“Layinkita jifote duhano diadhineemmo’’
Qiddist Gezaheny
Baaluri aleenni wolaphonsara balaxo uytanno Itophiyu daga diinu daynsa yanna baalantenni jawu worbimmate ayyaaninni angansara nooha hiikkonne olu uduunnicho horonsi’ratenni diina uurranna ofolla ho’lite baragisse gobbansanni shorritinoti sharrotenna qeellete dhagge, techono gobba diigate qooxeessa amade jajja mulqirate dayno juntanna gobbaydi wolqa wo’naalsha mulla assite qolatenni wolaphonke agara angankera noo kaayyo ikkitinota huwachishshanno. Konni daafira wo’manti Itophiyu daga mittimmatenni ka’ne gaadatenni tenne dano gargadhatenni umonke gatisa hasiissannonke.
Juntu Woyyaane biilloonye amadde keeshshitino 27 dirra giddo gobbanke Yowolo gattukkinni moortinota ijaarrate Maashinna tirte adhitinno; buxane amuwi qorunni tire fushshi’rinota baalunku woxe ikkitino kofatto gumulante caabbicho uyte qarrunni fushshitannonke yine agarranna jifotenni mulqidhenna gobbaydi gobbuwara duu’nite wodaninsa gede gangalatansanni aleenni galagalte techo gobba diigatenna biilloonye amadde rossino doogonni mulqirate horonsidhanni afantanno.
Juntu massagino kuri jifote dirra giddo mulqirate injaannonsa gede Itophiyu daga babbadde mittu wolu aana diinna ikkitanno gede; halamanna mittimma ba’anno gede assite Itophiyunna Itophiyimmate macciishshamme daafurtanno gede assatenni aleenni qoossote xa’mo kayissannori aana iillishshanni keeshshitino jifonna rewo qaaga shigiggissannota ikkitanna Sidaamu daga jifote siqqonni higge higge gantinonsa.
Seerunnitanna bayriidi seerita tantanamate xa’mo kaysansanni calla keeraano Sidaamu daga reytino; ganantino; usurante shetto la’ino. Juntu wo’mante Itophiyu daga diina ikkasi xawo ikkitinohura Itophiyu daga mittimmatenni ka’enna sharrante aanansa qa’midhino deere hoo’lite wolaphotenna taalleenyunni keeru ayyere foo’la hanaffunkunni shiima dirra kiirantinoha ikkanna lophote caakko leella hanaffino.
Leellino taalleenyi, wolaphonna taalo horonsiraanchimma hexxo assatenni daganke sharrante abbitino soorro jireenyu alba qole qaafisanno gede Dimokraasete doogonni doorte biilloonye aansa daga juntu layinkimeeshsho massagansara hasidhannokkitanna massagganno mootimma uminsa doodhite wodhitinoha ikkasinni konni gobbaanni wolqatenni ‘’Ninke massangeemmo’’ yite dagganno wolqa adhitannokkiti ayrano xawoho.
Wole widoonni Juntu wirro Itophiya wolqatenni amadatenni wirro borojjimmatenni hidhakera wo’ma wolqasi horonsi’re amadanni afamanno. amaddino qooxeessubbarano konni alba assitannonte gede jifotenni guddanni xaaddunsa jiro
baala mulqidhanni Meqele hogophitanni afantanno. iillitu base baalantera assitannohu hunote assootinsa baalankawa gatannokkiha ikkasinni biilloonye amadde roorenkanni gadadissannonkekkinna mulqidhannonkekki gede wirro jifote gadadira di hirammeemmo yine baalunku gaadanna gargadha hasiissannonke.
Juntu biilloonyu yannara Sidaamu daga qoossonsa agarsiisi’rate assitino sharro ikkado dawaro afi’ra hasiissannase shaa, usurunna ganama xaphoomunni shigiggissanno jifo higge higge iillitinonsa. Konnira jifo batidhino roduuwinsa ledo ikkatenni sharrante afidhino wolaphonninna taalleenyinni xa’monsa seeru dawaro afidheenna xa gobbate hajo aana mudhitanni afantannoha ikkanna Juntu wirro biilloonye amade rosino doogonni gadadu duhano duhisiisasera fajjitannokki daafira
1. Xaaddinonketa gobba diigate woyi jifote gadadira hiramate jaddo garunni galchinammo geeshsha balaxote illachinke gobbate gaadira ikkanno gede;
2. Sharrantanno daga qotira uurrine sharramanna Juntu e’’ino qarqarinni fulannokki gede assine waamate dirunna fayyimmate akati fajjannosi baali gaadoho qixxaawinoha ikkanno gede;
3. Baxxino rosichi noo’neri olanto irkisate woraddate adawu borro minnara borreessantinanni gede;
4. Gaadoho hasiissanno Loojistikse luphiima ikkasenni mootimmate dhukinni calla dandiinannita di ikkitino. Konninni ledote olu noo qooxeessubbara darantino qansooti hee’ransanni iillinammonsara hasiisannohura luphi yino deerrinni jiro gamba assa hasiissanno. Konni daafira jiro noo’ne baali noo’erinni kayissine gargarooshshu olanto irkisanna darantinore kaa’la; konnirano uurrinsoonni komite loosonsa gumultanno yannara rakkino dawaro uytinanno gede;
5. Qoqqowu keeri ammansiisannoha ikke sufanno gede daga qinaabbe giddoydi keere agadhitanno gede; hasiissanno base baalantera doyte loossannori doorshunniri adawu wolqa rahotenni tantanantanno gedenna qachu roduuwu daga ledo noohu danchummate xaadooshshi kaajje sufanno gede hiikko garinnino keere huntanno millimmo assitannori giddoydinna gobbaydi soqqamaano heedhuro daga adawu wolqa ledo halamatenni seeru qaafo adhitanno gede yaatenni;
Sidaamu dagoomu qoqqowi mootimma woshshatto assitanno
Qeelle Itophiyu dagate!
Birra 23/2014 M.D
Hawaasa
Qooxeessakki Agadhi
Olu Base Gaadi
Olanto Irkisi!
Bakkalcho Birra 25, 2014 M.D
