Sijaarunna Caate mannu heeshsho aana iillishshanno mitiimma dunqulli assine la`nannita di“ikkitino. Fayyimmate, miinjahonna hattono dagoomitte heeshshora lowo shettonna mitiimma kalaqqanno. Batinyu Caatenna Sijaara horonsi`ranno manni, kuri surrete baqqeenya uyitanno gede hedatenni Sijaara aganninna Caate itanni hedeweelcho araadaa`me lowo geeshsha shetanno.
Duucha wote Sijaaranna Caate horonsi`ranno mannira fayyimmate mitiimma iillitannonsa. Sijaaru giddosi heedhanno Niikootiine /nicotine/ yinanni Asiidenni kainohunni, Shombu Naqarsa, wodanu dhibbanna surrete dillaawa kalaqanno. Caate abbitanno qarrino, sagalete hasatto ajisha, hinkote iillanno qarraatinna sijaarunninte gede surrete dilleessaati. Kuri mitiimma mimmitu aana lexxitanni hadhuro, hedate dandoo aana, giddoydinna gobbaydi mannimma aana shetto kalaqatenni qarru aana tugganno.
Caatenna Sijaaru miinju aanano luphiima mitiimma kalaqanno. Togo yinanni woyte Caatenna Sijaara hidhate fushshinanni womaashshi miinju wolqa woffi assanno. Korkaatuno, araado amaddanno daafira barru baala horonsi`rate fushshinanni woxi luphiima ikkanno. Konne calla ikkikkinni caate itanno manni seeda yanna looso tire sammi yee ofolle calla saysanno. Konninni kainohunni, looso loose abbanno gumi hanqata ikkanno.
Sijaarunna caate dagoommitte heeshsho giddo iillishshanno shettono illachinshanni hajooti. Sijaarunni fulanno bushu foolinni kainohunni, wolu manni wiliishshanno manni mulira shiqqi yaatenni xeerti`ra doodhanno. Foolu bowa calla ikkikkinni, foolu eiro aganni noohura iillanno qarri agannokkihurano iillannohuraati. Caate itanno mannino umo agadha hoogiro doofaarannohura duuchu manni togoo manni ledo hosano ikko mitteenni saga`late nafa dibaxanno. Konninni kainohunni, dagoomu mereero hee`ranonsa ayirrinyi shotanni ha`ranno. Konnira, dagoomu mereero heedhanno mittimmara bolbolu kalaqamanno.
Sijaarunna Caatete lasenni dagganno mitiimma co`o hunate dandiinannikki daafira badhera qolate woy addintanni ajishate malu hasiisanno. Mite mite xiinxallo leellishshanno garinni, umihunni rosunna seejjo hasiissanno. Rosunnino ikko dagoomittete xaadooshshinni mannaho kuri bunshere, fayyimmate aana abbitanno mitiimmubba daafira dagate mereero huwanyo kalaqa hasiissanno. Togo assatenni mannu laooshshe woyyeessa dandiinanni. Wole wodanchinammora hasiissannoti malu hedo kayinni, Sijaarahonna Caatete ikkitannoti woxu fulo wole diinaggera hossanno gede assate.
Qoleno, Caate itate yine afolline hunnannita seeda yanna latishshu loosira hosiisate. Hattono, araado hawate loosu yanna hunannokki garinni boohaarsiisannorenna hagiirsiisannore la”ate. Kuriuura mannu huwanyo gotti assate qoodi, rosu uurrinshuwaha, amma`note annuwaha, hattono gobbate geerriha ikkino gedeeti xiinxallo qummi assitannohu.
Wole, malu hedooti yine shiqinshanniti seeranna wodho fushshate. Xaa yannara dagoomitte battalara sijaara angannikki gede seerunna wodho hasiissanno yite adhitano gobbuwa batinye afantanno. Gobbansaranna manninsa aana loosa dandiitanno garinni wodho fushshite loosu aanano hosiissino. Fakkana gobbuwa giddonni Chayna, Jarmane,
Iraane, Israeele, Nayjeeryunna Ugaanda lawishshaho kaysa dandiinanni. Kuri gobbuwa tenne qaafo adhitinnohu mannu mitteenni xaadannowa lawishshaho, sagaletenna bunu minnara, loosunna rosu minnaranna gambooshshu dargubbara agganno mannooti aggannokkire daaffannokki gedeeti.
Aleenni kayinsoonniti guma hedo, Caatenna Sijaaru fayyimmate, miinjahonna dagoomitte heeshshora abbitanno qarraatina konne busha rosicho hunate malu hedooti. Konni daafira, araadaa`matenni umo agadha danchate. Wolehono rosiisatenni so`rinoha qola, hawinohura kula qajeela doogooti.
Abbebech Maatiwoos
Bakkalcho Ella 30 , 2014 M.D
