Addis Ababa:- Sidaamu qoqqowira tayxe arri gorsu loosinni 72 kume hekitaare ale baatto latisate mixo amandoonnita Qoqqowu Irshunna Kalaqamu Jiro Latishshi Biiro egensiissu.
Qoqqowoho arri gorsu latishshi loossa millimillote bareno harinsoonni.
Bare massaginohu qoqqowu pirezidaantichi Desta Ledamo tenne yannara coyi’ranni; gorsu latishshi loosi sagalete wowe buuxisiisate, jiro kalaqi’ratenna loosu kaayyo kalaqorano jawa qeecha afi’rino yiino.
Qoqqowoho nooha way doorshuwanna dhuka horoonsi’ratenni gorsu latishsha illachunni loosa agarrannita huwachishino.
Arri gorsu loosinni laalchonna laalchimma lossate sai 2016 laalchu dirinni lame doyichonni 64 kume 832 hekitaare baatto latinsoonniha ikkanna; tayxe kayinni 12.4% ledatenni 72 kume 892 hekitaare baatto latisate mixi’noonnita coyi’rinohu kayinni Qoqqowu Irshunna Kalaqamu Jiro Latishshi Biiro Sooreessi kalaa Memmeru Mokeho.
Laalchu herreego lainohunni 2016 laalchu dirinni 15 miliyoone kuntaali noowinni 8% ledatenni 16.2 miliyoone kuntaala laalcho gorsu latishshi loosinni gamba assate mixi’noonnita qummeessino.
Dikko mereersino laalcho qasiisotenni laashshate sai 2016 laalchu dirinni 10 kume 511 hekitaare baatto noowinni 48% ledatenni 20 kume 160 hekitaare baatto qasiisotenni latinse 4.7 miliyoone kuntaala laalcho gamba assinanni yine agarranni.
Gibrinnu waaco shiqqo lainohunni NPS na Yuuriya 56 kume 452 kuntaala hattono 75 kume 756 kuntaala dooramino wixa horoonsi’rate mixi’noonnitano hattonni.
Qoqqowoho tayxe arri gorsu latishshi loosira labballu 276 kumi 200 hattono 36 kumi 156 meenti xaphooma 312 kumi 356 loosidhe galtinori beeqqitannotano lede qummeessino.
IFDR Gorsunna Gammoojjaame Qooxeessubba Ministirchi Abrahaam Belay (Dr) tenne lamalara xawisino garinni; Itophiyunniha gibrinnu latishsha timo gantanno gorsu pirojekitubba loosantanni noota
Haaru baajeettete diri sa’u sase aganna handaaru loossa mixo gumulsha keenni yannara Ministirchu xawisanni; gibrinnu handaara irkissanno gorsu pirojekitubba loosantanni afantannota qummeessino.
Sagalete wowe buuxisiisanna gobbaydi dikkuwara sonkanni laalchubba hala’ladunni laashsha dandiinannihu rosaminohu gibrinnu loosinni fulle yannitte hayyonni laashsha dandiiniro ikkasino huwachishino.
Itophiyu nooseha hala’lado latate dhuka irkissanno gorsu pirojekitubba harancho yanna giddo gumulatenni horo uytanno gede assinannitano Ministirchi Abrahaam Belay (Dr) lede xawisino.
Gaazeexu Odeessaanchinni
Bakkalcho Birra 21, 2017 M.D
