Addis Ababa: Hawaasi Quchumi investimentete noosi injo lowota ikkitinota Hawaasi quchu Lek/Kantiiwi k/Pirofeesere Tseggaye Tukehu xawisi. K/Pirofeesere Bakkalcho gaazeexi ledo noosi keeshshonni quchumma investimente goshoosha hoogguro badhe higge ba’anno hewisamaano quchummano ikka didandiitannono yiino.
Hawaasi Quchumino hala’ladonna Sidaamu Qoqqowira Qara Quchuma ikkasinnino sae; kalqete istiraateejike quchumaati yiino Kantiiwi; konni kaiminnino quchumu gashshooti gede konni albaanni investimentete noonke qarrubba maati? Yaannoha bande fushshine bayicho adhite latissukkinni huxxite keeshshitino dureeyye baatto latisa hoogginiro baatto anga’ne dikeeshshitanno yine affino gunde latissukkinni keeshshitino dureeyye anganni baatto haa’ne Baattote Baanke higganno gede assinoommono yiino.
Ledoteno K/Pirofeesere Tseggaye, quchumma investimente goshoosha hoogguro dilophitanno yee, tennera quchumu gashshooti investimentete ikkitanno baatto qixxeesse quchumaho ikkado investimente assitara dandiitanno dureeyyera baatto saysate looso loonsanni hee’noonnita xawise qarqaru/qoqqowu lophitanni noo dureeyyeno irkisate quchumu gashshooti kaajje loosanni nooota buuxisino.
Hawaasi quchumi biinfilli giddo qara ikkinohu Hawaasi Garbira golamino qarra gatisate seekkine amada hoongummoro Hawaasi xa afi’rino su’ma afi’re disufannono yiino. Konni kaiminnino Garba golaminosi qarrinni gatisate mixo qixxeessine qoqqowu kaawinera shiqinshe hee’noommo yiino.
Daatono ikko Hawaasi baadiyyete olluubbara hawadi yannara xaddanno qarrubbaranna safote latishshi aana quchumu gashshooti maa hedino yitanno xa’morano dawaranni; quchumu lame dana amade mereeri quchummanna quchumu giddo ikke hee’renni quchumu afi’rannore afi’rikki keeshshinota xawise; tenne olluubba pilaanete giddora eessinikkinni hasiisanno safote latishsha iillisha dandiinannikkihura balanxe pilaanete giddora eessate xiinxallo gunde muli yanna loosu giddora e’neemmono yiino. Amadisiiseno hawadi yannara quchumu qara qara dooggara lolahu iillishanno qarrubbara jajjabba doogga pilaanete qarri noose gede kayse; tenne taashshate looso hananfe hee’noommono yiino.
Addisu Adoola
