Meyaa beeto “Eweli Beetto Mine Amaddu” yaanno qaali mine amada yaa minaanna afi’ra calla dikkitino. Mine amada minaanna massaga dandaate. Mine amada ille illoonni qaaqqo lossa dandaate ikkadimmaati. Wole widoonni loosoamaddu? Yitanno xa’mono ka’anno. Looso amada damooza ita calla dikkitino;amaddino looso gumulsa dandaate.
Mine assidhanno beetto qareessitenna bilchaatisse dhukase dhaabbachishsha lossitannoti amate,maatetenna qooxeessaho. Ama iltino beetto mine amadate illasenna ikkadimmase buuxate mito mito woyte maatete ikkitanno sagale qishshanno gede kaayyo kalaqqanno. Qishshino sagaleno qamasse la’anno.
Ajinori nooro guutisse dhukase kaajjishshe qixxeessitanno. Soorrote kawa mootimma meentu dhukanna dandoo badatenni massagaanchimmate widira abbate looso hanaffino. Baxinohunni mootimmate kaawinenna woloottano labbanno massagaanchimmate basera meentu kiiro ledate loosi woyyaawanni dayno. Massagaanchimma kayinni biilloonye amadate hajo ikkitukkinni massaga dandaate hayyo ikkitinohura base uynoonninsa meentino kaajillunni massaga dandiitannota leellishshino. Mootimmano meentu dandoonni addaxxatenni massagaanchimmate deerrira dagganno gede assitino harinsho wolootta gobbuwa mootimmuwannino naqqansoonnite.
Ikkollana, aliidi mootimmate massagaanchimma deerrinni la’noonnihu danchu rosichi deerru deerrunkunni noo massagaanchimmate basera loosu aana hosiisate ragaanni hala’lado foonqe no. Ikkinohura, meento massagaanchimmate widira abbate ragaanni mootimma eeliidi tantano geeshsha hasiisanno garinni massagganno gede assa dandiinoommero meentu massagate dandoonsanni woyyaawa guma maareekkisiisa dandaanno.
Ikkinohura, deerru deerunkunni noo babbaxxitino uurrinshuwara meentoho hasiissanno base uyne dandoonsa keennanni harinsho xaa geeshsha ajjinota ikkitinohura albillicho illacha tunge loosa agarranni. Meentu xawoho fulte dandoonsa leellishshe dagoomanna gobba massagganno kaayyo kalanqansara hasiisanno.
Meentu massagate calla ikkikkinni massagaanchimmate dandoonsanni jiffa xaaddannonsa yannara hayyotenni sa’’a dandiitanno. Loossate base injiitono injaano hooggo loossansa ikkadimmatenni gumultanno meenti noota hedote giddo woratenni hasiissanno base aa hoonginsa geeshsha gobba his’nanni lopho widira reekkate harinsho timo gantannokkita huwata hasiissanno.
Gobbanke buximatenni fulte miinjunni dhaabbattino gobbuwanni ledo taaltanno gede assate loossa hasi’noonni deerrinni kaajjitinokkita la’nanni. Konnira, deerru deerrunkunni noo massagaanchimmate basera meento albisa assatenni kaayyo uynansara hasiisanno. Meentu dagoomitte, miinjunna poletiku handaarranni gobba hegersate ragaanni fultino qeechino konnira lawishshaho.
Gobbanke latishsha kaajjinshe sufisate meentu beeqqo noosi qeechi luphiima ikkasi kulanni calla meentu beeqqo lossa didandiinanni. Meentu beeqqo yine base baalantera gaamano guma maareekkisiissannota dikkitanno. Xaa yannara gobbanke amaddinoha latishshunna lophote harinsho guuta ikkino garinni gumulate dandiinannihu meento dandoonsanninna egennonsanni gobbate hasiisanno qeechansa fultanno gede assa dandiinirooti.
Dagoominke giddo xaa geeshsha meento labballunni woffi assine la’nanni laooshshi, huuteessanna minshete assooti nooti xawoho. Techo geeshshano rossinore ikko rossinokkire hattono massagaanchimmate ikko ogimmate deerrira noo meento jawaachishate ragaanni noo laooshshi agarroonni garinni woyyaawinokkita la’nanni. Meentu massagate dandoo kalaqamu ellonsata ikkase da’’ammannikki gede, maate amaddanno hayyo calla ikkitino.
Ammanamaancho ikkaserano iltino qaaqqira kalaqamino unuuna woleho qansitannokkitanna hee’reenna hooltannokkita huwata hasiissanno. Kalaqamu uyinose jiro qaaqqisera di qakkanno;minaannisera dihanqatissanno. Konninni halaalaanchimmansanna ikkadimmansa huutteessa agurre hananfoonni massagaanchimmate widira reekkate looso kaajjisha hasiissanno.
Meento loosinsanni woy wo’naalshinsanni gufisa gobbate latishshanna lopho gufisate gede hattono keere booreessate gede kiirranni. Ikkinohura, gobboomu deerrinni base basente hattono deerru deerrunkunni noo base meentu massaga dandaanno gede kaayyo aate ragaanni hananfoonni rosichi kaajje sufara hasiisanno. Konnira, gobbannita duuchu handaari lopho maareekkisiisate hasiisiro meento massagaanchimmate widira abate loosi kaajje sufara hasiisanno!
Bakkalcho Ammajje 30, 2015 M.D Hamuse
