Qiddist Gezaheny
Addis Ababunni:– ‘’Galagalle barshete duhano diduqqineemmo’’ yaatenni sidaamu dagoomu qoqqowu mootimma yannate hajo aana uytino xawishshinni egensiissino.
Qoqqowu gashshooti Pirezidaantichi Kalaa Desta Ledamohu Odeessaanote uyno xawishshi leellishanno garinni; Juntu biilloonyu aana keeshshino 27 dirra giddo gobbanke Yowolo gattukkinni moorinoha, Ijaarrate maashinna tire adhinoha, buxane amuwi qorinsanni tire fushshi’rinoha baalunku woxe ikkitino kofatto gumulante caabbicho aatenni qarrunni fushshitannonke yine agadhinanna barshetenni mulqite gobbaydi gobbuwara duu’nite wodaninsa gede gangalatatenni aleenni techo galagalte gobba diigatenna gadachite biilloonye amadatenni rossino doogonni mulqirate horonsidhanni afantanno.
Juntu massagino hattenne barshete dirra giddo mulqi’rate injaannonsa gede Itophiyu daga babbadd e mittu wolu aana diinna ikkitanno gede; halamanna mittimma ba’anno gede asse Itophiyanna Itophiyimma laaffanno gede assansanni aleenni qoossote xa’mo kayssannori aana iillishanni keeshshitino gawajjonna shetto qaagate shigiggissannota ikkitanna Sidaamu daga barshete siqqonsanni higge higge gantino yaatenni qummi assitino.
Ledotennino xawishshu; seerunnitanna bayriidi seerinni tantanamate xa’mo kaysansanni calla keeraano Sidaamu ilama reytino, ganantino; hattono usurante shetto la’ino. Juntu wo’mante Itophiyu daga diina ikkasi xawo ikkitino daafira Itophiyu daga mittimmatenni ka’enna sharrante aanansa qa’midhino deere hoo’lite wolaphotenna taalleenyunni foo’la hanaffunkunni shiima dirra kiirantinoha ikkanna lophote caakkono leella hanaffino yino.
Leellino taalleenya; wolaphonna taalo horonsiraanchimma hexxo assatenni daganke sharrante abbitino soorro jireenyu alba qole qaafisanno gede hasidhannokkitanna massagganno mootimma uminsa doodhite wodhitinota ikkasenni konni gobbaanni wolqatenni ‘’Ani massageemma’’ yite dagganno wolqa adhitannokkiti baalunkura xawoho yino xawishshu.
Wole widoonni Juntu wirro Itophiya wolqatenni amadatenni galagale borojjimmate hidhara noosi wolqa horonsi’re horranni afamanno yinohu xawishshu; amidino qooxeessubbara konni alba assannonte gede barshetenni gawajjanni afi’ri jiro baalantanni mulqe Meqele hogophanni afamannota qummi assino.
Juntu biilloonyu aana noo yannara Sdaamu daga qoossonsa agarsiisi’rate assitino sharrora subbino dawaro afi’ra hasiissannansa usura, shaanna gana xaphoomunni shigiggissanno barshe higge higge iillitinose.
Konninnino barshe batidhinonsa roduuwise ledo ikkatenni sharrante afidhino wolaphonninna taalleenyinni xa’monsa seeru dawaro afidheenna xaa yannara gobbate hajo aana murtanni afantannoha ikkanna; juntu galagale daye rosino doogonni gadadu duha duhisiisansara fajjitannokki daafira wolootu Itophiyu roduuwise ledo ikkatenni cancishaanote gaamo waamma gumulate loossannota egensiisino.
Bakkalcho Birra 25, 2014 M.D
