Addisu Adoola
Addis Ababa: Gobba diigara dayno diina sammi yine dila’neemmo yaatenni mitu mitu Sidaamu Qoqqowi wedelli xawissu. Mitu mitu hedonsa Bakkalcho gaazeexira uytinori qoqqowu wedelli gobba gatisate hasiisannori baalunni qeechanke fullammora hasiissannono yitino.
Sidaamu Qoqqowi Hawaasi Quchumi teessaanchi Belayne Burqihu Bakkalcho Gaazeexira uyno hedonni, batinyu manni kaphu duduwinni hembeelamanna la’nanni hee’noommo. Tini kaphunni hembeelama digaraho; Korkaatuno mullawa daga kaphunni borqineenna daannori dino yiino.
Tennera ninke wedellu kaphu duduwinnino ikko addunni gobba diigantanna dila’neemmono yiinohu Wedellichu Belayneh, HWHT Amaarunna Affaarete qoqqowira mito mito qarqara e’e daga borqitanni noota xawise, sa’neno Addis Ababu geeshsha dangeemmo yitanni daga hembeelsitannore agawate ninke wedellu gobbate gargartote olanto qotira uurrineemmo yiino.
Sidaamu daga aguri techo; bero Xaaliyaanu gobba horrara day barra nafa dihembeelantino yiinohu Wedellichu, gobba horrara dayno Xaaliyaana nafa ejjeetto qendessisse fushshitino gede qaage; ninkeno insa faale harunsine konne gobba diigara dayno diininni gobba gatisate addi addi raginni qeechanke fulatenni gobba gatinseemmo yiino.
Wolu hedosi uynonkehu Malga Woradi Wojigiru Ollii teessaanchi Wedellichu Sixooti Buxxehu, gobbate daggino soorro adha gibbe gobbate gede jawu shiimira yaaddo kalaqatenni keere ho’litanni noo juntu gaamonni mundeenke dunne miqichinkenni huxxine gobbanke gatinseemmo yiino.
Tini gaamo 27 dirira fugge keeshshitino Sidaamu daga xa’mo soorrote gashshooti day soodo hiiginotano qaaginohu Wedellichu Sixoot, tenne soorronna qansootu hexxo gibbe darga baala doytanni noota tenne gaamo hasiisanno ragi baalunni jawu shiimi fulle gobbanke keere buuxisiinsammora hasiisanno yiino.
Hawaasi Quchumi teessanchi Wedellichu Negaashshi Yaaqoowihu isi widoonni, Aliyye urde lamu qoqqowi callu urdeeti yaannohu daga mittimmatenni uurritannokki gede assate asooteeti yiino.
Tigirete daga wole Itophiyu dagantenni gede roduuwa dagankeetino yiinohu Wedellichu Negaashshi, juntu gobbankera golino qarra sa”ate Itophiyu daga baala mittimma uurrinammora hasiisanno. Konnirano wedellu gobbanke agaratenna mittimma sufisiisate noonke qeechi lowoho yiinohu wedellichu Negaashshi, wedellu qarqarinsa adawa agarsiisate mittimma uurra noonsata qummeessino. Saeno wedellu gobbanke haja aana gargarto karsamatennino ikko wolu mootimma lallabbanno lallawira baqqinaatunni beeqqatenni gobbanke xaaddinose morommenni agarate qeechanke fullammora hasiissanno yiino.
Xaphoomunni wedellu konne qarra sa”ate ninketi giddoodi mittimma qara hajo ikkitinota coydhe mittimmalla heedhuro sa’nannikkiti dino yitino.
Bakkalcho Birra 25, 2014 M.D
