126 diri albaanni afi’noonni Adiwu qeelle daafira duuchare kullanni keeshshinoonni. Adiwa kayinsanni woyte jawaata Itophiyu qarru barri ooso techoo gede dagatenna dagoomu babbadooshshi amadinsakkinni mittimmate ayyaaninni gobbayidinni dayino diina worbimmatenni saalfachishshe qoltino qeelleeti.
Tenne qeelle Itophiyunnita calla ikkitukkinni wo’mante Afrikunna koliddu daga wolaphote malaate assine dhaggete amandoonni. Batinye gobba rosu amanyootinsa giddo amadde ilama affanno gede assitanni noota addi addi mashalaqqe kultanno. Ikkollana sa’u shoole dirra albaanni noo dhagge giwanno gashshootinni ninke qeellete annuwi Adiwu qeelle shota gede assine la’neemmo gedenna qeellete guma la’neemmokki gede assine keeshshinoonninke. Tenne dirra giddo Itophiyu gobbate gede sufate akatise xa’mote giddo e’e keeshshinota batinyootu sumuu yitanno hajooti.
Dokter Abiy Ahimedihu xaphoomu ministrchimma biilloonyira daye haa’rino gobba wolambinatisenna dagase mittimma diigamate dano aana noota muli yannanni qeelle leellinshoommo ayimmate ola harinsi xeertinyi xawise leellishanno. Korkaatuno Itophiyu ha’risino oli cancishaano HWHT ledo calla ikkikkinni wole widoonni gobbate diinna ikkitino gobbayidi wolquwa ledo ikkinota huwata dandiinoonni.
Lawishshaho; gobba sase tonne dirrara gashshite keeshshitinori xaa yannara cancishaanote yine bandoonniri HWHT gaamo Itophiya diigate hasatto noonsa gobbayidi diinna ledo halante kalaqqino olinni lowo kakkalo baantoonni. Xa xaaddinonke ayimmate danora korkaata ikkitinori tini cancishaano gaamo gashshite keeshshitu yannara daga mimmitinsa aana koffi yitanno gede, mittu wole allaggichimmatenni la’’anno gedenna dagate mereero diigamate wixa wixatenni akkimalu qarri kalaqamanno gede illachishshe loossanni keeshshitino.
Konninnino batinye keeraano qansooti lubbantino. Bisu xe’nenna jajju gawajjono iillitino. Ikkollana mannunna jajju aana gawajjo iillito ikkinnina gobba diigate sokkonsa xaano wo’mitara didandiitino. Adhinoonni qaafonnino techo ikkitubba taaltanni nooha ikkirono yaaddo ka’ino yaa di ikkino. Xaano Itophiyunna dagase aana olu lallawa lallawatenni qorowantinokkiri cancishaano HWHT
gobbate aana batinye gawajjo iillishatenna dhaggese kolishshiishate Affaarete qoqqowira mite mite qooxeessubba aana wirro gano iillishshanni afantanno. konninnino xaano batinyu qansooti dartetenna rewote aamantanna la’nanni hee’noommo.
Togoo qarrubba kalaqantanno woyte la’’a rosantinota ikkiturono qarrubba goofimarchu yannara gumulanteenna mittimmasi jawaattino Itophiyi kalaqameenna la’’a hasidhanno qansooti babbaxxitino doogonni sharro suffino. Kuni Adiwunni adhinoommohu mittimmate ayyaaninna buqqeete jawaante diigante ba’anno yinoonni Itophiyi mittimmase agadhite keeshshitanno gede assate kaa’linonke.
Gobba gobbate gede sufisiisate loonsoonni loossanna borreessantino gumma Itophiya diigamatenni gatissinotanna albillitteno qarranke tidhineemmo doogo assine adhatenni batinye itophiyu daga hexxotenni wo’mitino. Adiwu qeelle mageeshsha horonsi’nummo calla ikkikkinni xa noo mitiimmubba tidhine albillitte ma assa hasiissannonke yitanno gobboomu hajubbanke aana xawo ikkino garinni hasaawate qixxaawo assinanni hee’noommo. Konni baalu gumi kayinni baaluri albaanni Adiwunnihu mittimmate ayyaani balaxe daasinna qarra dandaate widoonni buqqeete qixxaawonke jawaattinota ikkaseeti.
Xaphoomunni techo gobbanke qasse amaddinori batinye mitiimmubba no; qarru batinyino akkimaleho. Tenne yannara cancishaano HWHTnni iillinonna iillanni noo gobboomu qarrinke giddo luphi yee leellannohu Adiwunni kalaqamino qeellete xawaabbi gede tenne yannanni noo diinna qeelle Itophiya reekkisate harinsho aana afamankeeti. Konnira konne gobboomu qarranke albi annuwanke gede hayyotenna qorophotenni amadanke kaa’litinonke ikkinnina digawajjitinonke. Roorenkanni annuwu egennonna mittimmate ayyaani techoo qeellenkera safo tuge sainona qarrubbanke sa’neemmo buusa, qeellete xawishsha assi’nammora hasiisanno.
Togo yinanni woyte aantete xaadannonke qarriranna ayimmanke xiibbanno mitiimmara anga uynummokkinni Adiwunni ragi’noommoha mittimmate ayyaana duuchunku woyti massago assi’nammora hasiisanno.
Bakkalcho Ammajje 24, 2014
