Abrahaam Saamueel
Addis Ababa:- Gobbaydi wolquwa konni albaannino Itophiya horratenna kadde gashshate addi addi yannara wo`naalsha assitino. Ixaaliyu Itophiya kadotenni gashshate assino wo`naalshi bareedda Itophiyu daga sharronni mixosi wo`mitukkinni shollinyunni qeelame fulino. Itophiyu gobba haammata gobbaydi wolquwa duucha yannara kadotenni gashshate assitinokki xiiwo dino. Itophiyu dhagge kultanno gara ikkiro xaa geeshsha gobbaydi waajjuullira Itophiyu gobba hirante di-egentino.
Sa`u yannara loosino so`ronni rossannokki gobbaydi wolquwa, xaano Itophiya diigatenna horrate HWHT kikki’lara suuqante Itophiya qassino. Konne loosonsa dhagge dihabbanno; waaga baatisiisannonsa.
HWHT gaamo Aliidi Ize hedeweelcho badheenni qasse gawajjo iillishsheenna olu hanafaminkunni mitto diro wo`mino. Itophiyu olanto konni Junti aana adhitino qaafonni reyhu reenna gattinori “Tenbeyi”
yinanni halallira xooqqe maaxantino. Itophiyu mootumma Tigirayete daga foole qo`litona yite ola uurrissurono Cancishaano kayinni tenne yanna kaayyote gede horoonsidhe kakka`u gedensaanni, Amaarunna Affaarete Qoqqowubba hedeweelcho qasino; Haammata daga shiino; qaensanni darantanno gede assino; miinja fiite hogobbe adhitino; woleno horo aannokki gede assite hiiqqaqite huntino.
Itophiyu daga olantote ledo halante mittimmatenni konne Cancishaancho hegerera higgannokki gede hunate addi addi kaa`lo assitanni basete geeshsha gaadde olantanni leeltanno. Itophiyu qeelanni no; Cancishaanote aana adhinanni hee`noonni qaafo kaajjadote. Ikkollana, Juntu tenne lamalara reynohu reenna gatino xinxiqi olanto gamba asse 12 diro ikkino qaaqqullenna jajjabba annuwa olaho dire baxxinohunni yorto dihoollannina ikkiteemmesiro Addis Ababa eate injitanoe yee hedinota jawa Wollo Dasenna Kombolchu widira shiqqi yee kaajjado ola fanino. Konni olira Itophiyu daga ikkitinokkiri gobbaydi qansooti HWHT kikki’lara e`e Wollotenna Kombolchao baaqqaano ikkitino.
IFDR Dagate Riqiwaano Amaalete mini 2013 M.diro Cancishaano gaamooti yee gumulo saaysinota HWHT wolqa gobbaydi wolquwa babbaxxitino doogonni faajetenni kaa`lo assitanni keeshshitu gedensaanni tene yannara uminsa e`e Itophiya qasate bobbakkino.
Xaphoomu Ministire Dr Abiy Ahimed yannate hajo aana aliidi mootummate loosu sooreeyyera uyno xawishshira coyranni yiinonte gede, Cancishaano gaamo kaa`litara Itophiyu qansoota Ikkitinokki wolqa Wollotenna Kombolchaho Olu xawira dirante reytino; Itophiya diigate gobbaydiri waajuullunna koliddu olu xawira olamate dirante beeqqaano ikkitinota buuxisino.
Wollotenna Kombolchaho olu xawira Itophiyu qansoota ikkitinokkiri beeqaano ikkite kakkalantinota kulinohu Xaphoomu Ministirichi Dr Abiy, Itophiyu dagano gargartote olantora assitino kaa`lo addintanni xaggeefantannita ikkiturono, Itophiyu qansoota ikkitinokkiri Itophiya qasate Juntu kikkillara maaxante olante reyaa Itophiyu mageeshshi geishsha looso loosinnoro xa`ma noonke yiino.
Bakkalcho Birra 25 / 2014
