Abbebech Maatewoos
Quqquxamatenni agarrannihunna Itophiyu beeraawe gaamo waaliyu settu diri gedensaanni beeqqitannoti 2022 Afiriku boowe godo`le seeddara woy gattara dandiitanno kaayyo noota babbaxxino duduwi fulanni keeshshino. Kaameeruuni qixxeessitannoti tini 33ki Afiriku boowe galchimi Afiriki gobba qixxaawose yannantenni jeefisa hoogase korkaatinni heewo gattara woy Afiriku gobbaanni harinsara dandiinannita yaaddo galtinota qaangannite
Tenne qixxaawote goshooshama ledo amadisiisantino yaaddo gatisate KAFnna FIFA halantanni afantanno. Tenne yanna giddo kayinni heewo gattara woy seeddara dandiitanno yitannoti wole haaro yaaddo kalaqantino. Iseno kooviid-19 taraawo haaro sircho ikkinohu “Omikrooni” yaamamino sirchi hala`lasi ledo amadisiisaminoha ikkanna Afiriku boowe konninni kainohunni gattanno gede babbaxxitino bissa xiiwo assitanni afantanno.
KAF sa`u lamalara qaalu saysaanchi widoonni heewo amandoonni yanna giddo Kaameeruunete hadhanno gede xawisirono; tenne hajo aana murroonni gumulo aana di-iillinoonni. Muli yanna giddo fultanni afantanno mashalaqqubba leellishshanno garinnino KAF heewote kaayyo lainohunni FIFA nna galchimi gobbuwa kilawe maamari ledo hasaawa hanafino. KAF galchimi gobbuwa kilawe maamari ledo tenne hajo aana amaalamannohuno maamarunna kilawe taraawote yaaddo korkaata assatenni godo`laano fushshate hasatto noonsakkita xawisanni noota harunseeti.
Hajo lainohunni halaalaancho ikkitino odoote bue mereerinni mitto ikkinohu Ferensayennihu RMS ispoorte sa`u lamalara faajje assitino mashalaqqe KAF Afiriku boowe gattinota waajjuullu aganinni Arfaasu aganira faajje assara dandaannota buuxisiisino.
Afiriku boowe yannara haammata qara dodo`laanonsa hooggannohura albano heewote siwunokki laooshshi noonsari galchimi gobbuwa kilawenna qajeelsaano Afiriku boowe gattanno gede woy seeddanno gede KAF aana xiiwo assate haaro taraawo ledote wolqa kalaqqinonsa. Baxxinohunnino Ingilizete kilawe Ingiliizete haaro taraawo hala`ladunni tuqqanni noota harunse godo`laanonsa Afiriku boowera hadhanno woyteno ikko higganno woyte bande keeshshinshanniwa seeda yannara hooga hasidhannokkita xawisatenni heewo gattanno gede xiiwo assitanni afantanno.
Galchimi gobbuwa kilawe maawari KAF nna FIFAho borreessitino borronni KAF Afiriku boowe yannara taraawo lainohunni adhannoti qorophote qaafo ammansiissannota ikka hoogasenni godo`laanonsa fushshate hasatto noonsakkita xawissino. Kunni ledoteno taraawote yaaddo Arfaasu aganira godo`laanote fa`nantannota kilawe soorirate furcho mitiinsara dandaannota buuxisatenni konnirano Afiriku boowe konne qarra iibbabbishshannota xawisse heewo gattanno gede woy seeddanno gede assate sharrantanni afantanno.
Afirikunnita baayra ispoortete bare ikkitinota Afiriku boowe galchimi Afiriku gobbara harinsara dandiinannikkita sa`u lamalanni kayse hala`ladunni kullanni hee`noonita buunxoonni. Kaameeruuni gobbate jawa heewora assitanni noo qixxaawo goshooshamanna heewote hasiissanno balaxote qixxaawo wonsha hooga konnira korkaata assine worroonniha ikkanna; Afiriku boowe Kaameeruunete assinannikkita ikkituro KAF tenne heewo Kuwaatarete assate balaxote qixxawo hanafannota kullanni keeshshinoonni.
2022 Afiriku boowe qarunni harinsara hendoonnihu 2020 Ella aganira ikkirono hatte yannara Kaameeruunete nooti diilallote gade injiinnoha ikka hoogasinni Arfaasu aganira harinsanni gede KAF lamu dirira albaanni gumulasi buunxoonni. Sa“i dirirano kooviidi-19 taraawo yaaddo ledo amadisiisame heewo layinki meeshsho seeddara dandiitannota xawinsoonni.
Kaameeruuni qixxaawo keenate KAFnni tantanantino komite gobba heewo harisate assitanni noo qixxaawonna heewo harisate gattino yanna taaltinokkita xawinsoonniha ikkanna FIFA tenne hajo harunsatenna qixxaawo rakkanno gede assate Kaameeruunete yannate geeshshi biiro fa’ninota buunxoonni.
Kaameeruuni tenne Afiriku boowe qixxeessate xa`mo shiqishshu yannara heewote beeqqitanno gobbuwa kiiro 16 ikkiturono xa kayinni heewote beeqqitanno gobbuwa kiiro lexxitino. Kunino Kaameeruuni xawo halashshidhanno gede gadachinose. Beeqaano gobbuwa kiiro 16 ikkitino yannarano fanote godo`le harissanno xawi ijaarsha lainohunni babbaxxitino huluullo ka`anni keeshshitinota qaanganni.
Bakkalcho Sadaasa 14 / 2014
