Abrahaam Saamueel
14kihu kalqete quchummara harinsanni dirunniti daymendete liige heewo lamalate gedensaanni Kowaataari Dohaho hanaffanno. Tenne heewo harunsine ispoortete maate illachase 3 kumi meetire aana tuggino. Ontu tenne yannara jawaatu dhuki aana noo atileetooti tenne heewo aana beeqqaano ikkitannota egensiisansa roorenkanni ispoorte quqquxamme agarrannita asitino.
Babbaxitino heewora leellishshino jawaantenni qeltanno yine agarranniri ontu giddo sasu Itophiyu Atileetootaati. Dohaho harinsanni heewo mereero baxxinohunni 3 kumi meetirera assinanni heewo jawa illacha tungonnite. Wedellichu Atiletichi jawaatu Morokote qansichi ledo assanno heewo ille tungannite. Tenne heewonni jawaata ikkitino atileetoota bada dandiinanni.
Lammeechi Girmihu tenne heewo aana heewisantanno jawaata atileetooti mereero agarranniho. Kuni Atileetichi kalqete kibirewosene hiiqqe umisita assi’rinoho. Afirikunni 20 diri wori shaampiyoonninni kaayise shiima yanna giddo jajjabba heewo aana beeqqaancho ikka dandiinohu Lammeechi xaano qeelanno yine agarranni.
Lame hige Kalqete Shaampiyoonenna hattono Tookiyote birrete meedaaliyi anni Lammeechi, sai diro harinsoonni Beelgriidete kalqete mini giddo Shaampiyoonerano Birrete meedaaliya qeelinoti qaangannite. Konne heewote dirono kalqete mini giddo heeworano beeqqancho ikke Leeveni 3 kumi meetire heewo xeertinye 7:23:81 saatenni kalqete kibirewosene/Riikoorde/ anna ikkino. Dohahono rosantino jawaantesi Atileetichu Lemmeechi leellishanno yine agarranni.
Morokote qansichi Atileetichu Sofiyaani Ali Bakalihu, sarraaqote heewora ikkinninna tenne heewora waajjinanniha dikkino. Tenne heewo harunse uyno hedonni, “Kuni jawu kalqete heewo dirooti; Buudapeesetete kalqete Shaampiyoonera qeelleetenni fulara tini heewo kaa`litannoe; xaa geeshsha qixxaawo maa labbanno yaannoha Dohaho nooe beeqqonni huwata dandiinanni” yaatenni qeelate noosi dhuka kulino.
Tenne heeworano lamu beeqqaanchimmansa egensiissinoha ikknna; yannate noonsa dhukkinni qeeltannota hendanni. Tenne heewora jawa gede agarroonniri lamunku atileetooti Salamoonni Baareggihunna, Yoomifi Qajeelchiho.
Atileetichu Salamoonni Baareggihu, baxxinohunni 5 kumiranna 10 kumi meetirera maccaha ikkollanna, 3 kumi meetire heeworano dancha guma abbara dandiino. Wedellu shaampiyoonera gumaamo ikkinohu Salamoonni, Awuropu kiironni 2018 Berngihaamete hattono sai diro Beelgireedete Kalqete mini giddo heewora birretenna camote meedaaliya adha dandiino.
Konnira, atileetichu qeeltanno yine balaxote hedo worroonni atileetooti ledo heewisame dancha guma abbanno yine agarranni. Yoomiifi Qajeelchihuno 5 na 10 kumi meetirera qoleno 3 kumi meetirera dancha guma abba dandiino atileeticha ikkanna; qeelanno yine isono agarranniho. Kuni atileetichino Dohao Diyaamendete heewora dancha guma abbanno yine aggarranni atileetichaati.
Itophiyunna Morokote atileetootira jifo ikkanno yine agarrannihu mittu Keeniyu atileetichaati. Konnirano, qeelanno yine balaxote hedo uynoonni. Keeniyu atileetichi Tiimootaay Chriyooti, Aropu kiironni 2017 hanaffe hoodissino dirrara 1500 meetirenni Diyaamendete liigenni qeelino.
Kuni atileetichi, tayxeno qole heewisamanno xeertinye soorre Dohaho 3 kumi meetire xeertinyira jawaata heewisamaancho ikkanno yite kalqe agartanno. Itophiyu atileetootino konne Keenyu atileeticha shotu garinni la`annokkita coydhino. Itophiyu atileetooti tenne heewonni dancha guma abbitanno yine illacha tunge agarranni.
Bakkalcho Dotteessa 5, 2015 M.D
