Addis Ababa:- Itophiyaho harinsanni amaalete hasaawi qinaawanno gede meentu jawa qeechansa fula noonsata Itophiyu Meentu Federeeshine Pirezidaante Askaale Lemmiti dhaansa dhaantino.
Federeeshinete Pirezidaantitte Askaale Lemmiti Itophiyu Pireesete Uurrinshara xawissino garinni; meentu gobboomu deerrinni kalaqamanno keeru booreessammera balaxxe gawajjo iillitannori insaati.
Ikkinohura, gobbate wolambinatinna mittimma kaajjate hattono hegersino keeri daanno gede jawu qeechi noonsahura gobboomu amaale qinaabbanno gede kaajjado looso loosa noonsa.
Badooshshenna sumuu yaa hoogate qarra tirate iilla dandiinannihu gamba yine hasaawatenniiti.
Meentu konne huwatinoro, gobboomu hasaawira baqqi yine beeqqaano ikkinummoro gobbate gede horaameeyye ikkineemmo yitino.
Keeru hoogiro balaxxe gawajjo iillitannohu meentohooti yitinoti Baabba Askaale; gobbate keerunna sumuu yaa heedhuro ayiinni balanxe ninke horaameeyye ikkineemmo.
Konnira, meentu keere ikkitino gobboomu millimillo aana jawa qeechansa fula noonsa yitino.
Gobbate keere agarsiisate assinanni wo`naalsha irkisannokkihunna hasi`rannokkihu dino yee ammaneemma yitinoti Pirezidaantitte; albillicho harinsannitera gobboomu amaale battalara gobboomu summiimmewa iillate jawu qeechi noonsata huwatte baalunku Itophiyu qansooti beeqqaano ikka noonsa yitino.
Amaalete anna meessi hedo calla harisa ikkikinni, wolu hedo macciishshateno qixxaawa noote; harinsho qinaabbanno gedeno ninkwiinni hasiisannoha qeehanke fula noonke yite sokkase sayissino.
Gobbate gede amaalamanna hasaawa meento jawa gede horaameeyye assitanno daafira konne huwante Gobbomu Amaalete Komishiine uurritara lallawu aana worroonni hedo aana assinoonni hasaawira Federeeshiine hedose uytinota xawisse; Komishiinerete qummeessa assini woyte Federeeshineno kaajjado beeqqo assitanni keeshshitinotanna gumano wo`mu wodaninni adhitinota coydhino.
Gobbate keeri aleenni mayno nookki daafira, gutu sumiimme kalaqate mootimma adhitino qaafo irkinse ninkewiinni hasiisanno qeechanke fulate qixxaanbe hee`nommo yitinoti Pirezidaantitte; albillichono komishiinete ledo halamme federeeshinete tantano horoonsi`ne meentu kaajjado beeqqo assano gede huwanyo kalaqate looso loonsannita kultino.
Itophiyu giddo baandeerunni kayse babbaxitino gobboomu hajo aana sumimme dikalanqoonni yitinoti Pirezidaantitte, qara ikkitino gobbate hajo aana sumimme kalaqate harinshora Ffedereshine qeechase fultannota xawissino.
Itophiyu Meentu Federeeshiine gobbate deerrinni hattono olluu geeshsha tantano noota qumi assitinloti Baabba Askaale; gobbate tiia agarsiisate assinoonni sharronni Federeeshiine miillase bobbaasse assitinoha dancha looso qoleno albillichote gobboomu hasaawirano lede qeechansa fulanno yitino.
Amaalete hasaawi aana noo tantano horoonsi`ne, meentu kaajjado beeqqo assanno gede qixxaawo assinoonnitano ledde egensiisino.
Abrahaam Saamueel
Bakkalcho Badheessa 1, 2014 M.D
