Abrahaam Saamueel
Itophiyu Gobboomu Lekkate kuwaase gaamo Waaliyootu Afiriku boowe sayikkitanna shoolki doyicho Giini ledo godo`lite mitte bixxileno diafidhino. Konnira Morokotenni qaensara higgino. Waaliyootu sa`u Arbete barra 2:0 Sanyote hashsha qolte 3:2 qeelamansa harunse 6 bixxille abba hasiissannansa mitte bixxille abba hoogansanni Afiriku boowe beeqqonsa hexxo nookkita xaanni leellishanno.
Shoolu filote godo`le giddo Ferioonootu Gibitste ledo noo godo`le mitte calla qeelte lame qeelante xaano lame heewo heedhunsarono Kotidivaare qixxeessitanno Afiriku boowera noonsa hexxo dinoote; ruukakadote.
Waaliyootaho gattinonsa godo`le mitte Gibitsete ledo ikkitino daafira, alba Gibitse Itophiyunni qeelantinohura tenne dooyichora kayinni Gibitse rabbisidhara godo`litannoti xawoho. Konnira, Waaliyootu Gibitsete xawira Ferioonoota qeeltanno yaa dihendannite.
Waaliyootu, lamenka gattinonsa godo`lete heewo qeelturo nafa, Gibitsenna Giini lamenta noonsa godo`le nafa qeelanturo, eote kiironni calla roorte qeelturo ikkinninna Afiriku Booweara sa’’ate kaayyonsa hexxo dinoote. Waaliyootu qeelantanno gede assanni noonsari coyi giddo mittu uminsa xawo ikkinokkihura godo`lansaati.
Ha`ne hinge godo`linanni heewo heedhoommero, Waaliyootu Giini ledo nafa bixxille beeqqitannonkanni. Galchimi Afiriki gobbuwa Addisi Ababa dagge godo`litannoha ikkiro diilallote gadi ayirrannonsa daafira Waaliyootaho hexxo noonkanni. Massinanniya, isilanchu lekkate kuwaase godo`linanni xawi hooga qeelamate mitto korkaata ikkitino.
Qajeelshaanchu Wubetu Abaatehu Waaliyootu Giininni 3:2 qeelantu yannara, Afiriku boowe beqqaancho ikkase hexxo ruukkitinota uyno hedonni xawisino. Hasattonke daggannno yannara Afiriku heewora beeqqaano ikkkate loosate. Tenne yannara noonke bixxille sa”ate huluullissanno yaanni Waaliyootaho hexxo nookkita xawisino.
Qajeelshaanchu lede, “Afiriku Boowera beeqqaancho ikkate hasi`neemmoha ikkiro guma abba hasiissannonke. Ajanna lamenta godo`le qeelate. Kuni kayinni dikkino. Korkaatuno sa`uta lamenta heewo godo`la hasiissannonke garinni digodo`linommo. Afiriku Boowera sa’’ate noonke kaayyo ruukkadote yaanni kulino. Lowontanni ayirritanno heewo assinanni hee`noommo. Afiriku Boowe hewora sa’’ate hexxo ruukkado ikkiturono; daggannota lamenta heewo qeelate wo`naaleemmo” yiino.
“Anino nooe dhukinni wo`naaloommo. Dhukunni ane roorannohu dayro konne bayicho noo godo`laano koreeti. Ninke dandaa hoongummoro dandaannohu wolu daawona. Ayi geeshsha dhuka afi`rinohu tenne godo`laano adhe marannowi dino. Wole dhuka afidhino godo`laano laashshate loosa balaxxanno” yaanni Qajeelshaanchu xawisno.
Qajeelshaancho sai diro lamu dirira malaatisanno gede assinoonnihu, Gobboomu Lekkate Kuwaaase gaamo Afiriku boowe beeqqitanno gede assanno yineenna daynohu Qajeelshaanchu Wubetu, konni ka`a federeeshine wole dhuka afi`rinoha abbite qaxadhitanno yee hedeemo yaanni albillichote noore caakkeessino. Konne dandaa hoogiro, qajeelshaanchu Wubetu shorrammannoti xabbe leeltanno.
Bakkalcho Badheessa 21, 2015 M.D
