Amate otootto iltanni heedho. Ama mito danchu akatiha wole kayinni hattonni amandannikki amali nooha iltanno.
Gobbano hattonni otoottosenni gobbatenna dagoomaho eltannore danchu akati noonsa qansoota kalaqqannonte gede mitu mitu kayinni amale bushu; hunote uurrinohu; ayeerano higannokkihu kakkachuno hee’ranno.
Madi’rino yine qubbicho murre hunnannikkinte gede amano duuchanka amalisi garinni amaddeeti lossitannohu. Amalesi dandiite ledosi heedhanno. Busha amale aguranno gede rosiisatenna seejjatenni taashshate duuchanka woyte daafurtanno. Geedhimmate yannarano ikkiro lawashshi yite diagurtanno; daafurise hegereho.
Ama oosose amali dancha ikkanno gede daafurteenna mitu higanno; mitu kayini busha amalesi adhe lophanno; maatete heeshsho booreesanno; gobbate keereno hattonni; su’misino busha ikkino gede ka’’anni hee’ranno.
Amate shetto bacate. Kalaqamunnino mannu kalaqino assootinnino shettanni heedhanno. Olu yannara lowonta gawajjantannoti amate.
Kalaqamunni moolle ubbanno woyteno; heeshsho muxxe ikkitanno yannarano hattonni duuchunkurinni shetannori amuwaho.
Day qarra baala duqqitannoti amate. Umisenni xaadannoseri noo gedeenni hee’reennanni oososenni daannosenna iillannoserino hattonni shetisannohu iseeti. Xa noohu gobbanke akati leellishannohuno konneeti.
Cancishaanchu HWHT kakkachimmanni gobbankera Aliyye qooxeessira kaino olinni gobba qasantino. Miinjise gawajjamino. Qansoota raafatunni shinoonni; qaaqquullunni kayse bututu geerri geeshsha wolqatenni gadachinshe seyaantoonni.
Heedhanno qaensanni darante shettote giddo uwansanni manni anga la’e heedhannore ikkitino.
Ooso rosu battalansara hossannokki gede gadachantino. Kuni duuchu ikinohu gobbate aana kalaqamino qarrinniiti.
Olu korkaatinni gawajjantinori duuchunku dagoomu bissa ikkiturono amuwu geeshsha gawajjaminohu kayinni dino.
Oosose sayisse olaho uyidhinoti amate; heedhanno qaesenni darante hodhitu yannarano qaaqquulle bayidhe shettinoti amate. Kunino ikka hoogeenna gadachinshe seyaatatenni shollinshoonnitino amate.
Ikkollana qarru duuchu xaadisero duuchankare dandiite mhunaano maarotenni sa’ino.
Gabbano amatena gawajjitinosere, mulqitinosere, shollishshinosere, diigginosere baala sayisse wolu diinira diuytino; duqqitella amadde no. Budinkennino koma amadantenni mimmitoho gatona yinanniha ikkinohuraati.
Konne budenke xaa yannara gobbankera kalaqamino qarra tidhate horonsi’nammora hasiisanno.
Gobboomitte amaalammete ba’rerano gobbankera hundinni rumuxxe daynoha mimmitu ledo sumuu yaa hoogate qarranna koffeenya; mimmito giwatenna xiiwate; laooshshe hunatenni mittimmanke kaajjinsheemmoha ikkitanno.
Shama darcho amande mimmitu ledo araaramme sumuu yaate harinsho rosama noosi. Bi’re birqiiqi dhagge kayinsanni sasenna shoole ilamara albaanni reytinori ledo duumbara hinge yekkeerammammonkunni lubbote noori ledo hasaambe qarranke tidhine sumuu yaa noonke.
Konni garinni ikkirooti qarrubbanke rumushshunni buqqinse huna dandiinannihu. Noonketi mitticho gobbaati; gosatenni babbaxxinummorono daganke kayinni mittete.
Itophiya mittimmatenninna ayirrinyese agarsiinse sufisa dandiinannihu qansootu gobboomitte hajubbanni sumuu yaa dandiiturooti. Gobbanke mitte ikkiturooti.
Mitte jawa gobba giddo agurranna mitte maate giddo nafa mitt ugari hedo diheedhanno.
Heedhanno yineno diagarranni. Ikkinohurano sumuu assitannonke hedo aana sumuu yaatenni; hedote babbadamooshshe kalaqqanno hajubba aanano mimmitu ledo hasaambenna cincatenni sa’ne mitticho gobbanke aana mittimmatenni hee’no.
Konnirano duuchankare dandiinenna cincine sa’’a amuwuwiinni rosa noonke. Amuwu aana iillitanno gawajjonna shetto ajishanna gargara dandiineemmohu hattono mittimmanke kaajjisha dandiineemmohu gobbankera dhaggetenni kaphunni kullanni dudumbe fincinoonniri aana koma amadatenni di-ikkino.
hasaambe, amaalamme sumuu yine mittimmanke kaajjishi’ra dandiinummoro callaati.
Bakkalcho Badheessa 1, 2014 M.D
