Addis Ababa:- Mereeri Sidaami zoone Lokka Abbaayyu woradira baatto Baarzaafete haqqe buqqisatenni wolootta muronna wixunni diwate illachinshe loonsanni hee’noonnita Woradu gashshooti egensiisi.
Lokka Abbaayyu woradi qaru gashshaanchi Kalaa Zerhun Xilahun Itophiyu pireesete uurrinshara xawisino garinni; woradaho baatto babbaxxitino korkaattanni hafanfartannokkinna gawajjantannokki gede assate laayyote latishshinni latisate loonsanni dangoonni.
Konni ragaanni babbaxxitino wayillasote loossa gumullanni dangoonniha ikkanna; konni loosi ledo amadisiisame tayxe dirinni Baarzaafe gaadunni buqqisatenni basete badheessu loosinni Badalatenni diwate looso hananfoonnita xawisino.
Woradaho 600 hektaare ikkitanno baatto aaninni Baarzaafe buqqisate gaado baxxino garinni Baarzaafe hala’lite leellitanno olluubbara harinsanni hee’noonnitano egensiisino.
Qaru gashshaanchi xawishshi garinni; qooxeessu daga Baarzaafe buqqissino base seekkite hawuuratenni Badala hala’ladunni latissanni afantanno. Konni ragaannino gummaamu loosi loosamanni leellanno.
Tini yanna badheessu looso harinsannita ikkasenni baatto loonse qixxeessate hattono filamino wixa balanxe qixxeessate illachunni loonsanni hee’noonnitano qummeessino.
Badheessu yanna loosira baattote qixxaawo xaa yannara mixotenni 90% ale iilline hee’noonnita kule; loosidhe galtino daga dooramino wixa yannatenni adhitanni horonsidhanno gede assinanni hee’noonnita huwachishino.
Woradaho sagalete wowe buuxisiisatenna meessaneete dandaateno baxxino garinni qoqqowu deerrinni qixxeessinoonni kakkaooshshe (Initiatives) loosu aana hosiinsannita qummeessinohu kalaa Zerhun; kunino, “Kaa’lamaanchimmatenni fulle laashshaanchimmate widira” yaanno adawarshinni “Kaa’lammo Inisheetiive” yine loosu giddora e’noonnita coyi’rino.
Kuri loossa hananfi yannara mite mite qooxeessubbara seeftineettete horaameeyyenna wolqa ajjinori baatto heedheennansanni loosidhukkinni mitiimmate reqeccaabbinore mitiimmate giddonni fushshate baca loossa gumulloonnita kulino.
Kuri bissa woloottu anga la’annokki gede assa hasiissanno yee; woradaho noo qarra woradu umisinni tidha hasiissanno yaannohunni baxxino garinni goyirete yannara calla woradu dhukinni noota fano baatto aana Gaashenna wolootta laalchubbano laashshatenni haammata kuntaala laalcho afi’ratenni qarrubba shotisa dandiinoonnita coyi’rino.
Tini badheessu yanna ikkasenni noo baatto hafanfartukkinni horonsi’ne lende laashsha dandiiniro woradaho calla ikkikkinni woleno hedeweelcho qarrantara dandiitanno bissarano iilla dandiineemmota la’noommo yiino.
Amsaalu Felleqe
Bakkalcho Badheessa 4, 2017 M.D
