Gobboomu deerrinni hananfoonni doogimaru latishsha Sidaamu qoqqowi qaru quchumira Hawaasa wiinamunni gumulsiinanni hee’noonni.
Qoqqowu pirezidaantichi Kalaa Dasta Ledamohu Hawaasi quchumira doogimaru latishshi looso halashshine loosate shiqqino harinsho noo deerra keeninonoha ikkanna;doogimaru latishsha halashshine loosate shiqqino dizayineno jajjabba qoqqowu mootimmate massagaanonni ledo torbite kaajjishshino.
Pirezidaantichu tenne yannara xawisanni, loosamanni noohu doogimaru latishshi amandoonni yannanni jeefamanno gede illacha tunge loonsannj hee’noonnita xawise; haaru doogimaru latishshi loosi dizayinete hedo uyineenna woyyeessine wiinamunni hananfoonni garinni yanna uyinikkinni gumullanni yiino.
Hawaasi quchumi kantiiwi kalaa Mekuriya Mershaye isi widoonni Itophiyu Pireesete Uurrinshara xawisinonte gede; muli yannara quchumu giddo hanafaminohu doogimaru latishshi loosi quchumu dana soorranno yiino. Doogimaru latishshi doogga biifisate loossa amadinoha ikke,shalleettetenna lekkaasinu doogga badinohonna bisu xe’ne noonsare hedote giddo worino garinni loosamanni noota xawise kantiibu; goofanno wote quchumaho ledote biinfille aatenni quchuma daa’atanno turistooti kiiro lexxitanno gede assatenni turiizime qoleno miinja lossate jawu qeechi hee’rannosi yiino.
Quchumaho doogimaru loosi lamu garinni hanafaminota coyi’ranni kantiiwu; loossa halashshinanni basera loonsannitenna quchumu mereero loonsannita sase kaima doogga amaddinota ikkase qummi assino. Kantiibu quchumu tesaano latishshu loossara guficho ikkitukkinni hale ikkansarano galata shiqishino.
Injiitino lekkaasinu doogga,shalleettete doogga,doogote qaccera boohaarranni fooliishshi’nanni basenna quchumu deerra agadhino hashshi caabbichinna foonchuwa harancho yanna giddo gooffanno gedeno loosu xomoosino garinni gumulamanni noota basete leelline la’’ate dandiinoommo.
Hawaasi quchumi doogimaru latishshi quchumu biinfille ledatenni qote qoteho turistootu kiiro luphi assatenna ilamte biifino quchuma ragisiisate luphiimu qeechi nooha ikkasino Itophiyu pireesete uurrinsha hasaawissino mite mite quchumu teesaano buuxissino.
Yaareed Geetaachew
Bakkalcho Wocawaaro 23, 2017 M.D Hamuse
