Gobbate ka’no hembeelammenna canco gargaratenna jaddaaleeyye bande fushshate hattono giddo heedhe olsiissannonna qasiissannore fille fushshate wiinamu yanna lallambinkunni layinki lamala kiirantino. Wiinamu yanna lallawa mitte gobbara gobbate ka”anno canco ga’labbisate tunganniho.
Wiinamu lallawi fajjannonna fajjannokkiri no. konni kaiminni duumo xuruura sa’’a dandiinannikkita lallawu wodho umisenni buuxissanno.
Ga’labbote bissa seera ayirrisiissaranna agartara ikkinniina qaafo adhitara fajjitanno wodho wiinamu lallawi giddo dino. Tenne borro giddo kayisa hasi’reemmori lame bissaati. Umihu ga’labbote bissa agarsiissanno bissa ammanamooshshenna huluullo ikklanna;layinkihu ga’labbote bissa uduunne lawisiisse uddi’ratenni awaawurtanno bissaati. Mereerohono mite mite awaawuraano bissara dallaalootu afantanno.
aleenni kayisummori sasu qaru qaru killachi xa wiinamu lallawi yanna giddo ikkara dandaannoreetinna mitowano ikke leellinoreeti. Ga’labbote bissa mite mite duuchanka ikkikkinni sa’e sa’e tenne yanna giddo uminsa horo shorritannori di hooggino. Mine qorqorate qoossonsa horonsidhe hashsha gaa’lite qansoota qarrissannonna alba gibbonna giwansho noonsaro tenne dagonni rabbisate millissannori di hoogganno. Togoori xaano TPLF gashshitino yanna bu’lukki assite kayissannote.
Alba HWHT gashshooti yannara wiinamu lallawa lallanbannihu koma fulatenna rabbisate,gibbannoha seeru hunda hosiisse qorichishatenna mooraanote furcho fanateeti. Xa kayinni gobba gatisate ikkino daafira qorophanna dagatenni ammanama hasiissanno.
Wole widoonni xaa yannara minna qorqorranni afi’nanni hee’noonni olantote yuniformenna olu uduunni tenne dagonni gashshootu soyinoha lawatenni hallanyootu qansoota gadachate lawisiissanno uduunne ikkinota buuxa dandiinanni. Mitootuno alba olu miilla ikkite badooshshu uduunne mine maaxidhinori tenne dago horonsi’rate dodantannori noota wodanchanna buuxa di bushshanno.
Sayikkihunni dallaalootu mereeroho e’e assitanno harinshooti. Dallaalootu lame coye huntanno. Umihunni hunaanop woxunni maaxxe flute xooqqanno gedenna jaddo loonsanni uduunne xooqissanno gede furcho fantanno. Tenne yannara xooqqinowa heedhe gobba hunate looso loossanno. Konne ikkinohura ille fushshine dallaaloota agara hasiissanno.
Wole widoonnino dallaalootu uminsa eo shorritanni seerimale olu uduunne hunote qixxaawinoha hidhitanninna hirsiissanna la’nanni. Kuni gobba cancishatenni ajinoha dikkannona hunaanote qote taashshine qaafo adhinannire ikka hasiissanno.
Xaphoomunni cancu mooranchoho furcho fananno yinanninte gede tenne Itophiyu biqante noo yannara bagu aana bakakka yinannihu gede assitanno hallanyootano ikkito mitu mitu ga’labbote bissa xaano hattenne tiyyi’nanni TPLF qaagiissitannota ikkase huwata hasiissanno. Iso calla ikkikkinni Itophiyu daga xaa yannara soorrote mangiste irkisse gobba gatisate dodantanni no yannara karsi burduuqu TPLF soqqamaano daga caacceessatenni Wiinamu lallawa dago assidhe cancishshe gashshoote gimbanni gede assitannoreetina mangiste illacha tugge qorqorsha assa hasiissanno.
Gobba gamete aana afantanno. Furga’annohu barru di xeertotena giddo heedhe gashshootu irkisaano labbe soqqantanno bissanni maganu agaronke. Wiinamu yanna dago assidhe dugganno dugalootinni maganu agaronke!
Bakkalcho Bocaasa 9 / 2014
