Barri Arrishsho ruqani, hashshi qorri hoolinsakkinni mulla lekkansanni dubbohonna doogimaroho dodanshote millimmo loossannori, lekkansa madi’ranna mundaa uurrissannonsakkiri, xissonsanni garunni hurtukkinni gobbansa baandeeri ayirrinyira jeefote geeshsha sharrantannori, xissonsa egemmite heewo qeelletenni jeefisatenni ayirrinyisera duuchanka woyte uurritanno Atleetooti gobba ‘’Itophiya’’ yaamantanno.
Waajjo hunkeensa dunatenni calla ikkikkinni ubbanni ka’anni, horonsanni aleenni gobbansa ayirrinyira balaxo uyte baandeerisera doddanno Ispooretete maate worbooti shiima di ikkitino. Itophiyunniri muxxe Atleetoota yinanniri heewo qeelatenni calla di ikkino. Gobbansa hasidhunsa yanna baalantenni dhukansa, yannansanna woxensa aatenni hale ikkansa loosunni leellishate balaxannonsahu dino. Techono kuri muxxe Atleetooti gobbansa diigate diinu dayi woyte woxensa calla ikkikkinni lubbonsa marartannokkita, gobbansanni sainoti wole hajo heedhara dandiitannokkita loosunni
leellishshino.
Kalqete daga albaanni Olompikete xawo Itophiyu afanshanna ayirrinye afidhanno gede assitino Ispoortete dani mereerinni Olompikete Ispoorte balaxote bayicho amaddanno. Tenne Ispoortenni gobbate borreessantino qeelle mereerinni Olompiketenni Lame Culkunna Mitto Birru meedaaliya; kalqoomu Atleetiksete Shaampiyooninni kayinni Onte Culku, Lame Birrunna Lame Camote xaphoomunni 13 Meedaaliyi Sase Atleetootinni calla borreessantino. Kuri jannooti kayinni Kumu sooreessi Hayle Gebre sillaasehu , Gezaheny Abarrihunna Feyyisa Leellisaati.
Atleetiksete lawishsha assine kullanniri kuri Atleetooti xa kayinni gobbansa ayirrinyira wirro olu xawo fultino. IFEDR xaphoomu ministrchi dokter Abiy Ahimedihu olu xawo gaadasinna gobbasi baxannohu baalu ‘’Olu xawo xaando’’ yino woshshatto kuri muxxe Itophiyu qarru barri ooso adhitino. Keeraancho sharrote xawo qeelle badooshshensaatina gobbansa aana dayno diina gargadhate kuri muxxe Atleetooti lubbonsa marartukkinni kakkalate olu xawo gaaddino. Gobbate huluullamaanchinna hiittenne hajora balaxotenni afamannohu Atleet Hayle Gebre Sillaasehu Itophiyu mittimma aana mitiimma ikkanni noo akata afinokkihu gede ikke sa’’ate didandiino. Konni alba olunni qaensanni darantinore kaa’looshshu hasiisannonsa qansootira woxunninna uduunnunni irkisanni keeshshinohu Atleetichu xaphoomu ministrchi woshshatto adhe gargarooshshu olanto ledo olu xawo gaadate qixxaawinota buuxisinkunni barrubba kiirantino.
Olompikete Lamu Culku, kalqoomu Atleetiksete Shaampiyooninni Shoole Culku, Lame Birrunna Mitto Camote meedaaliya batinye kalqoomu rikerde, boowenna batinyu handaari ayirrinye afi’ra dandiinohu Hayle; gobba hasidhusi yannara gaadate umosi fajjinoha ikkasi egensiisatenni kalqoomu tuqu xaadooshshira hasaawamanni afamanno.
Worbu Atleetichi Hayle albisaano harunse Ispoortete giddora ei yannara iso lainori batinyootu harunsite gobbate ayirrinyira uurritino. Techono beronte gede gobbate ayirrinyira doddannore ikkikkinni ayirrinyisera olu xawo gaaddannore ikkansa hattono hale ikkansa buuxissinori shiima kiiro noonsaredi ikkitino. Sidni Olimpikenna Edimenteni kalqoomu Atleetikse shaampiyooninni Maaratoonetenni Culku Meedaaliya adhinohu Atleet Gezaheny Abarrihu gobboomu woshshatto adhino wole Atleetichaati.Riyo Olompikera Olompiketenni gobbasira Birru Meedaaliya abbinohunna Deegu Kalqoomu Shaampiyooni yannara Camote meedaaliya adhinohu wedellichunna soorrote albaanni noo amanyoote xawoho giwasi xawisinohu Atleet Feyyisa Leellisa gobbate woshshatto adhate yanna di adhinosi.
Gobba gobbate gede sufate kaayyose danote aana ubbanna ayirrisiissinonsa gobba ayirrisse olu xawo fultino Atleetooti mereerinni mittu Komaander Maarqoos Gennetiho. Babbaxxino kalqoomu shaampiyooninni gummaamo ikka dandiinohunna Itophiyu Atleetooti maamari Pirezidaante ikkinohu Atleet Maarqoosi jaallasi gede gaadate mudhe kaino.
ItophiyuAtleetooti afantanno seedu xeertinyinni ikkikkinni haranchu xeertinyinni gummaame ikkitinoti Atleet Faantu Megesono gobbasera hasiissu handaari baalunkunni hale ikkitinori mereerinni afantannota buuxissino.
Bakkalcho Bocaasa 23/ 2014
