Yaareed Geetaachew
Keere buuxisiisatenna hobbaate dirrisate haammata doogga heedhurono suffannohu kayinni malamatenninna hasaawunni tirriro calla ikkasi batinyu ammantanno. Olunni yannate geeshshi keere dirrisa dandiinirono sufannoha assa kayinni didandiinanni. Hakkiinnino sae olu banxono gimbono baalante gada aana gawajjo iillishasinnino aleenni tuge sa“anno bassi sufanno keeri dirrannokki gede jawa guficho ikkasi digattannote. Tennenkuraati olunninna wolqatenni calla keere abbeemmo yee heda umise meemotenni waa dirrate geedeeti yine coyi`nannihu.
Konne huwattinoti Itophiyu mootimmanna konne halaale seekkite affinoti Itophiyu daga Itophiya gobbate gede sufisiisate yite gadachante e`ino olinni fulanna duuchunku coyenni hasidhanno jireenyiwa qaafa dandiitannohu sufanno keere abba dandiitanno woyte ikkasi huwattanno. Konniraati aliyye Itophiyu kifilera lame dirrara sufino ola uurrisate yite korkaatiweelo keeru doorshira hifattukkiinni angansa diriirsite agartinohunna keeru hasaawi adda ikkawo gede keeru xa`mino waaga baala baattanni keeshshitinohu.
Mootimmatenna HWHT mereero Wodiidi Afrikira malaatinsoonni keeru sumuumme konne sufanno keere abbate, hattono Itophiyu daga mittimmatenni uurrite duuchunku handaarinni jireenyansa adda assitawo gede kaayyo aannoho. Sumiimmeno keere kaajjinshe jireenyu widira iillate assinanni harinshora safo ikkitinotano haammatu ammantannota xawissanna macciishshinanni. Halaaluno konneenti. Korkaatuno mitte ajuuja gumulate hattee ajuujawa iillate gufissanno doogga biddi assa; woyyaabbino doogo widira qaafate hooltanno korkaatta agura hasiissanno. Konni daafira keere kaajjishate ola agura, jireenya gumaamo assate olu korkaatinni jawajjantanno jajjubba, ba`anno lubbo, mulla gede billaallitanno jiro gatisa hasiissanno.
Ikkollana halchinoonnihura calla ikkannoha dikkino. Roorenkanni looso, murciraanchimmanna cinca jiffanno luphi yitino jifo hinko ga`mi`ne sa“a xa`mitanno; mittu widiha callano ikkikkinni lamu widiha wodaninni ikkitino beeqqo baatisse hasidhannona. Lame babbaxxitino halcho araarsa; lame babbaxxitino qaccera noo hasatto shiqqi assa; lame widoonni noo macciishshamme taashsha; qole sufanno keere abbate assinanni qaafo xinti duuchunku handaarinni jireenya buuxisiisate wo`naalshira siqqo ikkanno gutu dhuka kalaqate dandiisanno.
Kuni dhuki daannohu qole mootimma mootimmate gede; HWHTno mitte yekkeerantannoi wolqa gede; Tigrayete daga lede baalunku Itophiyu dagano dagate gede sufanno keerinsara, jireenyinsa adda ikkawo gede qeechinsa looso suwashshu wodaninni wora dandiiturooti. Konne assate harinshonni kayinni baalunku huwattara hasiisanno halaali; mittu widoonni keere gibbannori olu daddalaano; wole widoonni ola gibbanno keeru ambaasaadderooti heeransaati. Konne huwatansa qole keerunna jireenyinsa adda assatenni olu hedonni umonsa gargaratenni; gutu mininsa Itophiyu daafira gutu yawo noonsata affe keerensa buuxisiisate jawaantete giddo duuchunku handaarinni jireenyinsa adda ikkannota ammante halantanno gede assannonsa.
Korkaatuno olunni tirfidhannoti olu daddalaano keeru koffi assannonsare ikkansa gede; kuri wolquwa tirfinsa olunniitina keere horontanni dihasidhanno. Tenne hedonni baxxino garinni uurritino keeru ambaasaadderooti kayinni olu di-injaannonsa. Hiikko garinnino olu gawajjannota huwattinori; olu dihasiisanno yite heddannoreeti. Keeru waaga huwattannohurano keeru daafira coyi`noonni coyibba, e`noonni sheemaatta gumulantanno gede batisse halchitanno. Keeru gobbatenna dagate duuchunku handaari jireenyira hee`rannosi qeecha baraarsanno gede hifattukkiinni daafurtanno.
Tini danchu wadanaammi hedo; keeru ambaasaadderooti halcho qole baalunku Itophiyu daga ajuujanna hexxooti. Keeru baalunku hasattonna halchooti; jireenyuno keeriweelo adda ikkannokkita baalunku manni ammananno. Konniraati keeru Ambaasaadderooti keeruwiinni ikkinnina olunni tirfu heerannokkita ammante goxicho hooggannohu. Afa hasiisannohu kayinni kuri wadanaammi keeruwiinni callinsa dihoronsidhanno; roorenkanni keeruwiinni Itophiyunna baalunku Itophiyu dagaati horonsidhannohu. Ikkinohurano hananfoonniti keeru doogo seekkitanno gede; keeru bubbe suffanno gedenna kaajjitanno gede; konni garinni afi`nannihu sufanno keerino jireenyanke adda assannota huwatatenni baalunku agarrannisi yawo fula hasiissannosi. Keeru Mittu Widiinni Calla Agarranniha Dikkino;Baalinkehona baalinke keere hixamanyine hasi’no!
Bakkalcho Bocaasa 15/ 2015
