Hawaasi Quchumi lekkate kuwaase kilawe hanafantinohu 1970 MDnni ikkinota kulllanni.
Hatte yannara Sidaamu Kifle Hagere Shaampiyoona yine woshshinanni heewonniiti beeqqosi leellishinohu.
Kilawe Itophiyu Pirimeeri Liige -1996-1999 MD geeshsha assitiino beeqqonni lame hige Pirimeeri Liigete Boowe kayissino/ adhitino. Kilawe Itophiyoho huna sa’’ate Shampiyoona ikkatenniiti 1997 MDnni boowe kayissinohu.
Konninnino Itophiyu Pirimeeriligete dhaggenni Addis Ababu kilawubbara gobbaanni Shampiyoona ikka dandiitino hojicho kilaweeti.
Hawaasi Kanami Itophiyu pirimeera lige umi dirinni 1990 hanafe beeqqo assanni leellanno. Umikki lee dirrara layinki deerra amdatenni dancha hettisamaancho ikkate mixxirino.
Hawaasi kanamira umiti gumaame yannaati yine kayinsanniti 1996 maarote dirooti. Kilawe Itophiyu pirimeerligera jeefote godo’lenni Niyaala 3nna 1tenni qeelte shaampiyoona ikkitino.
Hawaasi hatte yannara borreessiisino gumi pirimeerligete waanci umi yannara Addis Ababunni fule hara gede gadachinonkanni.
Hatte yannara qajeelsaanchu Kemaal Ahmed beeddakko qajeelsaancho; ambelle Mulugeta Mihiret beeddakko godo’laancho ikkite doorantino.
Harunseno 1999 MD shampiyoona ikkino.
Hawaasi Quchumi lekkate kuwaase kilawe pirimeeriligete karsami dirinni kayise dirritinokkita kaajjado lekkate kuwaase kilawe ikkite leellitanno.
Hawaasi Kanami ispoorte kilawe kalqoomu heewo lainohunni noo mashalaqqe leellishshanno garinni kilawe Afriku shampiyoonisligete beeqqate kaayyo afidhino. Kunino 1997 nninna 2000 MDnniiti.
1997 umi yannara beeqqo assitu wote Suudaanete Alhilal Omderman ledootinka gaamantinohu. Umi godo’lera Kaartumete ledo 2nna 1 qeelantuhu gedensoonni marrote godo’lera Addis Abebaho mitte taalotenni baxxansanni 3 nna 1 ikkino guminni balaxame umikki doyicho sa’ukkinni gattino.
2000MD layinki yannara beeqqo assitu woteno tantanantihu Taanzaaniyu Siimba ledootinka. Daare Selaamira assinoonni tenne godo’lenni 3 nna 0 qeelante higge Addis Abebaho kayinni 4 nna 1 qeelamasenni xaphoomu guminni heewote gobbaanni ikkitino.
Konninnino Hawaasi Kanami lame hige Afriku Shaampiyoonera beeqqo asse balaxote filo heewo saikkinni gatino.
Hawaasi kanami kiwawe Afriku Konfedereeshine booweno 1998 MD beeqqitino; Ruwaandu Rawoonsiport ledo xaadde umi godo’le Kiigaalira 1 nna 0 qeelamatenni jeefissino. Marrote godo’lera Addis Abebaho hattonni 1 nna 0 ikkino guminni qeelamatenni harunsitino doyichowa saikkinni gatino.
Konni albaanni harisanni hee’noonnihu xa kayinni uurrinohu Kafikap beeqqo assino. Tini heewo gobbuwansara layinkire fultino kiwawubba beeqqitinote.
Hawaasi Kanamino 1991 Itophiyu pirimeerilige layinki deerra afire 1992 MDnni tenne heewora beeqqo assino.
Umitera Ruwaandu Mukuravikiri ledootinka xaadinohu; Addis Ababaho 2 nna 0 qeelatenni Kiigaalira 1 nna 0 qeelamirono sa’a dandiino.
Layinkitera Nayijeeriyu Iwaniyaniwu Nashinaali ledo 3 nna 2 ikkino xaphoomu guminni qeelame heewote gobbaanni ikkino.
Xa Hawaasi quchumi gashshooti tenne quchumu ambasaaddere ikkitino kiwawe 2017 pirimeeriligete godo’le heewora bayichose qolate jawa ikkitino qixxaawo assitino. Assitannino leellitanno.
Tayixe pirimeerlige godo’lera kilawe baxxino guma borreessiisatenni qoqqowinkera seyoo afidhino heewisamaancho kiwawe assate baxxino illachinna kakkaooshshi gashshootuwiichinni ikkanni leellanno.
Bakkalcho Wocawaaro 16, 2017 M.D Hamuse
