Mitte waardiiti yinanniti xuma Gaango mittu ollii giddo hedhannonka. Jaallaseno hinaassannosenkanni. Mitto barra waardiiti waa aggara laga dirritanni heedhe mittu Farashshi ledo doogote aana xaaddanno.
Farashshuno biinfillese dhagge assi’rannohura “keere nootta?” yee keere haa’rise. “Maganu maassamo! Ani keereholla. Ati keere nootto?” yitu iseno.
Farashshuno “Hiikka hadhanni nootta?” yee xa`mise. “Waa agate laga dirranni noomma” yitu. “Waardiiti`ya! Ay woyteno biinfillikkinni wodana ba”oommo. Ati lowo geeshsha xumate. Adhammoherano hasi’reemmo. Konni daafira annikkitanna amakki sircho kulie” yiise.
“Konne afate maayra hasi’ritto?” yite xa`mitannosi wote Farashshu qolannoti “Budinkenni mittu Farashshi adhara huucci’rinota ayimmase woy sirchose afa noosi.” Iseno “Ama`ya gobba gashshinohu gulufannoti tii“i xuma farashshooti.” yitusi.
“Annikkina” yee Farashshu xa`mosi sufi. Waardiitino “Rodoo`ya qeesichu gulfanno farashshooti. Amma`note minira marittoro hakko la`attose” yitusi. “Annikki hiikko noo`ya? annakkiwe yoommo” yaannose. Waardiitino “La`lama`ya kayinni olluu murrichi gulufannote, iseno lowo geeshsha xuma Farashshooti” yitu. “Hiissatae maaho ani diannakkilla xa`moommohe” yee Farashshu xa`me kaita annase ikkinohu mittu geedhinohunna loosu gabbaanni ikkino Harrichi day. Farashshuno waardiiti “Koye massitanni nootta?” yiise. Iseno maano diqoltino. “Qolissie, ate agarate yawo dinoeni?” yiise. Iseno affinokkiha labbe sammi yitu. Farashshuno “Kuni akkalu Harrichi ayti kawira daaye waadannonkehu? Yarinohunna geedhino harricho! Yii.
Iseno “Diafoommasi” yitu. Farashshuno “Hari kawiinni” yee tuntu`motenni ganisi. Harrichuno uulla uwinowa Farashshu wirro wirro hige kakkadannosi wote ree bai.
Harrichu reyara raanki`ranni hee`re togo yii “Mooticha`ya ikkummota laitto? Yii. Hakkinni maganuno Gaango “Ati annakki diayirrisootta” kunni daafira atino ila dandiitannokkita ikkatta oosono di-ilatta. Yee rumise yinanni.
Sokka:- Ooso rumo iillita`nekki gede ama`nenna anna`ne hattono jajjabba manna ayirrisse.
Abebech Maatewoos
Bakkalcho Wocawaaro 13, 2014 M.D Hamuse
