Dirinsanni 30-40 mereero noo mannooti xagisaanote alba la’anno gede gadachishshannonsa woyi loosunni gattanno gede assitannonsa korkaatta mereerinni mitte badhete xissooti.
Konni diri giddo badhete xisso rosantinota kalqoomu mitiimma ikkasenni ledote bisu xe’nera reqecci assitanno korkaatta mereerinni mittete. Wolu yaachishanno coyi batinye daga heeshshonsa dirinni ajayi ajeenna mitte higge badhete dhibbinni amadamansaati. Ikkollana badhete dhibba gargadhateno ikko xisso macciishshantanno woyte rahotenni hurate dandiisannoha mini giddi xagisi’ra lede hee’nanni hayyo taashsha mitte lamala giddo hursitannota ikkiturono xisso agannate geeshsha keeshshituro kayinni ayirritaranna addi addi fayyimmate qarri gumano ikkara dandaanno.
Badhete dhibbira reqecci assitanno korkaatta
• Unuunu darsha
• Hedeweelcho xunchu gurdama
• Xunchu goshooshama woyi darsha
• Diskete gawajjama
• Gawajjama (uwa woyi hiiqqamme)
• Godowuyi hee’ra
• Dirunni jawoo’ma
• Luphiima bisu qelpheepho
• Mannimmate gunte loosa hooga
• Sigaara wiliishsha
• Mulu care woyi madira
• Yaaddo, surrete bedeedamanna xullo fulate.
Badhete dhibba leddanno korkaatta
• Ragiweelo uduunnicho kayisa (haawiittote, hiixante, anganna lekka bedeende kayisa)
• Ayirrinore kayisa
• Hedeweelchonna injiitinokki millimmo assa
• Seeda yanna uurra woyi ofolla
• Seeda yanna fooliishsho nookkiha oofa
• Ofollinanni woyte hallo ukkine ofollate
Badhete dhibbi heerasi leellishshanno malaatta
• Xunchu xisso
• Badhe qasate macciishshamme
• Xisso lekka iillitinoha ikkiro
• Heeshshi yinanni woyte, uduunnicho kayinsanni woyte,uurrinanninna qaanfanni woyte xisso macciishshama
• Haawiine gonxanni woyte xisso woyyaawate.
Qiddist Gezaheny
Dotteessa 28/2013
