Abrahaam Saamueel
Afiriku Boowe xintinohu Itophiyaho. Tenne Afiriku boowera dirrate gedensoonni wirro beeqqaancho ikka dandiino; Itophiyu. Tenne heewora umi gaamora gaamantinoti Itophiyu lekkate kaase gaamo (Waaliyootu) qixxaawonsa hanafate balaxxe Kaameeruuni Yawunde buubbinoti qaangannite. Ispoortete millimillo assitanni noota Itophiyu Lekkate kaase Federeeshine egensiisino.
Afiriku Lekkate kaase Boowe Arfaasa 1/2014 M.D hanaffannohura beeqqaancho ikkitinohu Itophiyu Lekkate kaase gaamo, heewote lame lamala gatte heedheenna boowe qixxeessitino gobba Kaameeruuni hadhinohu diilallote gade rosse millimillo assitanni kaajjite qixxaabbanni keeshshitaraati. Gaamo fooliishidhannowa Kaameeruunni Yawunde iillituta gobbate miidiy, aliidi massagaanonni hattono Itophiyunniti horophillu doogo loosaasine lede dukkisante dhaggeefantanni garini haa’noonninsata Itophiyu Lekkate Kaase Federeeshine tuqu xaadooshshira xawissino. Boode fooliishsho gedensaanni qajeelshaanchu Wubetu Abaatehunni massagantannori Itophiyu Lekkate Kaase gaamo shota millimillo assitanni heewote woy godo`lete barri geeshsha millimillo sufannoha ikkanno.
Sa`u lamalara jeefote Kaameeruuni buubbinori Waaliyootu, Itophiyu Lekkate Kaase Federeeshine geegiissiteenna hadhinoti qaangannite. Geegote Amuraati aana aliidi mootummate biilto dancha halchonsa gaamote saayissino. IFDR Pirezidaantite SahileWorq Zawudeti bilibilunni saayissino sokkanni “tenne heewora beeqqaano ikkanke umi yannanke di-ikkitino yitine woffi yitino mixonni hanaffinoonte yee eeggo yeemma`ne; Boowe kaaysate mitte mittente gaamo kaayyo babbaxxitinota ikkiturono heewisammeemmo woyte kayinni illacha assine ka`neemmohu gotti assineeti. Luphiima guma abbateeti; Booweno kaaysate mixi`ne ka”a noonke. Gotti assitine mixidhiniro qeelate noo`ne ayyaani lexxannota buuxa hasiissa`none” yitino.
IFDR Woganna Ispoortete Ministerchi Qajeeli Merdaasihu isi widoonni, gaamo qeellete ayyaaninni buuwa noonsa yiino. Wole gaamo kaajjadda ikkitinohura didandiineemmo yaatenni waajjitinikkinni murci`rino wodaninni “qeelleemmo,
dandiineemmo” yitine heewote widira ea hasiissanno`ne. Baxxinohunni, umi dooycho godo`le qara ikkitinohura, gaamo massukkinni mixo gumaame assate kaajjite millimillo loosa hasiissannota sokka saaysino.
Gaamo gobbankeha dancha amanyootenna bude hattono balchooma hattenne gobbara leellisha noonsatano qummi assinohu IFDR Woganna Ispoortete Ministeere Deetichi Ambaasaadderi Mesfiini Cherinnetiho.
Hasaawisi aana “heewote hasiissanno yannanna woxe gobbate xaadinose tiiu gaadinna seera ayirrisiisate korkaatinni hasi`nanni gede ki`ne kaa`la hoongirono, tini gaamo base iillitanno wooyte gobbate mittimma xawissanno qixxaawo kaajjadu garinni loosatenni, Itophiyu bareendenna kaajjille udidhine kaajjadda heewisamaano ikkitine hakkinnino sa`ine ispoortete dipoloomaase fajjitanno doogonni seera agadhitine Itophiya Afirikahonna Kalqete dagoomira leellisha noo`ne” yiino.
Bakkalcho Sadaasa 21 / 2014
