Addis Ababa:- Sidaamu qoqqowira konni albaanni daddalohonna Investimentete su’minni uynoonni baatto lainohunni addi addi qaafo adhate gumulo sayinsoo Adhinoonni qaafo laisse Qoqqowu Moot immate Komunikeeshine Biiro xawishsha uytino.
Biirote sooreessi kalaa Woseniyelleh Simioon xawisino garinni; qoqqowu mootimma daddalunna Investimentete su’minni sayinse uynoonni baatto lainohunni xiinxallo assitanni keeshshitino.
Xiinxallotenni iillinoonni gumi kaiminnino xiinxallote gaamo shiqishshino malu hedo aana qoqqowu gashshootu amaale mini torbihu gedensaanni babbaxxitino qaafubba adhinanni gede gumulo saysinota xawisino.
Xiinxallote kaiminnino yinoonni yanna giddo baycho latise owaante aa hanaffinori laashshaano nooha ikanna; babbaxxitino korkaattanni gufidhurono kayinni xaa yannara ijaarsha gumultanni noori afantannota qummeesse; ikkollana, adhitino baatto latissukkinninna shiqishshino illachi gobbaanni ikkino garinni horoonsidhanna iillinoonniri noota kaysino.
Gashshootu amaale mini qaafo adhinanni gede gumulo saysino bayichubba mereerinni Mereeri Sidaami zoone Lokka Abbaayyu woradira Bukkito yaamantanno addi basera lee pirojekitubbanni amadantinoti1, 500 hekitaare ale baatto haa’ne baattote baankera qollanni gede gumulo sayinsoonni yiino.
Ledoteno, Hawaasi quchumi gashshootira konni albaanni qorophishsha uyinoonninsari 27 pirojekitubba xaa yannara danchu garinni millissanni noota keennoonniha ikkanna; babbaxxitino korkaattanno gufidhurono luphiimu miinjinni ijartinori 32 pirojekitubba jeefote qorophishsha uyneennansa harancho yanna giddo ijaarshansa gudde loosu giddora e’anno gede gumulloonnita Biirote sooreessi xawishshisinni qummeessino.
Hattono mitte loosu millimmono nonsakki gede keennoonnire 25 pirojekitubba amaddino baycho haa’ne baattote baankera qollanni gede gumulo sayinsoonni.
Daddalunna Investimentete su’minni amadante lattukkinni keeshshitino baatto aana qaafo adhinoonnihu qarunni wedellaho loosu kaayyo kalaqate ikkanna; hananfoonni lophote doogo roorenkanni lifixa assatenna Investimente goshooshate ikkinota kulloonni.
Konni gedensaannino babbaxxitino yannara baatto adhite latissukkinni keeshshitannori aana qoqqowu mootimma yanna yannatenni keeno assitanni labbanno qaafo adhitannoha ikkanna; adhinoonni qaafubbano Qoqqowu Investimentete komishiine widoonni gumulantannota xawinsonni.
Gaazeexu Odeessaanchinni
Bakkalcho Birra 21, 2017 M.D
