Addis Ababa:- Itophiyaho jawaate hala’lanni leellanno miinji giddo Maaleezhiyu daddalaano noota Investimentete kaayyo horonsidhanno gede jawaachisheemmo yiino Xaphoomu ministirchi Abiy Ahimed (Dr).
Sa’u muli barrubba giddo BRICS songo beeqqihu gedensaanni Maaleezhiyaho faajjete loosu towaanyo assinohu Xm Abiy Ahimed (Dr); ledoteno Xaphoomu ministirchi Aniwar Ibraahim qoleno Maaleezhiyu daganna mootimma uyitinoonninke ayirradu koyishshiranna baxillira galaxxineemmo yiino.
Halammenke gibirinnu, shiilote, laashshate handaarinninna fooraru wolqa handaarinni illachishino daddalunna Investimentete handaarra qoleno hala’lado amado noonsari wolootta qara loossa aana kaajjishate sumuu yinoommo yiino.
Xaphoomu ministirchi Abiy Ahimed (Dr) Ruusiyahonna Maaleezhiyaho assinoti loosu towaanyo seekkinota ikkaseno Xaphoomu ministirchi borro mini pirees sekreetariyaati massagaancho Bililene Siyyum xawissino.
Bililene Siyyum, xawissino garinni; Ruusiyaho Kazaani quchumira harinsoonniti 16ki BRICS massagaanote songo giddora Itophiyu gaamantu kawa beeqqo assate tini songo umikki yannara kayissino.
Xaphoomu ministirchi Abiy (Dr) songote aana, lamooshshunna duucha bissa amaddino amaalammete barubba aana gummaame beeqqo assinota leellishshino.
Xaphoomu ministirchi songote aana Afriku halamaancho mootimma adawu amaale mine guuta riqiwaanchimma afi’ra noositanna kalqoomu fayinaanse amanyooti woyyaawanno gede woshshattosi shiqishinota coyidhino.
Songote qotira BRICS beeqqaanonna beeqqaano ikka hasidhanno gobbuwa massagaano ledo assinoonni lamooshshu hasaawa assatenni Itophiyu gaacheena xawisasino qummeessitino.
Wole widoonni Xaphoomu ministirchi Abiy Ahimed (Dr) Maaleezhiyaho assino faajjete loosu towaanyonni hattenne gobba Xaphoomu ministirchi Aniwar Ibiraahim ledo hasaawa assinota coyidhino.
Hasaawu yannara lamente gobbuwa mereero seeda yanna keeshshino xaadooshshe roorse kaajjishate mittimmate sumimme aana iillansa kayissino.
Xaphoomu ministirchi Maaleezhiyu dureeyye Itophiyaho noota injiitino Investimente diilallo horonsidhe Itophiyaho eltonsa duntanno gede woshshatto shiqishinota leellishshino.
Gaazeexu Odeessaanchinni
Bakkalcho Birra 21, 2017 M.D
