Addis Ababa:- Itophiyu baalinke afiinninna wodaninni adhinankera hasiissannokkiti baalinke naaxxineemmota ikkase xaphoomu ministerichi Dr Abiy Ahmedihu xawisi. Itophiyu ayyirrinyiseranna wolaphosera co`o yekkeerantannokki gobba ikkase baalunku huwatara hasiisannotano buuxisino.
Xaphoomu ministerichi Abiy; “Itophiyu Lamala” qixxaawo jaaloomimmate gudumaalira leelle hanafisiisi yannara Itophiyu mittu mittunku qoqqowira, zoonetenna woradaho batinye afoo coyidhanno daga calla ikkikkinni Itophiyu mittimmanni fiixoonsinohu maala`lisanno budi, dhaggenna jirote bue noonsa dagati.
Mittu Itophiyunnihu woleho irko ikka hoogiro callichu uurreenna wo`ma eltosi leelittannokkita buuxisiisinohu xaphoomu ministerchi; Itophiyunniha ikkate elto xabbe leeltannohu mittimmatenni gamba yineemmo woyitenna mittu wolu ledo roduuwimmankenni kaajjinummorooti yino.
Itophiyu lamala qixxaawo mittu mittunku qoqqowi giddo nooti shiilote batinye, laalchunni noonke laalchimma, budinke, donuwankenna baalante qoqqowubbara noota xaadooshshenke leellishanno daafira Itophiya banxeemmo qansootira calla ikkikkinni Itophiya affukkinni gibbinoserirano dancha rosicho afi`nanniha ikkasi egensiisino.
Baalunku manni Baxillaanchimmate gudumaalira leellatenni Itophiya egennamatenninna Itophiya uddi’ratenni ayyirrinyese wirro qolle egentinorirano egentinnokkirirano leellinsheemmo lamala ikka noositano huwachishino.
Itophiyu yaa daraarote gede biiffannonna wolaphotenna ayyirrinyisera yekkeerantannokki gobba ikkase xawisinohu xaphoomu ministerchi Abiy; Itophiyu batinye ayyimma giddo xabbe leelitanno, koliddu daga naaxxillenna wolaphote lawishshimma ikkase egensiisino. Baalinke afiininna wodaninkenni adhinankera hasiissannokkite yiino.
Itophiya egennate hasatto noosihu baalu konne darga leellatenni baalinkeha bude, dhaggenna baalunku qoqqowi giddo afantanno jiro afatenni Itophiya jiroo`misate mittimmatenni loonseemmo yee woshshatto shiqishino.
Woganna turizimete minisitere dokiter Hiiruut Kaasawu ise widoonni, qixxaawo baalanti Itophiyu daga budensa, dhaggensanna invesitimentete doorshuwansa leellishshanowa ikkaa gede wo`naalshsha assinoonnita buuxisiisino.
Xaa geeshsha gotti yite fulate dandiitinokki budubba, dhaggenna investimentete doorshi illacha afi`ranno gede assinoonnita buuxisiisse, Itophiyu lamala budenke, dhaggenkenna jironke eltonke leellishatennino sae mittimmatenninna rodiimmatenni ga`ara Itophiya loonsammoranna gotti assinammora doogo fiyaannoha ikkinota coydhino.
Mittimmatenni uurratenni gobbanke aga`ra hasiissannonke yanna aana hee`noommo yitinoti minisitercho, kunnirano baalunku Itophiyunniri mittimmatenni uurrate agarrannisi coy assanno gede woshshatto assitino.
Tenne qixxaawo hanafisiisate amanyooti aana qoqqowu gashshaano, ministerootu, diplomaatiikete maawari miillanna mangisitenniri jajjabba loosu massagaano leeltino. Qixxaawotenni afi`nanni eono gobbate giddo babbaxxino dargira qaensanni darantino qansoota wirro qole uurrisate hosannota xawinsoonni.
Itophiyu lamala qixxaawo Onkoleessa 10 – 16/2013M.D geeshsha keeshshannoha ikkanna baalu qoqqowinna lamente quchumma gashshaano beeqqitino.
Abebech Maatewoos
