Manchi beetti jawa sokko noosi kalaqamaati. Coye suwisate, loosaminokkire loosatenna hedaminokkire hedate qixxaawinoha ikka mittu mittunkuwiinni agarranniho. Manchu saadatenni baxxannohu, manchu wolu manninni roorannohuno hedatenniiti. Manchi beetti hedosi lawanno. Laooshshesi halashshanno woyte isino hedosino hala`litanninna lexxitanni hadhanno. Shiimmaadda coyibbanni huxxamiro hakkonni giddo usuramaancho ikke hee`ranno.
Kalqe gotti assinohu qaru coy hedote. Hedo aayee woteno albaanni balaxxanno. Hasidhanno mancho hasidhu darga massagganno. Kalqeno massagantannohu hedotenniti. Konni daafira hedaasine ikka noonsa. Duuchunku barri mitto dikkino techo barri bero barrinni woyyanno. Ga`a kayinni techo barrinni…! Kalqe harinshote aana no. Hedo noosihu tenne harinsho massaganno. Hedo noosikkihu kayinni kalqete ledo hedaasinetenni massagamanno.
Batinyootinke kaayyo heddano massagaano ledo ikkikkinni massagantanno kalqe ledo hediweelo massagamate. Mittu massagaancho, honsu kayinni massagamaano woy harunsaanote. Batinyu manni kayinni massagamaano ikka nafa didandaanno. Dancha massagamaancho ikka umise aamamooshshe woy dandoo hasidhanno.
Kunnira kayinni hedo afi`rino mancho ikka gadachaho. Kalaqote loosira massagaancho hedote. Baattote aana noori manchu beetti loosino coy duuchunku badheenni daanno coyeti. Kunino hedo balaxxannota leellishanno.
Ikkinohurano barru hurbaate, ayyaanu uddanonna sagale calla hendanni ita, aga, biirote looso loosa, goxa, ka`a… konne calla gumullanni hee`ra wo`ma diassitanno; haaro hedonni mannimmate gadachono fula hasiissanno. Kuni kayinni hedo noosi massagaancho ikka dandaa hoogiro nafa dancha massagamaancho ikkate dandiisanno.
Bakkalcho Woxawaajje 27/ 2013 M.D
