Qiddist Gezaheny
Tini hee’noommo yanna gobbankera lame jajjabba qoorre (tsoomme) kaaliiqa huuccattotenni qaanganni yannaati. Isliminnu amma’no harunsaano ayirrissanno jawiidiha ikkino Remedaaninna Ortodoksete amma’no harunsaanono amaddanno jawiidi /Abiyi / qooretenna huuccattote yanna giddo afammeemmo.
Te yannara amma’note harunsaano qoorte huucci’ratenninna mimmito kaa’latenni sayissanno gede amanyootu hajajannoha ikkasinni amma’note harunsaano togoo assoote gumultanna huwantanni. Qoorre huuccatto kaaliiqira iillishi’nanni again giddo, soodo shoomanna barri hurbaate codhine hashshira suuqi’rate ikkinokkita amma’note massagaano kultanna harunsineemmo. Kunino ninke maalanke qoorsine buxane irkinsammora hasiisannoha ikkinota buuxisateeti. Konne assannohu me’’eho?
Baxxino garinni qoorre tidhinanni barra yaano Ortodoksete amma’no harunsaanowa mootichu yesuusi ka’ote ayyaani barra nna Isliminnu amma’nowano ramadaani qoorre tidhinanni barra korkaata assatenni ammanaano buxane itissanna, hayikkissanna kallinoha uddisiissanna la’’a rosantinota ikkitanni daggino.
Insa callano ikkitukkinni mite mite mootimmate bissano ayyaannate yannara anga ajjinore hasiisannore ; saada, gide, woxe wkl kaa’latennitenni xaa yannara rosantanni daggino. Tenne mereero mitte heda hasiissannoti kayinni hudi’noha itisanna afi’noonnire beeha hasiissannohu ayyaannate yannara calla ikka mayira hasiissu? kuri ayyaanu barra gamba assine doogimaroho itinsannire hattono mine minenka marre kaa’lo assinannire wole yannara mageeshsha qaanganni ikka? mittore ittukkinni hosse galtannoha ikkanno; miteekkite afidhuro barrunni mitte higge hude hoo’litannore afidharano dandiitanno. Hoogguro kayinni qatume. Qaru coyilla isi mayiraati ayyaanna calla agarre hoogginorenna hudidhinore kaa’la hasiissuhu? ; Tenne xa’mora babbaxxitino dawaro heedha’nera dandiitanno.
Itophiyu daga batinye danchummanniha umise budenna balchooma afidhino daga ikkitanna olliichu ledo gamba yine afi’nire beeqqe ita, baxillunna mittimmatenni kaa’lamme hee’ra,kallinoha uddisiisanna W.K.L mitto xawishshansaati.
Ikkollana ‘’wodaninni wi’lineenna hindiiddo di gibbanno’’ yaanno maammashi gede danchumma hendeenna miitturi korkaata ikkannori hee’ranno ikkayya? Muxxe Itophiyu qansoota hundiakaakkankenna awurranke abbitino (rosiiissinonke)budinni wole dagarano lawishsha ikkinoommo kaa’lamatenna ayirrisamate ayimmankewa hingo!
Umo kaimu hedowa hingummoro xaa yannarano ikkiro konne kaa’lamatenna hudi’nohura afi’nire beeqqate rosichi roorenkanni leellannohu ayyaannate barra callaati. Ayyaanu barra hudidhinore itisa, kallitinore uddisiisa bunshe di afidhino. Mite mite mootimmate bissano ayyaana calla agarte faajje fulte mitoho saada gorra, gide aa, woxebeeha Dibushate. Kayinnilla kuri mannootira kaa’lo hasiissannohu konne barra callaati? Hattono barru kaa’lo calla assine agura ikkikkinni sufotenni tenne maate buximatenna mannu anga agadhatenni fushshate ayyaanaho fulte kaa’lo assituri gashshootu bissa sufote furcho fanturo woyyaawinoha ikkanno.
Dhagge ikkannorilla kayinni Ayyaana agarre onte kilo bulleenna Zayite beehate baca tuqu xaadooshshe woshshineenna buxane arrishshotenni qeqantanna la’’ate. Di konne callaati olla ollaaho ‘’buxichu buxicho filte soyi’’ yinoonni olluu soqqamaanchi onte kilo bulleeranna zayitera fiixasi,jaalasinna afi’rinoha doore sae sae do’nitte qishshino waasi gede buxichu buxicho ollole karsannote. Hakkone buxicho albaanni wore tuqu xaadooshshira hedo aanno gede assannohu nootano aliidi gashshaanchi huwata hasiissanno!
Dagoomuno ayyaanna agare calla ikkikkinni kuri anga ajjinore soodo itte barra ittukkinni hosse galtannore afi’ni hedeweelchonni shiimurinni kaa’la iimano uullano jawa waaga afidhinota huwante gobbanke budenna balchooma agura hoongiro danchaho. Albankeenni mootichu yesuusi kaote ayyaani daanni no; ayyaana agarre calla assinanni kaa’lo woyyeessa hasiissanno.
Hattono isliminnu amma’no harunsaanono tini Ramadaani qoorrete yannara amma’note amanyooti hajajannore qarrantinore kaa’latenna hudi’noha beeqqine itisate amanyoote wole yannarano sufa lubbote codhinanni qullaawa assoote ikkasi huwata danchate. Korkaatuno togoo kaa’lo tenne maatera wole yannarano hasiissannota ikkasenni.
Ayirrado Itophiyu qansoota ninkehu co’ichu budinkenna ayimmanke yannate ledo soorrantanni danansa soorritanni ba’’a hoogguro; mittimmatenna mimmito kaa’late hattono ayirrisamate budi ba’’a hoogiro , mittimmanke (kaa’lamanke) gobbate hajo aanano luphi yite leelturo ma lawanno’ne?
Suffuno irko assatenni hudidhino bissa towaanto! Gashshootu bissano taai taaita qyyaana agarte Qulxu’me amaddenna durishshe aatenni roore Qulxu’me amandanninna durinshanni hayyo aana illacha assito!
Dancha lamala!
Bakkalchoo Dotteessa 14/ 2013
