Addis Ababa:- Birra 24, 2013 M.Diro Aliyye hajajo olanto kaampe aana loonsoonni jaddo gobba diigate faajjete lallambe qaafo adhinoonni barra ikkinohura Itophiyu dhagete borro aana borreessama hasiissannota Mootimmate Komunikeeshinete Owaante Ministire egensiisino.
Aliyye hajajo gargartote olanto aana assinoonni jaddo umikki diro “Dihaweemmo; anino Itophiyu olantooti” yaanno uminni qaange honsanni gede gumulloonnita lainohunni Mootummate komunikeeshine Owaante Minisitire odeessaanote xawishsha uytino.
Mootimmate kominikeeshine Owaante Ministire Deeti Kalaa Kabbadi Deesiisihu xawishsha aanni yiinonte gede, Birra 24, 2013 M.Diro Aliyye hajajo kaampe aana assinoonni jaddo muxxe ikkitinoti bareedda, olu massagaanonna olantote miilla lubbantino. Gobbate miinja ikkinohu olu uduunnino mooramino; horramino.
Cancishaanchu hedo gede, Itophiyu hakkonne barra billaalanno barra ikkinohura barru Itophiyu dagara baxxino baychi noosiho; baxxino garinni qaange honseemmoho yiino. Loonsoonni jaddo Itophiya diigate xawoho lallambe qaafo adhinoonni barra ikkinohura, tenne yannara Itophiyu dhagete borro aana borreessama noosi yiino. Barraho kalaqaminoricho qaanganni albilichote noonke sharrora daganna gargartote olanto kakkaayisate konne barra ayirrinse hosa horo uytanno yiino.
‹Dihaweemmo; anino Itophiyu olantooti” yaannohu massagote qaali doo`ramino korkaati xa hee`noommo yannara baalunku olanto ikkinoommota kultanno yanna ikkitinohuraati yiinohu Ministerichu, olanto irkisatenni calla ikkikkinni baalunku olanto ikkinohura gobbasi agadha hasiissanno yannaati. Giddoydinna gobbaydinni Itophiyu lophannota gibbino diinna Itophiya ajishate loossannokki looso nookkihura baalunku qansooti olanto ikka hoogiro gobbanke diinu anganni fushshate qarrisannota kulino.
Ministerichu xawishshi garinni, hakkonne barra qaange hosate qaru illachi gargarote olanto dhagge habbannokkita jawa kakkalo baattino barraati; konnira, olantote afamishshanna ayirrinye aateeti. Daga olantote gede ikkite gobbansa qaccenna danna mittimmate halante baalante doogonni ayii diininni agartanno gede qaagiishsha aateeti.
27 dirira mootimmate biiloonyi noosihu cancishaanchu HWHT gaamo 27 diri gedensaanni dagate sharro dandaa hooge biiloonyunni shorrame Meqele maaxami gedensaanni polotikunni, miinjunninna, olu xaggarronna sharre loosanni keeshshino. Hattono, daga dagate ledo amma`no amma`note ledo gibbo kalaqanni keeshshe Birra 24, 2013 M.diro Itophiya diigatenna billaalisate olanto qasino. Gargartote olanto badheenni qasa giddoydinna gobbaydi diinira fojo reqecci assatenni Itophiya diigate loonsoonni looso ikkinota xawisino.
Tenne lamalara cancishaano gaamo haammata ikkinoha olu uduunnenna olanto qafandoonniha ikknohura hexxo mudhe noota kulinohu Ministerchu, rosaminokki garinni daga gamba asse Wollo Dase widoonni mure eate kaajjado sharro assanni leellanno. Konne galchate gargartote olanto, qoqqowubbanniti baxxtino wolqanna Amaaru faanno ledo jawa looso loonsanni hee`noonni. Cancishaanchu HWHT qaaqquulle, jajjabbanna amma`note bissa baala olaho bobbaase noohura daga olantote qoteho uurrite konne diinira ikkkitanno tantano tantane cancishaanote gaamo diigate looso loosa hasiissanno yiino.
Saiha 27 diro shaanninna horranni keeshshinohu baalanka ikkinohura xaano biiloonyeho dayro hattenne gawajjo sufanno daafira konne huwante tini hajo mitte dagara calla tunge aggurranniha ikkinokkita huwata hasiissannota kulino.
Bakkalcho Birra 25, 2014 M.D
