Barrunni mitto barra mittu qachira Yemahu bati’re qooxeessa amadanno. Konne qarra gargadha dandiinannihu Basu afi’rino manchiwa marre basusi argi’ne Yemahe shorritanno gede assatenniiti. Konnira qachu manni Basu afi’rino manchiwa marate sumuu yii. Hasaawe sumuu yino garinni basu afi’rino manchiwa mare ‘’mooticha afittonte gede qooxeessinke Yemahunni amadameenna hingeemmowi bainonke. Ate mini konni qarrinni co’ichaho. Basu noohe daafira minikki Yemahunni di amadamino; ninke mini kayinni Yemahunni amadameenna mitii’mine hee’noommo. Konnira basurrichokki uyteennanke meyaa basurre qalshiisheenna ce’ne Yemahunni co’o ikkinona yitusi.
Basurrichu annino danchanna xeertise hedannoha ikkasinni ‘’Addanko ane mini calla Yemahunni co’o ikkasi konne qarra digatisanno. Ki’ne mini Yemahi ga’a ane
mineno daasi digattanno. Qooxeessaho noore baalankaati huna hasiissannohu’’ yee basurichosi argisinsa. Basurrichuno hasi’noonni loososi loosi. Lowo basurre qalshiishi; lophite Yemahe shorrite guddu. Qooxeessuno Yemahunni co’o ikki; keeru dirri. Xawu baalu gide hanganniha ikki. Hangoonniwa gide arrishu seekke gananno gede hanganni yanna ikkitu; hude gattu; duuwu dirri. Hakku basurrichirano barru fulisi. Wodani gede ita, aga, mine minenko sagale afi’rate kaayyo afi’ri. Wolu qooxeessi basurre qalshiisha ikki loosisi, baatto baala basurrunni wo’mitu.
Bakkalcho Woxawaajje 20 , 2013 M.D
