Qiddist Gezaheny
Addis Abebunni:- xaa yannara quchumaho dagate hodhishshu owaante uytanno gongo’mishamaano qorqorate rosantino doogonni fulatenni Teknoloojetenni irkisamino looso gumulsitanni afantannota Addis Abebu Quchumi hodhishshu biiro egensiissu.
Addis Abebu quchumi hodhishshu biiro xaadooshshu hajubba dayirekterchi kalaa Aregaawi Maaruhu Itophiyu Pireesete uurrinshara xawisino garinni; quchumaho 11 kume 200 gongo’mishamaano heedhurono dagannita hodhishshu anje gatisa didandiinoonni. Konnirano qaru kaimi loosu harinsho qarraati. Konne qarra tirate biiro Teknoloojetenni irkisaminoha harunsotenna qorqorshu amanyoote gumulsitinnota sooreessu xawisino.
Konne qarra shotisate harunsote loosi garunni loosama hasiissannota coyi’rinohu kalaa Aregaawi; rosamino garinni loosantenni Teknoloojetenni irkisama hasiissanno. Konnirano harunsonna qorqorshu Teknoloojetenninna ikkado ogeeyyenni irkisama noosi. Xaa yannara Ambessa, Sheggerinna Irko uytanno baase GPSnni irkisante bobbaasate aana afantanno.
2014 bocu boci yannanni barru barrunkunni 2.9 Miliyoone daga dargunni darga hodhissinoha ikkirono mixonkenna xiinxallo leellishshannohu 3.2 daga hodhisate. 2012 nna 2013 Bejetete dirinni barru barrunkunni mereerimunni 2.7 Miliyoone daga hodhinsoommo. Harinshotenni Koode 1 gongo’mishamaano kiirotenni ajjanni daasenni noonke dhuki ajanni dayno yino dayirekterchu.
Wole widoonni 2013 bejetete dirinni quchumu gashshooti fushshino wodho garinni 500 irko uytanno gongo’mishamaano looso hanaffu yanna kawa dagate hodhishshi aana woyyaambe leeltinota qummi assino.
Xaa yannara quchumaho hodhishshunnihu seedu diri hee’rasi kaysannohu dayirekterchu; konnirano konnirano qarunni harunsotenna qorqorshu loosi ajanna noo dhuka co’o assine horonsi’ra hooga hattono Tiraafikete du’nama keeraancho ikka hooga qarunni kullannire ikkansa coyi’ranno. Ledoteno shiqishotenna hasattote widoonni mitiimma hee’rase huwachishinno. quchumaho heedhannori 70 anga xibbuunni ikkiatannori wedella ikkitanna tini daga loose dagrunni darga millisa hasidhannote; konnira hodhishshu hala’ladunni shiqa noosita xawisanno.
Addis Abebu hodhishshu biiro haaro tantanantuhu gedensaanni quchumu hodhishshu handaari safote latishshi woyyaambe, owaantete lifinxe, oofaanotenna gongo’mishamaanote ledo amadantinori tittirshu loossa gumulsa, quchumaho dooggate keeraanchimmanna du’nama woyyeessa, handaaraho qajeeltinota mannu wolqa tantananna massaga, keeraancho hodhishshu amanyoote diriirsanna dagoomaho sumuu yaannoha hodhishshu doorsha iillisha yitannota qara hedo amadde loossanni afantannota Biirotenni afi’noommo mashalaqqe kultanno.
Bakkalcho Birra 18 / 2014
