Addis Ababa: Hawaasi biinfillira qara ikkinoha Hawaasi Garba golaminosi qarrinni gatisate looso loonsanni hee’noonnita Hawaasi Quchumi La/Kantiiwi Tseggaye Tukehu xawisi.
Quchumi Kantiiwi Hawaasi biinfilli Hawaasi Garbaati; konne Garba seekkine amada hoongummoro Hawaasi biinfillesinna xa afi’rino su’ma afi’re di-sufanno yiino. Amadisiiseno xaa geeshsha Garbu eela assinanni investimente baxxitino qoropho assine egenninoonnikkita coy’re quchumunni fulanno ishineno lolahu noo garinni haa’re Garba eannota xawise garbu qooxeessira hee’ranno mannino sammi yine agurreenna hasi’ri gedella hee’ranno yiino.
K/Pirofeesere Tseggaye kunino gara ikkinokkihura Garba gatisatenna latisate mixo qixxeessine “Water fount development plane” gunde qoqqowu kaawinera shiqinshe hee’noommo; tenneno muli yanna giddo hananfeemmo yiino. Tini pirojekitteno Garbu milinni manna fafinse Garba agarino garinni Garbu eela mannu shalleetetenninna lekkatenni gangalatannonna gangalatanni daanno woyte horonsi’rannore afi’ranno; manaadda daddalu suuqqa Garbu qooxeessira heedhanno gede xawise, waa daaha hasi’rannohurano Garbunni bande loosate looso qorophino garinni wole gobba jajjabba quchumma lawishsha adhatenni dizayeene gooffinota qummi assino.
Garbu sammi yine xa hee’noommo garinni hee’nummoro hee’re afannokkihura kuni loosi goofanno woyte day lolahi dayno garinni Garba eannokki gede mannu loosino kofono loonseenna lolahu xiimbiiwami gedensaanni sa”anno gede assine Garbanke baotenni agarate looso illacha tunge loonsannita buuxisino. Quchuminkeno turiziime goshooshanno garinni loonsanni hee’noommo yiino.
Addisu Adoola
