Abbebech Maatewoos
Qolleete godo`le yaamamtenni afantinoti budu ispoorte, ispoortete dani giddo mitte ikkitanna godo`lete garino batinye widoonni gannu godo`le ledo lawisamanno.
Qolleete godo`le assinannihu hojjasi mitte meetire ikkano qaccesira bokko afi’rino gannu dulla horonsi’ratenni kaajjadu haqqichinni quxame loosantannota qunqumashsho kaase lawanno qunquma balete widira ganatenninna bale eesatenniiti.
Qolleete godo`le assinanihu arri aganna (Birru agani) hanafi yananni kaayse arri aganna gooffa geeshshaati.
Tenne godo`le baalunku diri deeri giddo afamanno manni dirrunni taaltannosiri (darawonsa) ledo gaamo kalaqqanni godo`litanno. Godo`lete xawino lekkate kaase godo`linanni xawo lawanno. Mitte qollete gaamo mitte godo`lera 7-10 geeshsha iillanno annu annunkunni godo`laasine godo’lete bokko amadde dirantanno. Gaamote miillano
qeeddaano kolbitaano hattonno eote agaraano yaamante ba`xitanno. Godo`le hanaffannohu mereeri xawunni ikkanna kaase baattote aana gongo’mishatenni woy bubbete aana ganatenni e`o kiirsiisa dandiinanni.
Xawunniha e`o lamunku widoonni xawu qacce xuruuri aana qaafotenni bikkateninna siqqo uurrisatenni woy darcho leelano garinni woratenni bandanni.
Qollee godo`linanni qunqumi kaajjadonna ayirrannoha ikkasinni godo`lete gannanni yannara mannunnita guunte gawajjannokki gede godo`le lowo qorophonni godo’linanni. Tenne qorophora yinanni gede ikkiro godo`lete gaamo miilla uurrinshu amanyoote lowo geeshsha agadhitara hasiisanonsa. Miilla uurrinshu amanyooti gobbaanni ikkitanno woyte gaamote miilla ‘’Injokki” yaatenni garunni baaychonsa amadde godo`litanno gede assitanno.
Godo`lete yanna lamunku widoonni sumuu yinoonni murantino yanna giddo assinanni. Qelaasincho badantannohu lamenti
gaamo sumuu yitino murantino yanna giddo xadaancho gaamonni roortinno e`o eessatenniiti.
Qelamaancho gaamo qelaano gaamora gaamote miilla mereerinni mitto godo`laasincho uyte obba woy fuda sammosi
iima fincatenni “Agishsho ikki; harricho ikki” yitanni shorritannosi. Batinye yannara qelamaasinete gaamo miilla qeelaanote gaamo miilllara qacifatate saayiisse uytannohu e`ote agaranchooti.
Bakkalcho Sadaasa 28/ 2014
