Addisu Adoola
Addis Ababa: Mittimma Sudaane duuchunku assootu atoomira beeqqitannokki gede agawase egensiissino. Agawuno reekkote harinsho massaganni noo gashshooti dargasi higa geeshsha sufannoho yitino.
Mittimma Sanyote barra Suudaanete hadhino finqille seerimalete yaatenni effidhinoha ikkanna qorqorshu hunda afantanno siwile massagaano rahotenninna mittuno balaxote akati nookkiha tidhantanno gede woxaratto shiqishshino.
Afiriku Mittimma Sudaanete kalaqantino politiku hembeelle tirate olantotenna siwile massagaano ledo hasaawate riqiwaano Suudaane sokkinotano xawissino. Suudaanete olanto gobbannita siwile massagaano dargansa qoltanno gede kalqete dagoomino xiiwo assanni afamannoha ikkanna Kalqete Baankeno Suudaanete uytanno kaa’lo hooltino buunxoonni.
Ameerikuno olanto siwilete gashshootira biilloonye qoltanno gede xiiwo kalaqate ledote miinju qaafo adhate heddanni noo gede xawissino. Albira Ameeriku finqillete korkaatinni Suudaanete uytara hedde noota Lamala Xibbe Miliyone Doolaare kaa’lo agabbino.
Suudaanete Qaru Quchumira Kaartuumi doogga, buussanna suuqqa cufanteenna daganniti xawu gimbe suffino. Bilbilunna interneetete owaante uurritino. Gobbate kaino gaance harunseno shiimunni Tonnu manni lubbamansa kulloonni.
Bakkalcho Birra 18 / 2014
