Tittiro
Wocawaaro agani Itophiyu dagara uminsa aamanshaati. Haaru eo, dancha halcho, haaroo heeshsho, haaroo hexxo, maarotenna danchummate faro fa’nantanno aganna albisaati. Dikkonne callaatina mannu xaadooshshinna mannimmate mayimma ciirtannosiha ikkite jawa Itophiyu daga wodani giddo attamamino aganaati.
Wocawaaro aganinni gordu hawadi akatasi haweenna guunjotenni, gugattotenni fule, baattono sabbunni fulte, laggate foonchino xalale, daraarchu lateenna; murono latteenna
dancha galata kaaliiqinsara shiqishidhannore labbanno. Konniranni munnu kaaliiqisira galata shiqishi’ranno aganaati. Itophiyu diru tantanora Wocawaaro mite “A”’ yee hanafino diru soorro agani mereershi barrubba xawu ayyaannanni biifanno.
Baxxinohunni wodiidi Itophiyu gobbubba hoola yinanni Wocawaaro agani giddo batidhe leellitanno. Masqalu, Giifatu, Yahoode, Mesela duuchu giddonni qummi assa dandiinannireeti. Kuri ayyaanna budu balchoommansa afi’ratenni ledo haaro diro adhinannire ikkansanni baxxitino macciishshame kalaqqannoreeti.
Hadiyyu dagara ha’nura ikkinohunna baxxite leellitanno gede assatenni; ilamatenni ilamanniwa sa’anni dayinohu, agadhite keeshshiishshinohu jawu budu balchoomi nooseha ikkanna wolootunnino roore baxxitino qixxaawonni dukkisame ayirrisamatenni afaminohu ‘’Yahoode’’ umihonna Hadiyyaho diru soorro ayyaanaati. ‘’Yahoode’’ fiixu firu xaadatenni giwaminohu araaramenna hawadi tunsichi saeenna xawaabbu widira sa’nannita odeessinanni ayyaanaati.
Hadiyyu zoonehu layinki gashshaanchi Befiqaadu Gebrehaanna(PhD); ‘’Yahoode’’ dagoomu ilamano xaaddanno, giwammohu araaramanno, keerunna hagiirru daraaranno, ayyaana ikkasi xawisanno.
Yahoode ayyaanira giwaminohu araaramikkinni ayyaanu diayirrisamanno yaanni Befiqaadu (PhD); ayyaanu xeerti’rino fiixi shiqannoha, keeru xaadooshshiha jawa bude ikkasino coyirino. Yahoode labbinori dagoomu budu balchoomma akatansa agurtukkinni mitte ilamawiinni dagganno ilamara sayisanna halashshe egensiisa jawa horo afidhino yiino.
Dagganno yannara Yahoode ayyaanni amammandannikki kalqete donna giddo mitto ikke UNESCO deerrinni borreessamanno gede babbaxxitino bissa ledo loonsanni hee’noonnita qummi assino.
Hadiyyu budunna turizimete biddishshi soreessi kalaa Mesfin Beggaale isi widoonni; Yahoode ayyaaninnni noosihu noosikkihura beehatenni, mimmitoho yaadatenninna baxillunni haaro diro hagiirrunni adhinanniha ikkasinni hadiyyu dagara mayiimma ikkino ayyaana ikkasi xawisanno. Biddishshu sooreessi xawishshi garinni; Yahoode keere, rodiimma, mittimma xawisanno ayyaannaati. Dagganno yannara konne Yahoode ayyaana roorunni roore xawenna hala’le ayirrisamatenni qoxeessa dagganno daa’’ataano kiiro halashshate hajo la’annonsa bissa ledo loonsanni yiino.
Wole widoonni Guraagete daga Masqalu ayyaana wocawaaro 12 hanaffe iibbadu garinni ayirrissanni afantanno.Masqalu ayyaani iillino; qiidanna arrishsho cince jajjabba loossanni miliyoonetenni kirranniha duu’ninohuno annu annisinni ayyaana maatesinna olliichisi ledo ayiirrisanni afamanno.
Meentuno ayyaanu sagalenna coomminshshanni buuronna babbaxxitino makimaano qixxeessate widoonni dideantino. Quchumaho hee’rannohu birrano ikko imaana haa’re massatenni badhe dihiganno. qixxaawo gude ollaasi iillino.
Soojaati Guraage zoone budunna turizimete biddishshi sooreette baabba Biruktawiti Tsegaye umise widoonni; Masqalu ayyaanni Wocawaaro 16 geeshsha saadate gorro harinsanni geeshsha ayirrisamannoti noowa heedheenna Birra 5tu geeshsha kayinni ayyaana irkidhe daggannoti Adabbina yinanni godo’le (wedellu seenninna labballi godo’le) noota kulte tinneno zoonete giddo daga ayirrissanni noota xawissino.
Demmellaash Demmeqe
Bakkalcho Wocawaaro 16, 2017 M.D Hamuse
