Dombophichote care dombophichote ogori giddo afantanno dombophichote du`namaanonni woy dombophicho afaletenni helleete widira massitanno boombuwa giddo kalaqamanno allaggicho coyeeti.
Dombophichote du`namaanchi afalete munnyuuqonni laashshamanno, maxinete nyamme noonsa shiilubba amadinoha ikkanna saga`lineemmo qiwaatenna vaytaamiine daahantanno gede assatenni kaa`lanno. Bisinke giddo afantannota hardaame shiilo hunateno kaa`litanno.
Dombophichote care kaimubba 80 anga xibbuunni ikkitannoti dombophichote care kalaqantannohu qiwaatetenni woy kollestiroolete batinyimmanni ikkinota fayyimmate ogeeyye coyidhanno.
Dombophichote carera reqecco leddanno coyibba:-
- Qiwaate afidhino sagalla batise horonsi’ra
- Bikkunni saino kee`milli
- Bisu giddo noo qiwaate ajishate kaa`litanno xagga adha
- Godowishshu gargarooshshi kinine
- Godowishshu yannara bikkunni sa“ino kee`mille
- Diru xiiwa baxxinohunni meentu aana dhibbu batire leellanno
- Sukkaarete dhibbinna labbinoreeti.
Dombophichote care dhibbi malaatta
Dombophichote care seeda yannara
xissote macciishshamme leellishukkiinni keeshshitara dandiitanno. Dombophicho fultanno boombe dombophichote carenni cufantanno yannara qiniiticho godowinke aliidi kifile aana daanni higanno woy uurrannokkiha xissote macciishshamme iillishanno.
Dombophichote care dhibbi saltote widira hattono qiniiticho qehonkenna badhenkera taraawate akatoomino noosi. Xissote macciishshamme qiwaate afidhino sagale saga`linummohu gedensaanni iibbabba saltote xissonni bandeemmo gede kaa`litanno.
Qara qara malaatta:-
• Qiwaate afidhino sagalla saga`lineemmo woyte sumuu yaa hooga
• Sagalete gedensaanni kalaqantanno bodirate macciishshamme
• Looqqi assanna tushshiishate qarra
• Dewee`lo
• Sagalete hasatto anje
• Bisu aana duummaadda malaatta hee`ra
• Goxanote yannara xissote macciishshamme leella
• Illete dani baqqala ikka
• Bisu gogi haanju baqqali widira soorrama
• Illennihu, gogunna shumate kuuli baqqala ikka
• Cilu kuuli soorrama
• Qiniiticho widoonni aliidi kifile qooxeessira kaajjitino xisso hee`ra
Dombophichote care gargadhinanni doogga
• Taaltino sagale saga`la
• Sagale saga`linanni yanna saga`linikkinni sa“a hooga
• Ikkado waa aga
• Bisu qelpheepho rahotenni ajisha hooga qara dooggaati.
Dombophichote care dhibbi xagicho
Dhibbunniti xissote macciishshamme luphiima ikkituro qiwaate afidhino sagalla saga`la aguranna xisso ga`labbissanno xagga adha yannate geeshsha xisso ga`labbi assitanno.
Mittu manchi tini malaatta leeltinosihura calla xagga adhasira albaanni dombophichote care buuxo assira hasiissannosi.
Xisso kaajjitanni suffuha ikkiro kayinni dombophichonnita care dadhe fushshira hasiissannota fayyimmate ogeeyye amaaltanno.
Dadha dandiinannikkiha ikkiro kayinni dhibbaho hasiisanno xagicho horonsiratenni carubba shiilsha dandiinanni; tini doogo kayinni baca dirra adhitannota fayyimmate sayinse mashalaqqubba leellishshanno.
Abbebech Maatewoos
Bakkalcho Maaja 7, 2014 M.D
