Kalqete atileetiikisenni pilaatiniyemete deerra uynoonninsa maratoonete heewubba mereerinni mitto ikkinoha Vaalensiyu maratoone shiimu barri gedensaanni harinsanni. Maratoonetenni su`mansa gotti assa dandiitinore jajjabba atileetoota beeqqissannoti tini maratoonete heewo luphiima sharro dukkissanno yine agarranniha ikkanna; ispoortete maate widoonnino quqquxxammannita ikkitino. Heewotenni beeqqaano ikkitannori Itophiyu atileetooti qole xeertinyunni noonsa rakkino saatenna ikkadimmate kaiminni qeeltanno yitanno hexxo afidhino.
Meminni hattono doogote aani dodanshubbanni kalqete atileetiikisete dhaggenni haammata qeelle borreessiisinohu bareedu atileetichi Qeneniisa Beqqele hattono Vaalensiyu maratoonenni sa“i diro qeelaancho ikkinohu atileet Siisay Lemma labballu heewo massagganno. Lawino garinni seennu widoonni bayichu kibrewesene ayidde ikkitinoti Amaane Berriso hattono Megertu Alemuta labbinori rakkino saate noonsa atileetooti doddanno. Kunino qeelaanchimmate hedonni sae heewotenni rakkino saate borreessantanno yine agarranni gede assino.
Seeda dirra gedensaanni 2024 Paaris olompikenni gobbasi riqiwa dandiinohu bareedu atileetichi Qeneniisa Beqqele maratoonetenni kalqete sayikki rahino atileeticha ikkasi anfoonnite. Olompiiketenni hendoonni garinni gumaamo ikka hoogirono dirisi kaiminni heewo jeefisasinni ispoortete maate naaddannasi keeshshino. Boode aganna gedensaannino Qeneniisi kaajjado heewo assinanniwa Vaalensiyu maratoone higasi buuxisino. Qeneniisi sa“i diro vaalensiyu maratoone beeqqe shoolki deerra amadatenni jeefisasi qaangannite.
Yannate e“ino saateno 40 diri ale ikkitino atileetooti kibirewesene yaatenni borreessinoonnisi. Hakko diri gedensaanni wole beeqqo Lendenete maratoonenni assatennino layinki deerra amadino. Wirro higge xaaddannosi gawajjo gedensaanni kaajjado qixxaawonni heewote widira higatenni egennaminohu Qeneniisi xa qole olompiikete gedensaanni Vaalensiyaho wole qeellera gobbasi ooso ledo heewisamannoha ikkanno. 2 saate 1 xiqqeessa 41 lipheessa ikkitino rakkino saate noosihu seedu xeertinyi ayiddi Qeneniisi heewotenni beeqqitanno atileetooti baalunkunni umiha assannosiha ikkanna; noosi rosichinna ikkadimmasi kaiminni 2024 heewote diro gumaamimmatenni jeefisanno yineno agarranni.
Paarisi olompiikenni Itophiyu maratoonete gaamo miila ikkinohunna gawajjote korkaatinni beeqqinokkihu atileet Siisay Lemma qole Vaalensiyaho qeellesi borreessiisate heewote beeqqaancho ikkanno. Sa“i diro tenne vaalensiyu maratoonenni qeelaancho ikkinohu Siisay borreessiisinoti 2 saate 1 xiqqeessi 48 lipheessi umisita rakkino saate ikkite borreessantinosi. Kunino Qeneniisi saate ledo heewisiinsanni woyte lipheessu badooshshi noosiho. Atileetihu konni dirinni Bosten Maratoonete qeelaancho ikkirono e“ino saate kayinni xiqqeessubbatenni badhera gattinote. Atileetichu bayichoho noosi beeqqo kaiminnino Vaalensiyaho wirro qeelaancho ikkate kaayyo hala`litara dandiitannota agarranni. Ikkollana tenne heewonni beeqqitannori xeertinyunni kaajjado sharro assitanno atileetoota ikkansanni heewo shota dikkitanno.
Kuri mereerinni mitto ikkinohunna rakkino saate ayidde ikkinohu atileet Brihaanu Leggeseho. Sai diro Amsiterdaami maratoonenni 4ki deerra amadatenni jeefisino. Atileetichu A.K 2019 Berliini aana borreessiisinoti 2 saate 2 xiqqeessi 48 lipheessa ikkitino saate tayxeno Vaalensiyu maratoonenni sayikki rahino atileeticha assitannosi. Atileet Derrese Geletanna Guyye Adoolam Belaachew rakkino saatenni jeefissanno yine agarranni beeddakkoti mereero afantanno.
Seennu widoonnino aliidimma amaddinori Itophiyu atileetoota ikkitanna; Vaalensiyu maratoone kibirewesene ayidde ikkitinoti atileet Amaane Berriso lamu diri gedensaanni tenne heewonni higgino. Yannate borreessiissino saateno (2 saate 14 xiqqeessi 58 lipheessi) xeertinyunni sayikki rakkino saate yaamamatenni borreessamino. Hakkonni gedensaanni Budapeest kalqete shampiyoone ikkatenni ikkadimmase leellishshinoha ikkanna; Tookiyo maratoonenni sayikkita hattono Paarisi olompiikenni ontikkita ikkatenni jeefissino jawaata atileetichooti. Kunino barrubbate gedensaanni daanno sambatira Vaalensiyu aana wirro dhagge borreessitara dandiitanno yitannotenni aragarantanno gede assinose.
Ikkolla ikkinnina Megertu Alemu labbinori gobbase ooso ledo kaajjado heewo xaaddasera dandiitanno. A.K 2022 nna 2023 Lendenete maratoonenni layinkinna sayikkita ikkatenni jeefissinoti Megertu atileet Amaane borreessiissino saate ledo heewisiinsanni woyte lamu xiqqeessinni badhera gattino saate noose. Woloota hewisamaano atileetooti Hiyiwot Gebirekidaan hattono Xiruyye Mesfinitino xiqqeessubbatenni badhera gattino saate noonsare ikkiturono qeelate kaajjado heewo assitanno yine agarranninsa.
Abbebech Maatewoos
Bakkalcho Bocaasa 19, 2017 M.D
