Addis Ababa:- Qoqqowoho Hayxu laalchimma mitte hektaarenni 36 kuntaala afi’rate addi illachinni latinsanni hee’noonnita Sidaamu Qoqqowi Irshunna Kalaqamu Jiro Latishshi Biiro egensiissu.
Biirote Sooreessi kalaa Memmiru Moke xawisino garinni; qoqqowoho goyirete yanna loosinni 106 kume hektaare baatto latisatenni 3.2 miliyoone kuntaala laalcho afi’rate hende loonsanni hee’noonni.
Konni giddonni sagaletanna Biiru Hayxi nooha ikkanna; Hayxu maatete jireenya buuxisiisate ragaanni jawa qeecha amadannoha ikkasinni 36 kume hektaare baatto aana addi illachinni laashshinanni hee’noonni yiino.
Hayxe konni albaanni mitte hektaarenni 30 kuntaala laalcho afi’nanniwiinni tayxe dirinni hektaaretenni 36 kuntaala laalcho afi’nanni yine hendannita qummeessinohu kalaa Memmiru; goyirete latishshinni woyyaawino laalcho afi’nannita laalchu balaxote herreego leellishshannota xawisino.
Biirote sooreessi xawishshi garinni; qoqqowoho goyirete yanna loosinni 98 kume hektaare baatto latinsanniwiinni xaa yannara 106 kume hektaare iillisha dandiinoonni.
Sai 2012M.D diru giddo latinsanni baatto hala’linyi 118 kume hektaare ikkanna xaa yannara kayinni 172 kume hektaare baatto diru giddo babbaxxitino wogganni latisa dandiinoonni.
Konnira korkaatu, laalcho uytanno baatto aana lattinota Baarzaafete haqqe dagooma ammanchiinshe gaadunni buqqisatenni, lata dandiitannoti fano baatto loosantukkinni galtannokki gede assatenni hattono babbaxxitino uurrinshubba afantanno baatto fano galtannokki gede assatenni latisa dandaatenni laalchimma lexxitanni dagginota huwachishino.
Konni garinni sagalete wowe buuxisiisate dandiinanni garinni loonsanni hee’noonniha hattono hasiissannoti gibrinnu waaco shiqqo woyyaabbanni dagginoha ikkirono yannitte gibrinnu tekinoloje garunni loosu aana hosiisatenna qaddo loosidhe galtinori kiiro hasi’noonni garinni lossate ragaanni foonqe noota la’noonni yiino.
Gibrinnu sektere gobboomu deerrinni onte lophote taqqa yine illacha tungoonniri mereerinni mittenna umise qeecha fultanni afantanno yiinohu Sooreessu; konni kaiminni, qoqqowoho sagaletenna sagalete amanyooti wowe buuxisiisate, gobbate giddonna kalqete dikkora shiqinshanni laalcho batinyunni laashshate, Industirete shiqinshanni waacubba laashshate hattono loosidhe galtinore lede handaarunni wedellaho loosu kaayyo kalaqatenni duuchu handaari horaameeyye assate timo amande loonsanni hee’noonnita qummeessino.
Amsaalu Felleqe
Bakkalcho Arfaasa 22, 2017 M.D
