‘’Maganye Yannate’’ yaannohu borreessaanchu Araarso Gerremewhu maxaafi tenne lamalara maassamanno.
Kaaliiqi kalqenkera wolootu kalaqammanni aliidiha asse kalaqinohu manchi beettooti. Baattonke aana kalaqantinoti babbaxxitino kalaqamu jiro duuchankawa baalunku manni taalo afi’rannotanna horonsi’rannota kayinni di-ikkitino.
‘’Maganye Yannate’’ yaannohu haaru borreessaanchu Araarso Gerremewhu maxaafi tenne lamalara Addis Ababaho Boole Qeneniisi hoteelera maassamannota borreessaanchu coyi’rino.
callate yaanno. Yanna meessita ikkitinokkiti manchi beetti hasi’ri gede aarano ho’larano dandaannokkiti Kaaliiqi uyinonketi jawa baraarshaati yaanno.
Borreessanchu kalaa Araarso Gerremew xaa yannara Sidaamu dagoomu qoqqowi mootimma womaashshunna miinju latishshi biiro sooreessa ikkanna mootimmate biilloonye amade dagateno soqqamanni; maxaaffano borreessanni hattono ayyaanaame soqqanshonni daga owaatanni afamanno.
Borreessaanchu Araarso ‘’Maganye Yannate’’ yaannohu haaru maxaafisinni kalaqamunni baalanko taalo ikkino garinni uyinoonniketa yanna mittu mittunku hiittoonni horonsi’nanni hee’noommo? Yannasi garunni horoonsi’rinohu heeshshosi giddo abbanno soorronna garunni horonsi’rinokkihu kayinni sewoote iillara dandaanni iillikkinni gatannota kayise manchi beetti yannasi garunni horonsi’ra hasiissannota amaalanno.
Jiro yaa noosihu nookkihura aara dandaannote. Yanna kayinni manchi beeti baalaho kalaqamunni taalo uyinoonnita ikkiturono duuchunku garunni horonsi’ranna dila’nanni. Lawishshahono duree’mitinonna wolaphite jawa deerra iillitino gobbuwara manninsa yannansa garunni horoonsidhe loossinonna xiinxallitino daafiraati. Lophitinokki gobbuwanna dagooma la’nummoro kayinni roore yannansa garunni horonsi’ra hoogansa kaiminni buximate giddo heedhanno; egennonsa, ogimmansanna yannansa doogi-male horonsidhino daafira yannoomitte hayono dihalashshitino.
Konnirano manchi beetti kalaqamunni mitte doyicho calla baattote aana hee’re sa’’anno heeshshosi yanna giddo Kaaliiqinni uyinoonnisita ‘’yanna’’ ikkito albaani borreessinohu ‘’Maganye Womaashshaho’’ yaanno maxaafisinni kayisinoha ‘’woxe’’si garunni horonsi’re sa’’annoha ikkiro uyinoonnisi maganye seekke amadino yaate yaanno maxaafu borreessaanchi.
Borreessaanchu baxxino garinni gobbankera rooru manni yannasi garunni horonsi’ra hoogatenna looso tire ofollatenni heeshshonsa woyyeessi’ra hoogate ikkito baattote aana noo halaale seekke xawisanno garinni maxaafisi giddo kayisinoha ikkanna baalunku dandaami garinni umosi layi’ratenni yannansa garunni horonsi’ra dandiitanno gede seejjanno.
‘’Maganye Yannate’’ woy ‘’አደራ ለሰዓቲቱ’’ yaannohu gobbaanni borreessaanchu konni albaanni ‘’Maganye Womaashshaho’’ woy ‘’አደራ ለዲናሯ’’ nna ‘’Massagaanchu Woshshattotenni’’ woy ‘’መሪ በጥሪ’’ yitanno maxaaffa borreesse nabbawaanote iillishinoha ikkanna albillichono manchi beetti heeshsho soorratenna woyyeessate dandiissitanno hedonni haammata maxaaffa borreessate mixo amadinota afate dandiinoonni.
Amsaalu Felleqe
