Itophiyu ayirrinyi daafira reyo mishshino; daafuro habbino; gobbate gargarooshshu olanto.
Gobba heedhuro biinfanni; gobbatenni hagiidhinanni; gobbatenni ayirrinanni; gobbatenni naaxxinanni. Gobbansa hoogginori allaggu gobbara tootayyaabbino. Gobba noonsakkiri ayiddinsara albaanni seesa; fiixinsanni ledo hagiidha halchitino. Gobba hoogginori iillitannowa hoogge jaanjurtino. Wolambinate hoogge borojjimmatenni kadantino. Gobba noosikkiha afihu baalu kadannosi; ayno ka’’anni xiiwannosi; ayirrinyesi woffi assanno; gobba nookkihu yaanni shorrannosi.
Gobbansa hoogginori; wolambinatensa mulqantinori; goorituro aggannori; hudidhuro ittannori; daafurturo fooliishshidhannowi nookkiwa; hexxo assi’nanniri nookki baatto aana tootayyaabbanni halalla ubbe gattino. Gobbansa hoogginori quuxxote yanna raarensa raartanni sa’ino. Gobbansa hoogginore shorrinanni shinoonninsa; fooliishshidhanowa, umo wortannowa hoogge shettino. Gobbansa ayirrinye ayirrisiissinori; wolambinatensa agarsiissinori kayinni naaxxillunni qaaffino; hasidhinore assidhino.
Gobbate ayirrinyira yite; wolambinateho yite kakkalantino oosonsa gobba noonsare assitino. Wolambinatunni heedhe wolaphitino gobbanna ilama kalaqqino. Ayirrado gobbansa; hexxo ikkino Baandeerinsa; hiikkunnirinnino soorrinannikki ayirrinyinsara; hoshooshantannokki dhaggensara yite mundeensa duntino; miqichonsa hiiqqitino. Mundeensa wolambinatinni; miqichinsa ayimmanni gobbasa gobbino.
Itophiyanke, diinna ate kissino barra ba’anno; Itophiya, ate meexxinore may gatisannonsaro la’neemmo yitanni ka’anno. Itophiyu aana ka’inore baala gantanno. Itophiyanke ate kaandummohero agarinohehu, ayirrisinohehu, kaajjishinohehu, balaxisinohehu, hegersinohehu, baalankare uynohehu Kaaliiqi kaadonke; madaarammeemmo bushsha ho’lonke yitanni oosose ayirrisiissese heedhino.
Yanna yannantenni baca diinna Itophiyu aana ka’ino. Itophiya yaannoha, mayinnino aleenni woshshinanni woyte coommannoha dancha su’mase hunate; wolambinatese mulqita’ra; dhaggese huntara; balchoomasenna amanyootese huntara; amma’nose huntara baca diinna ka’inose. Qawwe amadisiisse qodhaano bobbaassino. Laggate qaccuwa baalate xaadde xaartanni qassasera ka’ino.
Bareedda iltanni; bareedda lossitanni; bareeddatenni agarantanno. Konnirano, xaa geeshsha qeelinosehu, xiiwe tuginosehu, halchosi gede dhaggete taje borreessinoonniwiinni hoolinosehu; hoolsiisinohuno dino. Hunneemmohe yitinori ba’e; tungeemmohe yitinori ubbe; shollinsheemmose yituri shollite; qeelleemmose yitinori qeelante higganno ikkinni. Itophiyu kayinni qeellete aana qeelle lexxitanni dhaggete maxaafira gotti yite leeltino. Ise huntasera ka’inore tugganni qeelletenni qaaffanno.
Diinna ka’u yannara qaccetenni qaccete geeshsha noo ooso’ya mimmito woshshidhanno; diinu kaino yinoonni qooxxeessira mittimmatenninna bareendetenni timbiliqqanno. Itoophiyunnihu qeellete fojo mittimmatenna baxillensaatina mittimmatenninna baxillunni witiittanno. Mittimmate cigilensanni diinna gantanno; mittimmate cigilensanni diinna barbadeessitanno. Konnira HWHT Birra 24/2013 M.D olantote aana iillishshu gawajjonni hanaffe itophiyu daga leellishshino mittimmate cigile naqaashete.
Wolambinateho duuchurinni aleenni baxillunna mittimma heedhara hasiisanno. Baxillunna mittimma noonsari Itophiyu qansooti diinnansa buluushshitino. Qeelletenni Baandeeransa gotti assite leellishshino. Baxillunna mittimma heedhurooti diina qeellannihu.
Wolambinate hoonge hee’nankunni wolaphine reyniro woyyanno yinanninte gede bareedda wolambinatehonna gobbate qakkannori dino. Jeefote geeshsha sharrantanno ikkinnina. Bareedda wolambinateho yite shetto baala habbe; reyo mishshe bareendetenni sharrantu; amansa Itophiyaho mundeensa duntu; miqichinsa hiiqqami. Mundeensanni dunte naaxxissuse; wirro diinnatenni roorte ofolitanno assituse; su’mase gotti assitu.
Diinnate halcho baala toltannokki assitannoti mitte wolqa no. Tini wolqano Itophiyimmatenni, mittimmatenni, bareendetenni, kaajjillunni uurrate. Itophiyu daga Gobbaydi diinnanna giddoydi kaadaanonni fannoonninsa ola mittimmatenni sharrante qeelle adhitino. Techono mittimmatenni ka’ioro Itophiyu qansooti cancishaanchu HWHT gaa’lite ka’ino diinna aana qeelle adhitanni no. Diinna sokka sokke agurranna uminsanni dagge; ola fante nafa Itophiya diqeeltino. Albillichono diqeeltannose. Korkaatuno, gobbate ayirrinyira yite reyo mishshannori bareedda ooso noosehura.
Techono bareendetenni albi bareedda annuwinni gobbate ayirrinye agarsiisate eeggo adhitinori Itophiyu bareedda Itophiyu aana ka’ino diina qorichishate; dubboho, boonna bobbooddatenna ilaallate millissanno. Itophiya ayirrisiisate bareendetenni diinna sharrantanno. Adhitino eeggonna e’ino qaali diingannikkihona bareendetenni Itophiya agartanno. Ayirrinyu calla biifannoheti; qeelle adha calla uynoonniheti; qeelletenni biiloottati; diinnakki qeelte sa’e leelloottati amanke Itophiya hegerera ayirri. Hegeri. Ayirrinyu Itophiyu daafira yite reyo mishshinonna daafuro habbino bareeddara Olantonkera!!
Bakkalcho Birra 24, 2015 M.D
