Abrahaam Saamueel
Gafa mitto
Adhanna adhama dirunna dagate budi garinni addi addi tironna gumulsha afidhinoti xawoho. Adhanna adhamooshshu lamunku koo/tee mereero assinanni heeshshote xaadooshsheeti. Qoleno maate xintate harinshooti. Adhanna adhamooshhsu albi warinni kayise techo geeshsha nooho. Ikkollana, adhanna adhamooshshu budi dirrate giddo daganna dagoomu budinna amma`note budinni babbaxxanno.
Wolaytu daga budi garinni adhana adhamooshshu dani onte ikkanno. Insano:-
1. Maate sumuu yiteenna assinanni adhanna adhamooshshe
2. Koo/tee mereero noo sumimmenni /isinna ise/ mereero harinsanni adhanna adhama /baxillunni/.
3. Diiro /gadachine adha/
4. Aduulshanna
5. Raggete adhanna adhamati.
1. Maate sumuu yiteenna harinsanni adhanna adhamooshshu amuraate
Kuni adhanna adhamooshshu amurati Wolaytu daga seerinni hegeraamohonna seeru fajjanno amuraateeti. Kuni Adhanna adhamooshshu budi lamenti oosote maate sumimmenni gumulamannoho. Beettu annuwi beettinsa adhate iillinota buuxxuro, galte ikkitannota seemo beetto hasa hanaffanno. Tenne harinsho giddo beettoho ikkitannota seemo beetto hasanna sircho woy fiixoomu xaadannokki gede qorophotenni kiira hanaffanno. Qoleno beettote dana biinfille, angate ogimmanna qishshidhanno gara safaraancho assine hedote giddo worre hansanni.
Beettu annuwi hasidhanno safaraancho wonshitanno seemo beetto anfiro, shoole ikkitanno geerra seemo beetto ayiddi qaera sonkanni. Geerru hadhanno woyte doogote shama darcho tayisse amadde hadhanno. Qae iillitanno yannara amaddino shamu darchinni lekkansa buko hoo`lite cirattanni ofoltanno. Ayidde keere haadhu gedensaanni beettote ayiddira leellite wirro ayiddira higganno. Lame lamala ikkitanno yannara xaano wirro beettote qaera dagganno. Beettote ayiddi coyee iibbishannokkiha ikkiro, woshshensa daggino haja maa ikkitinoro xa`manno. Coyee iibbishannoha ikkiro beettote anni afanni hee`re qaetenni wirri yaanno. Woy mine hee’re sammi yaanno. Geerru hexxo murtukkinni shoole onte higge beettote anni qaera martanno. Beettote anni dayino manni ayiimma buuxi gedensaanni, isi hasi`ranno ayidde ikkiro minira woshshannonsa. Hasi`rannokki ayidde ikkiro minira e`e yee diwoshshannonsa. Sase hige giwinota buuxxuro beettu annuwi coyee woy geerrimma uurrissanno.
Maate kayinni dayino geerra eona yite fajjituro, hajansa xa`mite huwatte beetto`ne beettinkera hasi`noommo yaatenni coyidhanno. Beettote ayiddino ninkera iillitino beetto dinonke yaatenni dawaro qoltu gedensaanni, buuxi`neemmona wirro higge yite geerra qaensara harissanno. Beettote anni, ayiddu, fiixu firu ledo amaalame geerru wirro hadhinowiinni higganno yannara buna shiqishanno. Buna aggu gedensaanni daggino hajo aana hasaabbe sumuu yitanno. Beettote anni beetto aansara wole dinye amade geerru daanno soodo anga amadde daggannore kulleennansa hadhanno.
Dinyete barri iillanno yannara, beettote maate qaete geerra, fiixunna olluu ledo ikkite angannirenna intanni sagale qixxeessite geerra adhittanno. Beettu aninno geerru ledo ikke beettote anni ledo noo geerri ledo mimmitu ledo egennantanno. Mittimmate ikkite shiqqino sagale ittanno; agattono agganni hagiidhitanno. Barraho beettunna beettote anni mule ofolte mittu qoonchi giddo noo agatto mittu foolinni agganni fiixoomansa egensiissanno. Qoleno geerru giddo jawa ikkinohu beettote, malaate ikkanno gede beettote angara camo usuranno. Kuni amurati fiixoomu amuraateeti. Kuni budi goofi gedensanni beetto uynanni barra lamenti maate sumuu yite murtanno.
Sargete Qixxaawo Sargete qixxaawo lamente maate widoonni qixxeessinanni. Lamenti maate sargete barrira ikkanno looso loossanninna uynanni afanshi uduunne qixxeesitanni keeshshitanno. Sargete qixxaawo yannara fiixu firu olluu gamba yee mittimmatenni looso kaa`lanno. Sarge qixxeessitanno maate sargete hasiissanno uduunne baala wonshate wo`naaltanno. Anga noo ayiddi, fiixunna olluuno hattonni kaa`la hasiisano uduunninni kaa`lanno.
Beettu maate sargete qixxaawo assitanni heedhe beettote uynanni bararshano qixxeessatenni jawa looso loossanno. Beettote ayiddira uynanni afanshi soorroonni hando annaho, urde annaho woy baayiru rodiira, buuro wo`ma gambaaycho, woleno mitte cigile ikkanno hookichunni ussurroonni buuro, shama woy haaro buuro sargete yannara gamba yiino mannira buurranniha, idaayichote seemma, gaawe, naxala, maccatenna goowu seesa qixxessanno Sargete barri shiqqi yaanno yannara fiixu firu olluu gamba yee jilaho hasiissannoricho baala qixxeessanno. Daase minanno, sagalenna agatto qixxeessanno. Mule noo olliino gamba yee dayee hasiissanno coyinni kaa`lanno.
Sargete Barra Sargete barra beettu dukkisaanora beettu anni mine woshshine hasiissanno sagalenna agatto shiqinshe koyinsanninsa. Hakkuy gedensaani beettu dukkisaano beettote anni minira faradda guluffe beettote maate minira sirbitanni hadhanno. Beettu “haadiyya” yinanniha seesu bolaale qodhe hallisi aleenni “asaara” yinanni uddanno uddi’re mereerima waajjo gaawe qoteho ga’ne angasira urde amadanno. Farashsho guluffe hadhanno yannara “Hayasho laale” yitanni sirbitanno. Sirbu tiro, “Aganu gede xabbinota, hallo shaalado, ginde shaqqado seemo beetto abbinammora ha`nanni hee`noommo” yaate. Geerru beettonna dukkisaano balaxxe beettote maatera miine (Koytaa) amadde hadhano. Abbitino miine shiqishate geerra woy ayidde xa`miteenna fajjini gedensaanni shiqishshanno. Beettote maate dirante ofolte abbinoonni miinenna baraarsha kiirte adhitanno. Xe`annoha ikkiro wole barra wonshate wowe woshshite araarantanno.
Wole widoonni beettu dukkisaanosi ledo beettote qaera iillanni noota xawisate, shoole farashsho doorreenna guluffe beettote anni qae marte malaate uyte higganno. Beettote maatenna olluu gamba yee sarganyoota adhate alba uynoonni malaati garinni alba kulloonnihu shoolu farashshaanni dagge doogote aana cancunna guffa heedhannokki gede assate guranna qiniiti widoonni fante doogo fano assitanno. Adhanno beettino farashsho dancha gede assine biifinse koorreenna farashsho gulfe qaete leellishanno. Lamunku sarganyi wedellinna seenni waate waateho budu sirbinni sirbitanni sarge iibbishshanno.
Budu sirba sirbitu gedensaanni beettunna beettu dukkisaano e`anno gede fajjinanni. Jila koyinsanninsa ittanno; agganno. Bura maala, buurunna burbuxxuni loonsannihu coommadu waasu tima, badalate tima, buurunninna addi addi makimaanonni loonsoonni daaxxa barbarenna wolootta haammata agattote dana shiqinshanninsa. Dukkisaano itte duubbu gedensaanni beetto noowiinni guggushineenna jaallasenni dukkisante mittu geerchi massaganna dunkaanu giddora e`anno woyte beettu dukkisaano gotti yite uurritanno. Beettote anni beettosi anga amade adhanno beetto “Atera qaaqq`oya danqa ammane oommohe, ane gede assite amadise, towaatise” yaanno. Beettuno, “mittore huluullantooti, ate gede asse amadeemmose, towaatemmose; konnira qaale e’’eemmo” yee heeshshi yee adhanno.
Sufeno beettunna beetto maatete lekka sunqitu gedenaanni, umikki miize ikkanno beetti dayee beetto badhesira baayi’re gobbara fushshanno. Konni gedensaanni miizichu beetto farashshu aanira gulufisiisi gedensaanni qole dirrise gaangote aana ofoshshiishanno. Konne assinannihu, balanxe beetto gaangote annira fushshiniro ila diafidhanno yine ammannanni daafiraati.Dukkisaano beettu minira hadhanno yannara kuneeti haa`ne abbinummo yitanni sirbitanno. Miizichu xaano gaangote aaninni dirrise badhete baayi’re minira eessanno. Beettu maate, fiixu, la`lamootu, aduwu dirante karroonni itiille anna ofoltanno. Miizichu insa amuwu mereero ofoshshiishanno. Insano anja tuffanni ili, ciiri,misi, bati’ri yite maassidhanno.
Konni gedensaanni beetto mushshurrite / Idayicho/ miizese dukkisseenna dukko giddora e’’anno. Budu garini beettoto goxxanno base qixxeessitannoti baayiru rodii galteti. Ise hoogguro wosiilu woy abbu galteeti. Goxxanno base qixxeessite guddu gedneensaanni beettu eanno. Beetu ei gedensaanni beettote mule mare budu gatannokki daafira macca qasanno. Beettono sammi diyitannonna gibbanni shiqqo hooltanni sharrantu gedensaanni labbaahu qeelenna maayye yiteenna maranno. Konni gedensaanni beetto huurose gotti assite raartanno. Beettuno mare macca qase kainota jaallasira kulanno. Macciishitanni noori jaallasinna fiixisi hawalle hagiidhootto yitanni maasidhannosi. Beettu amano hagiirrunni lamunku iddahonna idaaychote qixxeesinoonni sagale mooqqotenni itissannonsa. Gafa lame daqgganno lamalara haa`ne shinqeemmo. Keerunni!!
Bakkalcho Badheessa 7, 2015 M.D
