Abrahaam Saamueel
Addis Ababa:- Bayiriidihu Abbayi Kofatto ijaari 12ki diri safote barra korkaata assine qixxeessinoonni boondete lamalara 100 miliyoone ali birra ikkannoha irko afi`rate mixi`noonnita Bayi’riidi Abbayi Kofatto Ijaari Dagate Beeqqo Qineesso Gobboomu Amaale Mini Borro Mini egensiisino.
Bayiridi Abbayi Kofatto Ijaari Dagoomu Beeqqo Qineesso Amaale Mini Borro Minihu Qaru Dayrekterichi Dr Aregaawi Berhe Kofattonnita 12ki diri safote barra lainohunni xawisino garinni; Kofatto jeefisate eo gamba assate qixxeessinoonni pirogiraame mereero mitte boonde hidhate.
Baxxinohunni, kofattonniha 12ki diro safote barra korkaata assine qixxeessinoonni boondete lamalara 100 miliyoone birra ale ikkannoha gamba assate mixi`noonni yiino. Sa`u Qidaame barra gobboomu deerinni boondete lamala yine su`mine Abbayi Kofatto Ijaari Dagoomu Beeqqo Qineesso Gobboomu Amaale Mini Borro Mininna Benishaanguli Gumuzete qoqqowi aliidi massagaano afantinowa Asoosu Quchumira hananfoonnita Dr Argaawi caakkeessino.
Dr Aregaawi xawishshi garinni; mootimmate loosaasine, babbaxxitino maamarra, hallanya uurrinshuwa, rosaano, daddalaano dhukinsa fajji garinni boonde hidhite luphiima beeqqo assitanni keeshshitino. Xaano tenne beeqqonsa kaajjishshe suffanni afantanno. Eo roorenkanni kaajjishatenna ledate konne diro baanketenna inshuraansete aana illachiinshe loonsanni hee`noonni.
‘’Daga mittimmatenni ka`inohu latishshu loosi Abbayi Kofattooti” yiinohu Dr Aregaawi; “8100 A” yitanno harancho borrote sokkanni mittu aganira 13 miliyoone birra ale gamba assinanni hee`noonnitanna dagoomu beeqqono barru barrunkunni kaajjte suffanni noota xawisino.
Eo gamba assate yine qixxeessinoonnihu Abbayi Kofatto Boowe babbaxxino qoqqowira doyissinanni eo gamba assinanni hee`noonnitanna xaa yannara boowe Sidaamu Qoqqowira noota kulino. Babbaxxino daninni xaa geeshsha eo gamba assinoonni birri 18 biliyoone ali birra ikkinota Dagoomu Beeqqo Qineesso Gobboomu Amaale Mini Borro Mini Dayrekiterichi qummeessino.
12kiha Kofatto hananfoonni barra korkaata assine kalanqoonni millimillonni woyyaawino eo gamba assinanni yine agarrannitanna boondete lamalanni sa`ne macca Artistootinna babbaxxitino bissa ledo eo gamba assatenna daga kakkaysate pirogiraame harinsannita Dr Aregaawi egensiisino.
Bakkalcho Badheessa 28, 2015 M.D Hamuse
