala yaatenni babbaxxitino qixxaawubbanni ayyaanu ayirrisamannota xawisatenni Fichee Cambalaalla Sidaamu dagara ha’nuranna dirunni diro sa’nanni ayyaanaati. Budu ayimmanke xawishsha ikkinonte gede baala miinju handaarinnino budu keeraanchimmatenna laashshaanchimmate dhuka gatamaarate jawu qeechi noosi yino.
kalaa Jago ispoorte keereho, mittimmate, turizimetenna fayyimmate jawu qeechi nooseta xawise Sidaami giddo noo kilabbanni mitto ikkitinoha Sidaamu buni lekkate kuwaase irkiseemmo yaanno uminni tenne dagate kilawe irkisate mixo amaddino millimillo ikkase daafirano coyi’rino.
Ispoorte duuchu ragi soorroranna dagoomitte mittimmara yaano polotikaho, miinjahonna dagoomitte hornyisi jawahonna luphi yinoho yino. Amuraatu aana qoqqowunniti luphiima loosu massagaano, Sidaamu buni ispoortete kilawe irkisaano, qaaqquulle lede haammata dagoomu kifile heewotenni beeqqitino.
Fichee Cambalaallate ayyaana korkaata assatenni Sidaamu qoqqowi massagaanonna Hawaasi quchumi massagaano mereero lekkate kuwaase heewo harinsoonni.
Bakkalcho Dotteessa 12, 2015 M.D
