Addis Ababa:- Sidaamu qoqqowira 2017/18 laalchu dirinni horonsi’nanniha bushshu harishsha loosidhe galtinorira shiqinshanni hee’noonnita Qoqqowu Irshunna Kalaqamu Jiro Latishshi Biiro egensiissu.
Biirote Layinki Sooreessinna Gibrinnu waaco handaari sooreessi kalaa Leggese Hankarso uyno xawishshinni; 2017/18 laalchu dirinni horonsi’nanniha 300 kume kuntaala bushshu harishsha shiqinshanni hee’noonni.
Xaa geeshshano 70 kume kuntaala Yuuriyanna Daapi harishsha badheessu irshi looso balanxe hananfanni qooxeessubbara afantannori loosidhe galtinorira shiqinshanni hee’noonnita xawisino.
Elto yuniyeene widoonni 121 tuqishshu mereershubbanni bushhsu harishsha loosidhe galtinorira iillinshoonnitano kulino.
Arri gorsu loosinni mitte hektaare baatto aana harisanno latishshira hasiisannosiha bushshu harishsha afi’ra dandiinota Hawaasi gaangaawi woradira loosi’re galinohu Gebre Besere coyi’rino.
Bushshu harishsha ikkadu garinni afi’rasinni badheessu yanna loosira baattosi qixxeessi’ranni noota xawisatenni.
Wolunku konni woradira loosi’re galinohu Beyyene Xaairo uyno hedonni bushshu harishsha yannatenni afi’rasinni badheessu irshi looso hanafinota kule; arri gorsinni lame hektaare baatto aana latisinore qunqumado shaananna barbare kaysatenni xaa yannara badheessu yanna irshu loosira qixxawanni afamannota kulino.
Gaazeexu Odeessaanchinni
Bakkalcho Badheessa 11, 2017 M.D
